გარდა იმისა, რომ ქუჩაში არ კლავენ ადამიანებს,” _ მიაჩნია ირაკლი კაკაბაძეს.
მასთან ინტერვიუ “კავკასიის სახლში” გამართული კონფერენციის დროს ჩავწერეთ, რომელზეც მსოფლიოში მიმდინარე გლობალურ საკითხებს განიხილავდნენ.
_ ამ კონფერენციაზე თქვენი მოხსენების თემა იყო “კულტურული ჰეგემონია და იმპერიალიზმი – აშშ-ს გავლენის დაცემის მიზეზი”. მხოლოდ ამერიკის შეერთებული შტატების სენია ჰეგემონია და იმპერიალიზმი?
_ არა მხოლოდ. მე ვსაუბრობდი ბიურგერულ იმპერიალიზმზე. ბიურგერობა ყველგან არის, ამერიკაშიც, ჩინეთშიც, ევროპაშიც, რუსეთშიც. ამიტომ ამის დაყოფა ეროვნული ნიშნით არ არის სწორი. ვინაიდან აშშ არის ძლიერი ქვეყანა და თავის კაპიტალს ახვევს მსოფლიოს, იმიტომ განვიხილე ამ კონტექსტში. თუმცა, რეალურად, ამას ამერიკის შეერთებულ შტატებთან კავშირიც აღარ აქვს. ეს არის ბურჟუა კარიერისტების ტრანსნაციონალური იმპერიალიზმი.
_ გლობალურ მოვლენებს, მღელვარებებს თუ გადავხედავთ, დაცემის გზაზეა ეს იმპერიალიზმი?
_ დაცემის გზაზეა თუ არა, ეს ძნელი სათქმელია, მაგრამ თავისთავად ძალიან საზიზღარი რამეა. ამ საზიზღრობას ბევრი ადამიანი ხედავს. ბევრი ადამიანი გამოდის მის წინააღმდეგ მთელ მსოფლიოში _ ეგვიპტეში, ამერიკაში, საფრანგეთში, ბრიტანეთში, ესპანეთში, ბრაზილიაში, -ყველგან გამოდიან და უპირისპირდებიან მას. ჩვენთან ამ გამოსვლებმა ცოცხების სახე მიიღო. რეალურად, ეს ერთი და იგივე ფენომენია, რაც არის ლიბერალური მონობის ფორმა.
_ საქართველოში როგორია დღეს სიტუაცია. ხედავთ იმპერიალიზმის ნიშნებს?
_ ძალიან ძლიერად არის, ძალიან მძიმე სიტუაციაა. ბოლო 20 წელი გაუარესებაა. ამ 9 წელმა გააძლიერა ლიბერალური ავტორიტარიზმის სისტემა. ახლა რაღაც გაურკვეველ ვითარებაში ვართ, მაგრამ გაუმჯობესება არ არის. გარდა იმისა, რომ ქუჩაში არ კლავენ ადამიანებს.
_ კონფერენციაზე გლობალიზაციას, მონოპოლიას შეეხნენ. თქვენ როგორ უყურებთ ამ საკითხებს?
_ გლობალიზაციას თავისი კარგი მხარეებიც აქვს. ან კიდევ ამბობენ, ალტერგლობალიზმი, რაც თავისთავად კარგი რამეა. გლობალიზაცია გამოიხატება კორპორაციების მონოპოლიზაციაში, რომელიც ფლობს დაახლოებით მსოფლიოს 90%-ს. იგივეა, რა ხელწერაც აქვს იმპერიალიზმს.
