დისკუსიაში, რომლის მოდერატორი იურისტი თამარ გურჩიანი იყო, საქართველოს ენერგეტიკის მინისტრის მოადგილე მარიამ ვალიშვილი, საქართველოს რეგიონული განვითარებისა და ინსფრასტრუქტურის მინისტრის მოადგილე შოთა მურღულია და გარემოსა და ბუნებრივი რესურსების დაცვის მინისტრის პირველი მოადგილე ნინო შარაშიძე იღებდნენ მონაწილეობას.
სამივე სამინისტროს წარმომადგენელმა საკუთარი მოსაზრებები გამოთქვა, თუ როგორ ესახებათ ქვეყნის მდგრადი განვითარება:
ნინო შარაშიძე: “მიუხედავად იმისა, რომ ტერმინი “მდგრადი განვითარება” უკვე დიდი ხანია, მსოფლიოში დამკვიდრებულია, საქართველოში ის მაინც გარემოს დამცველების მიერ არის მოხსენიებული. თუმცა იგი უფრო მეტს მოიცავს, ვიდრე გარემოს დაცვას. მდგრადი განვითარება ეს არის განვითარება, რომელიც დააბალანსებს როგორც ეკონომიკურ, ისე სოციალურ და გარემოს დაცვით საკითხებს. ეს ისეთი განვითარებაა, როდესაც ეკონომიკური პროექტების დაგეგმვისას გარემოს დაცვითი და სოციალური ასპექტების გათვალისწინება ერთდროულად ხდება”.
მდგრადი განვითარების არსს ქვეყნის რესურსების მდგრადად ათვისებაში ხედავს ენერგეტიკის მინისტრის მოადგილე მარიამ ვალიშვილი, ხოლო ინფრასტრუქტურის მინისტრის მოადგილისთვის მდგრადი განვითარება არის არა – სწრაფი, არამედ გეგმაზომიერი განვითარება.
როგორც შოთა მურღულიამ აღნიშნა, ყოველი ინფრასტრუქტურული პროექტი უნდა ეყრდნობოდეს კარგ კვლევას და შემდეგ შეიძლება მისი გახორციელება. მისი თქმით, რეგიონული განვითარების და ინფრასტრუქტურის სამინისტრო ამ პრინციპით ხელმძღვანელობს.
ენერგეტიკის მოადგილის მიერ რესურსების მდგრადად ათვისებაზე და ჰესებზე საუბარმა დამსწრე საზოგადოებაში პოლემიკა გამოიწვია. მარიამ ვალიშვილმა ჰესების მშენებლობის აუცილებლობა ენერგოდამოუკიდებლობა-უსაფრთხოების და დაბალი ტარიფების საჭიროებით ახსნა. აუდიტორიის შენიშვნებს, რომ ენერგეტიკის სამინისტრო 40 წლის წინანდელი პროექტებით ხელმძღვანელობს; არავითარი ინოვაცია არ ჩანს ამ დარგში; სამინისტრო არ ფიქრობს ენერგოეფექტურობაზე და ენერგიის განახლებად სახეებზე, მინისტრის მოადგილემ უპასუხა, რომ ყველა ამ საკითხზე სამსჯელოდ მზად არის. თუმცა შემდეგ ისევ შემართებით განაგრძო, რომ “ჰესების მშენებლობა საქართველოს ენერგეტიკის მომავალია”.
გარემოს დაცვის მინისტრის მოადგილემაც აღნიშნა, რომ ჰესების აშენების წინააღმდეგი არ არის. მისი თქმით, სახელმწიფოს ენერგია სჭირდება, თუმცა დაამატა, რომ ეს არ უნდა მოხდეს გარემოს დაზიანების ხარჯზე.
ნინო შარაშიძემ მარიამ ვალიშვილს “დარიალ ჰესის” საკითხში ოპონირებაც გაუწია და მის მშენებლობას “ძალიან დიდი შეცდომა” უწოდა. შარაშიძის თქმით, არ შეიძლება, თერგი მიწის ქვეშ იყოს მოქცეული. რეალურად წყლის 90% მილიში მიედინება და ბიომრავაფეროვნების შენარჩუნებისთვის ფიზიკურად წყალი აღარ რჩება.
“გარემოს დაცვა არ შეიძლება ხელისშემშლელი იყოს ეკონომიკური განითარებისათვის. პირიქით, გარემოს დაცვა არის გარანტი სტაბილური ეკონომიკური განვითარების. ეს სამივე მიმართულება არათუ დაპირისპირებულად, არამედ ცალ-ცალკეც არ უნდა იქნას განხილული.ეს უნდა იყოს შეჯერებული და დაბალანსებული”, _ აღნიშნა შარაშიძემ.
სამინისტროების კოორდინირებულად მუშაობის აუცილებლობაზე შეთანხმდნენ ასევე მარიამ ვალიშვილი და შოთა მურღულია. მინისტრების მოადგილეების თქმით, ამგვარი მუშაობა ქვეყნის მდგრადი განვითარებისთვის აუცილებელია.
