კანონპროექტით “პოლიციის შესახებ“ რეგულირდება პოლიციის საქმიანობის ძირითადი პრინციპები, მისი ფუნქციები და უფლებამოსილებანი, პოლიციურ და იძულებით ღონისძიებებთან დაკავშირებული საკითხები, ასევე პოლიციელის სამართლებრივი და სოციალური დაცვის, პოლიციის დაფინანსების, მატერიალურ-ტექნიკური უზრუნველყოფისა და პოლიციის კონტროლის საკითხები. პარლამენტის პრესსამსახურის ინფორმაციით, კანონპროექტი სხდომზე შინაგან საქმეთა მინისტრის მოადგილემ, ლევან იზორიამ წარმოადგინა. მისი განცხადებით, კანონპროექტი მრავალი მიმართულებით რადიკალურად განსხვავადება მოქმედი “პოლიციის შესახებ” კანონისგან, თუმცა განსაკუთრებულად მნიშვნელოვანია რამდენიმე კონცეპტუალური სიახლე, კერძოდ: გამიჯნულია პოლიციის პრევენციული და სამართალდარღვევაზე რეაგირების ფუნქციები; განმარტებულია ბუნდოვანი ტერმინები; კანონპროექტში ცალკე თავი აქვს დათმობილი პოლიციის საქმიანობის ძირითად პრინციპების და მოქმედი კანონისგან გასხვავებით, ცალკე თავად არის ჩამოყალიბებული პოლიციური ღონისძიებები. ლევან იზორიამ აღნიშნა, რომ პროექტზე მუშაობისას გაზიარებული იქნა რადენიმე ევროპული ქვეყნის, განსაკუთრებით გერმანიის საპოლიციო სისტემის თავისებურებანი, ისევე როგორც საერთაშორისო სტანდარტები, თუმცა მაქსიმალურადაა გათვალისწინებული საქართველოს სპეციფიკა.
_“პოლიციის რეფორმა ჩვენი ერთ-ერთი მთავარი პრიორიტეტია. აქამდე არსებული კანონი ერთგვარად საბჭოური გადმონაშთია. ის 1995 წელს მიიღეს და მას შემდეგ ძირეული ცვლილება კანონში არ შესულა. ახალი კანონპროექტის უპირატესობა ის არის, რომ მასში ზედმიწევნითაა გაწერილი პოლიციის ფუნქცია-მოვალეობები, დაზუსტებულია პოლიციის მოქმედების წესები, რაც ერთის მხრივ იმითაა კარგია, რომ პოლიციელმა იმოქმედოს ჩამოყალიბებული, კარგად გააზრებული წესების მიხედვით და მეორეს მხრივ, მოქალაქის უფლებები იყოს დაცული. საერთო ჯამში ეს ყველაფერი საზოგადოებრივი წესრიგის განმტკიცებას შეუწყობს ხელს“, _ განაცხადა თავდაცვისა და უშიშროების კომიტეტის თავმჯდომარემ ირაკლი სესიაშვილმა.
კომიტეტმა სხდომაზე ასევე პირველი მოსმენისთვის განიხილა საქართველოს მთავრობის მიერ საკანონმდებლო ინიციატივის წესით წარმოდგენილ კანონპროექტი “საქართველოს ადმინისტრაციულ სამართალდარღვევათა კოდექსში ცვლილების შეტანის შესახებ”.
კანონპროექტის ერთ-ერთი მნიშვნელოვანი სიახლე მდგომარეობს იმაში, რომ სატრანზიტო გადამზიდავებს სატრანსპორტო საშუალებების ტექნიკური მოწყობილობით – ე.წ. ტაქოგრაფებით აღჭურვა მოუწევთ. ტაქოგრაფი აფიქსირებს რამდენი კილომეტრი გაიარა მანქანამ, რა დროის განმავლობაში მოძრაობდა ის და დროის რა ინტერვალი ჰქონდა მძღოლს შესვენებისთვის.
