რამდენიმე კვირის წინ, ისევ რაიონის მოსახლეობის ინტერესებიდან გამომდინარე, ვთხოვეთ ინტერვიუს ჩაწერის დროზე შევთანხმებულიყავით, მაგრამ უარი გვითხრა და მიზეზად ჩვენი მისდამი სუბიექტური განწყობა დაასახელა. როგორც გიორგი სიმონიამ აღნიშნა, ჯერ კიდევ მარტში ჩაწერილი ინტერვიუს დროს ჰქონია ასეთი შთაბეჭდილება გაჩენილი, ამჯერად კი მის ემოციებს გასაქანი მისცა და ინტერვიუზე არ დაგვთანხმდა.
უკვე დიდი ხანია აბაშაში ყველა საგანმანათლებლო პროექტ “ეტალონზე” მის მიერ ნათქვამ ფრაზას იმეორებს _ ზოგი აღშფოთებას ვერ მალავს, ზოგი _ ირონიას და ზოგი კი გაოცებას: გადაცემაში წამყვანმა გამგებლის მოადგილეს წარმატების მისაღწევი მისეული ფორმულის შესახებ ჰკითხა, რაზეც სიმონიამ უპასუხა: “მიზანდასახულობა, შრომისმოყვარეობდა და იღბალი”. ამის შემდეგ გოჩა ტყეშელაშვილმა თქვა _ “იღბლიანია აბაშა”. სწორედ წამყვანის ამ სიტყვების რეაგირებისას გიორგი სიმონიას გაკეთებულმა კომენტარმა გამოიწვია აბაშელებში დიდი რეზონანსი: “იღბლიანია აბაშა, იმიტომ რომ ასეთი გამგებლის მოადგილე ჰყავს”.
ამ საკითხის გარდა, მოსახლეობას სხვა ბევრი კითხვა აქვს გამგებლის მოადგილესთან და ინტერვიუც მხოლოდ ხალხის მიერ მოწოდებულ კითხვებზე პასუხის გაცემას ისახავდა მიზნად, მიუხედავად იმისა, რომ მან არ ისურვა ინტერვიუს ჩაწერა, მაინც შევთანხმდით, რომ მეორე დილით გვეტყოდა გადამწყვეტ პასუხს. დილამაც ჩაიარა, სიმონია მხოლოდ საღამოს შეგვეხმიანა და ისიც მხოლოდ იმის სათქმელად, რომ ჩვენი შეხვედრის შანსი, თურმე 50/50-ზე ყოფილა.
_ ახლა ვიკვლევ რაღაც საკითხებს და ველოდები კვანძის გახსნას, ვფიქრობ, ეს საკითხებიც დააინტერესებს მოსახლეობას. მხოლოდ ამის მერე შეგხვდებით და ფაქტებს დაგიწყობთ იმის სანახავად, რომ თქვენ ჩემდამი სუბიექტური ხართ, _ გვითხრა სიმონიამ.
ამაზეც დავთანხმდით, რადგან მართლა გვაინტერესებდა, რატომ ფიქრობდა ეს ადამიანი, რომ მის მიმართ სუბიექტურები ვართ; გვაინტერესებდა იმ “კვანძის გახსნის” შედეგად მიღებული შედეგებიც. მას შემდეგ ერთი კვირა გავიდა და სიმონია არ შეგვხმიანებია. კიდევ დავურეკეთ და საბოლოო პასუხს საღამოს გეტყვითო. მართლაც დარეკა საღამოს და თქვა, რომ საკმაოდ დაძაბული და გადატვირთული სამუშაო გრაფიკი აქვს და დრო ვერ გამონახა სასაუბროდ.
_ ბატონო გიორგი, ახლაც იტყვით, რომ თქვენდამი სუბიექტურად ვარ განწყობილი? ხომ შემიძლია ახლა დავწერო, “დაძაბული დღის” განმავლობაში ორი საათი კაფეში გაატარა და ინტერვიუსთვის დრო ვერ გამონახა,-მეთქი? ხომ შემეძლო ყველა ჩვენი საუბარი გამომექვეყნებინა და მეთქვა, რომ არ ისურვეთ ხალხის კითხვებზე პასუხის გაცემა? ხომ შემეძლო ის ადამიანები ჩამეწერა, რომლებიც თქვენზე ათას რამეს ჰყვებიან? მინდა ისიც იცოდეთ, რომ ძალიან ხშირად გვირეკავენ გამგეობიდან და გვეუბნებიან, პარტიის ახალგაზრდულ ფრთასთან შეხვედრა მის კაბინეტში აქვსო და კიდევ ძალიან ბევრი რამ, მაგრამ გელოდებოდით, როდის დაგვთანხმდებოდით ინტერვიუზე _ ხალხის მიერ მოწოდებულ კითხვებზე პასუხის რომ გაგეცათ. ამიტომ პირადულის უფრო მაღლა დაყენება მიზანშეწონილად არ მიგვაჩნია. მართლა რომ სუბიექტურად ვიყოთ განწყობილნი, მაშინვე და სკანდალს ავაგორებდით _საჯარო მოხელე საჯარო ინფორმაციას არ გვაძლევსო?
_ კი, რა თქმა უნდა, მე მაგაზეც მქონდა გათვლილი, რომ ამას შენ დაწერდი.
_ ხომ ხედავთ, ამ ერთი სიტყვიდანაც ჩანს, ვინ არის სუბიექტური.
_ კი, ხარ და ამას ფაქტებით დაგიმტკიცებ.
_ ამას უკვე ერთი კვირაა, ამბობთ… კიდევ ერთხელ გეუბნებით, ეს ხალხის კითხვებია და ამიტომ გვინდაა თქვენთან შეხვედრა.
ამ საუბრის შემდეგ კიდევ ერთი კვირა გავიდა. ხალხის ინტერესი იზრდება, კითხვების რაოდენობაც მატულობს, ამიტომ კიდევ ერთხელ გვინდა ვკითხოთ სიმონიას _ შედგება თუ არა ჩვენი შეხვედრა, რადგან კითხვები, რომლებიც აქვს ხალხს პასუხგაუცემელი არ უნდა დარჩეს.
აბაშაში მგონი ტრადიციად დამკვიდრდა-გამგებელი ინტერვიუს არ იძლევა, კითხვებს არასდროს პასუხობს საკრებულოს თავმჯდომარის მოადგილე და ყოველთვის აპარატის უფროსთან ამისამართებს მედიის წარმომადგენლებს, კითხვებს არც გამგებლის მოადგილე პასუხობს, რომელსაც მედიასთან ურთიერთობა ევალება.
