კოოპერატიული ბინათმშენებლობით დაზარალებულთა ცენტრ “ერთობის” მიმართულების კოორდინატორი, ლაშა გეგეჭკორი ჩვენთან საუბრისას ამბობს, რომ
აქცია მანამ არ დაიშლება, სანამ ნოდარ ხადური დაზარალებულების წარმომადგენლებს არ შეხვდება და ყველა კითხვაზე პასუხს არ გასცემს:
_ “ნაციონალური მოძრაობა” თავისი მმართველობის 9 წლიან პერიოდში ცინიკურად ეპყრობოდა ამ პრობლემით დაზარალებულ ხალხს. 9000 ადამიანმა გასული საუკუნის 80-იან წლებში სახელმწიფოს სრულად გადაუხადა და დაუკვეთა საცხოვრებელი ბინების მშენებლობა. პროცესი დაიწყო, აშენდა ათეულობით კორპუსი საქართველოს მასშტაბით, მაგრამ 90-ანი წლების ცნობილი მოვლენების გამო დაწყებული მშენებლობები გაჩერდა. 1999 წელს ხელისუფლებამ აღიარა კოოპერატიული ბინათმშენებლების მიმართ თავისი ვალდებულება, ეწოდა რა მას – “სახელმწიფო საშინაო ვალი”.
ამ პერიოდიდან 2003 წლამდე, “ვარდების რევოლუციამდე” ნელი ტემპით, თუმცა, მაინც აშენდა რამდენიმე საცხოვრებელი კორპუსი, გაიცა თანხები ერთჯერადი კომპენსაციების სახით.
2004 წელს შეიქმნა “სახელმწიფო საშინაო ვალის შემსწავლელი სახელმწიფო კომისია”, რომელსაც ყოველი არჩევნების წინ ახსენდებოდა თავისი დაზარალებულები და “ნაციონალური მოძრაობა” პიარად იყენებდა ამ თემას.
2012 წლის წინასაარჩევნო პერიოდში, 20 იანვარს ცენტრი “ერთობა” საქართველოს პარლამენტში შეხვდა ფრაქცია “ერთობა სამართლიანობისათვის” თავმჯდომარეს, ბატონ გია ცაგარეიშვილს, საიდანაც გაიჟღერა დაზარალებულთა მიმართვამ მომავალი ძალისადმი, რადგან ამ ძალის მთავარი მესიჯი იყო სამართლიანობის აღდგენა.
2012 წლის 17 მაისს დაზარალებულები კოალიცია “ქართული ოცნების” ლიდერს ბატონ ბიძინა ივანიშვილს შევხვდით, სადაც მოვისმინეთ მკაფიო დაპირება _ “ბიძინა ივანიშვილის ხელისუფლებაში მოსვლის შემდეგ კოოპერატიული ბინათმშენებლობის დაზარალებულთა პრობლემები პირველი რიგის ამოცანა იქნება”.
რა ხდება ოქტომბრის არჩევნების შემდეგ? _ 2012 წლის 12 დეკემბერს განახლდა “სახელმწიფო კომისიის” შემადგენლობა, მის თავმჯდომარედ დაინიშნა ფინანსთა მინისტრი ბატონი ნოდარ ხადური, რომელმაც თავის მხრივ შექმნა “სამუშაო ჯგუფი”.
ამ ჯგუფს უნდა შეესწავლა კოოპერატიული ბინათმშენებლობის პრობლემა, კერძოდ:
მოეხდინა “სახელმწიფო საშინაო ვალის” ეს ნაწილი; განესაზღვრა დაზარალებულთა რაოდენობა; მოეხდინა სრული ინვენტარიზაცია და შესრულებული სამუშაოების ანგარიში წარედგინა “სახელმწიფო კომისიის” სხდომაზე, რომელიც მინისტრის სიტყვებით (მას შევხვდით მ/წ 20 მარტს) გაიმართებოდა 2-3 კვირაში და მასზე სამოქალაქო სექტორის დასწრება უზრუნველყოფილი იქნებოდა. ეს დღემდე არ შესრულებულა.
მაის-ივნისის თვეში ცენტრმა “ერთობამ” ფინანსთა სამინისტროს, ასევე ბატონ ნოდარ ხადურს თავიანთ ოფიციალურ გვერდზე გაუგზავნა შესაბამისი შეკითხვები, რომლებიც უპასუხოდ დარჩა. ასევე უპასუხოდ დარჩა ტელედებატში გამოწვევა, სადაც “ერთობა” იწვევდა მინისტრს ღია, სახალხო დებატებში…
24 ივნისს ცენტრმა “ერთობამ” ღია წერილი გაუგზავნა საქართველოს პრემიერ-მინისტრს, ბატონ ბიძინა ივანიშვილს და ამ წერილს კი ოპერატიულად გამოეხმაურა ფინანსთა სამინისტრო.
“უახლოეს მომავალში სამუშაო ჯგუფი შესრულებული სამუშაოს ანგარიშს წარუდგენს “სახელმწიფო კომისიას”. შესაბამისად, მას გაეცნობა სამოქალაქო საზოგადოება და გაიმართება დისკუსია”, _ დაგვპირდა სამინისტრო.
არადა, 25 წელი გავიდა საკუთარი საცხოვრებელი ბინის მოლოდინში. ამ დაზარალებულთა შორის უამრავი ადამიანი გარდაიცვალა ისე, რომ საკუთარ ჭერს ვერ ეღირსა. ასევე, მათ შორისაა უამრავი სოციალურად გაჭირვებული ადამიანი. ისინი ცხოვრობენ ქირით, ან მიკედლებულნი არიან ახლობლებს. ერთი ქალბატონი მირეკავს ხშირად შეკითხვით: “ხომ დაგვპირდა ივანიშვილი, ბებო?”…
დღეს ამ შეკითხვაზე პასუხს ვითხოვთ ფინანსთა მინისტრისაგან, არ დავიშლებით, სანამ არ შეხვდება დაზარალებულთა წარმომადგენლებს და არ გაგვცემს კონკრეტულ პასუხს, _ აღნიშნა ჩვენთან საუბრისას გეგეჭკორმა.