შინაგან საქმეთა მინისტრის მოადგილის, ლევან იზორიას განცხადებით, იმის გამო, რომ დღეს ასეთი კონტროლი არ ხორციელდება, ხშირ შემთხვევაში, სატრანზიტო გადაზიდვების განმახორციელებელი მძღოლები სხვა მძოლებისთვის საფრთხეს ქმნიან.
_ “ეს არის საერთაშორისო მოთხოვნა, რომლის არგანხორციელების შემთხვევაში საქართველოში დარეგისტრირებული გადამზიდავი ავტოსატრანსპორტო საშუალება ევროპის ქვეყნებში ვეღარ იმოძრავებს. ასეთი ვალდებულება მთავრობამ განკარგულებით, მარტის თვეში აიღო და წლის ბოლომდე უნდა შევასრულოთ. საქართველო ტრანზიტული ქვეყანაა. გაედინება სხვადასხვა ქვეყნიდან შემოსული ტვირთი. ტვირთი გააქვთ ქართულ კომპანიებს. სატრანზიტო ავტომობილების ტაქოგრაფებით აღჭურვა ნიშნავს იმას, რომ ერთი – კომპანიამ უნდა იზრუნოს, რომ მათ ავტოსატრანსპორტო საშუალებას ასეთი ტექნიკური საშუალება ჰქონდეს და მეორე, თითოეული პატრული უნდა აღიჭურვოს ტექნიკული საშუალებით, რომლის მეშვეობით მონაცემებს ტაქოგრაფებში წაიკითხავს” _ განაცხადა ლევან იზორიამ.
კანონპროექტით, აღნიშნული წესის დარღვევისათვის მძღოლი დაჯარიმდება 500 ლარით, ხოლო კომპანია, რომელსაც ავტოსატრანსპორტო საშუალება ეკუთვნის 5000 ლარის ოდენობით დაჯარიმდება.
კანონპროექტის თანახმად, სამსახურებრივი მოვალეობის შესრულების დროს სამართალდამცავი ორგანოს თანამშრომლის, სამხედრო მოსამსახურის, სახელმწიფო დაცვის სპეციალური სამსახურის თანამშრომლის ან აღსრულების პოლიციელის კანონიერი განკარგულებისადმი ან მოთხოვნისადმი ბოროტად დაუმორჩილებლობა, ასევე მათი სიტყვიერი შეურაცხყოფა ან მათ მიმართ შეურაცხმყოფელი ქმედების განხორციელება (გარდა ფიზიკური შეურაცხყოფისა), გამოიწვევს დაჯარიმებას 2000 ლარის ოდენობით ან ადმინისტრაციულ პატიმრობას 15 დღემდე ვადით.
ცვლილებების მიხედვით, საზოგადოებრივ ადგილებში ალკოჰოლური სასმელის მიღება, ამავე ადგილას ადამიანის ღირსების და საზოგადოებრივი ზნეობის შეურაცხმყოფელ მდგომარეობაში ყოფნა 300 ლარით დაჯარიმებას გამოიწვევს. აღნიშნული ქმედების წლის განმავლობაში განმეორებით ჩადენა 500-ლარიანი ჯარიმის დაკისრებით დაისჯება, ხოლო მესამე შემთხვევაში გამოიწვევს პირის დაჯარიმებას 700 ლარის ოდენობით.
“ადმინისტრაციულ სამართალდარღვევათა კოდექსში” შესატანი ცვლილებების პროექტის თანახმად, სატრანსპორტო საშუალების ნასვამ მდგომარეობაში მართვის შემთხვევაში, მძღოლს 200 ლარით დაჯარიმების ნაცვლად, ერთი წლის ვადით მართვის უფლებას ჩამოართმევენ. თუ აღნიშნულ დარღვევას ჩაიდენს 18 წლის ასაკს მიუღწეველი მართვის უფლების მქონე პირი, მას მართვის უფლება ორი წლის ვადით ჩამოერთმევა, ნაცვლად ერთი წლისა.
თავდაცვისა და უშიშროების კომიტეტმა მხარი დაუჭირა განხილული კანონპროექტების პლენარულ სხდომაზე გატანას.