რატომ არის ხმამაღალი ნათქვამი? უბრალოდ, ბოლო 20 წელია ამაზე აღარ ლაპარაკობენ. აღარ არის მოდური. ყველაფერი ახალი კარგად დავიწყებული ძველია. მიწა მიაყარეს ამ ძველ სიტყვას! ის რომელიმე ქვეყნის ჰეგემონიაში კი არა, ტრანსნაციონალური კორპორაციების უკან უნდა დავინახოთ. იგივე “ბიპის” უკან იმალება. სხვადასხვა კორპორაციები არიან იმპერიალისტები. იგივე, დისკურსის მონოპოლიზაციის საკითხიც დგას – ვინ ფლობს დისკურსს და ა. შ. საერთოდ, მეტყველების გაყალბება ხდება. დღევანდელი მედია, დღევანდელი ბიურგერული მედია გვაჩვევს ყალბ მეტყველებას. ეს უკვე იმპერიალიზმის ნიშნებია, იმიტომ რომ “გააპრავოს” კორპორაციების ძალადობა მილიარდობით ადამიანზე. ამაზე არავინ ლაპარაკობს. სამაგიეროდ, გვეუბნებიან, ანჯელინა ჯოლი და ბრედ პიტი რამდენჯერ არიან საწოლში ერთად.
“რუსთავი 2”-ს მე რომ ვუთხარი, თქვენ ხართ კაპიტალიზმის “პრასტიტუტკა”,-მეთქი, ეს მართალი იყო. მე ვიბრძოლებ ბოლომდე, იმიტომ, რომ “რუსთავი 2″ არის კაპიტალიზმის “პრასტიტუტკა” და არა მხოლოდ.
_ რახან მედიას შევეხეთ, რაში ხედავთ გამოსავალს იგივე მედიასთან დაკავშირებით?
_ კარგი იქნება, მედიას თვითონ ჟურნალისტები ფლობდეთ. არავისზე იყოთ დამოკიდებული, იყოთ თავისუფლები და ფინანსდებოდეთ იმ საწარმოებისგან, რომელსაც თქვენგან კომერციული მოგება არ აინტერესებთ. მედია ბუნებრივად ემორჩილება იმას, ვისგანაც იღებს დაფინანსებას.
_ დამეთანხმებით, ალბათ, ეს არა მხოლოდ საქართველოს, არამედ მთელი მსოფლიო მედიის პრობლემაა. გამოცემა, ზოგადად, ვისგანაც იღებს დაფინანსებას, მის ინტერესს ატარებს. საფრანგეთში, მაგალითად, მედია ყოველთვის არის მხარე. მემარჯვენეების, ან კიდევ მემარცხენეების იდეას ატარებს თავის საქმიანობაში, მაგრამ ამას არგუმენტების მოხმობით აკეთებს.
_ გეთანხმებით. ესეც გლობალიზაციის ნაწილია.
_ საქართველო პატარა ქვეყანაა, რა უნდა ვქნათ, რომ გლობალიზაციის პროცესში არ ავითქვიფოთ სხვებში და არ დავკარგოთ ჩვენი ეროვნული იდენტობა?
_ ჩვენ არ უნდა დავემორჩილოთ იმპერიალიზმის მიზნებს. ჩვენ უნდა ვიყოთ ინტერნაციონალისტები კარგი გაგებით. საქართველოს კულტურაში არის ძალიან ბევრი მაგარი რამე. ჩვენნაირი მრავალხმიანი მუსიკა ბევრს არა აქვს. მრავალხმიანობა გვაქვს არა მხოლოდ მუსიკაში, არამედ ცხოვრებაშიც. აი, მაგალითად ყველანი ერთად ვლაპარაკობთ. ეს ცუდი კი არ არის. ეს იმას ნიშნავს, რომ ჩვენ არ გვიყვარს ბელადები. ქართველი ბელადი იხარებს უცხოეთში. საქართველოში ვერ იხარებს. რუსეთში მაგალითად – სტალინი, თურქეთში-ერდოღანი. ქართველები მრავალეროვანი და მრავალხმიანი ერი ვართ. ჩვენ ეს უნდა გავიტანოთ და ვაჩვენოთ მსოფლიოს. ჩვენი კულტურით უნდა დავიმკვიდროთ თავი დანარჩენ ერებს შორის.
