ერთ-ერთის საქმეს უკვე პროკურატურა იძიებს. რაც შეეხება ა(ა)იპ კულტურის ცენტრს, მისმა ხელმძღვანელმა სოფიკო ჭელიძემ პირადი განცხადების საფუძველზე თანამდებობა დატოვა. თუმცა, როგორც აუდიტის დასკვნა გვიჩვენებს, ამ სამსახურში საკმაოდ დიდი დარღვევებია აღმოჩენილი.
სოფიკო ჭელიძემ განცხადებასთან ერთად წარადგინა ახსნა განმარტებითი ბარათი, რომელიც ჩვენს მასალას თან ერთვის.
საკრებულოს თავმჯდომარე ამირან გიგინეიშვილი: “სამინისტროდან მოვიდა დავალება, რომ კულტურის ცენტრში შესულიყო აუდიტის სამსახური. ამის შემდეგ, ჩემი ბრძანებით, იქ შევიდა აუდიტის სამსახური. სამინისტროდან მოსულ დავალებას თან ახლდა ერთ-ერთი მოქალაქის საჩივარი, რომლის ვინაობას ვერ დავასახელებ, რადგან ის არ არის საჯარო ინფორმაცია. წერილს ხელს კულტურის მინისტრის მოადგილე მანანა ბერიკაშვილი აწერდა,” _ გვითხრა საკრებულოს თავმჯდომარემ.
ამის შემდეგ გამგეობის აუდიტის სამსახურმა მოახდინა კულტურის ცენტრის შემოწმება და დაიდო დასკვნა, სადაც წერია, რომ ბევრ საკითხებში არის შეუსაბამობა.
სულ ცოტა ხნის წინ, ლანჩხუთს კულტურის და ძეგლთა დაცვის მინისტრი გურამ ოდიშარია სტუმრობდა და როგორც ჩვენი წყარო ამბობს, მან ჩამოიტანა წერილი, რომლის ავტორი ისევ ქალბატონი ბერიკაშვილია. წერილის შინაარსი ამჯერად ასეთია: “საქართველოს კულტურისა და ძეგლთა დაცვის სამინისტრო გაეცნო ლანჩხუთის მუნიციპალიტეტის კულტურის ცენტრის დირექტორის სოფიო ჭელიძის წერილს, რომელიც ეხება კულტურის ცენტრის საქმიანობას დირექტორის თანამდებობაზე მისი მუშაობის პერიოდში. სამინისტრო დადებითად აფასებს კულტურის ცენტრის მუშაობას, იმ კულტურული ღონისძიებებისა და პროექტების გახორციელებას, რაც ხელს შეუწყობს ლანჩხუთის მუნიციპალიტეტში კულტურული ცხოვრების გამოცოცხლებასა და განვითარებას,” _ ეს წერილი 10 ივლისს მოვიდა ლანჩხუთში.
ამჯერად გთავაზობთ აუდიტის დასკვნას კულტურის ცენტში გაწეული მუშაობის შესახებ: “ლანჩხუთის მუნიციპალიტეტის საკრებულოს თავმჯდომარის 2013 წლის 5 ივლისს #135 ბრძანების საფუძველზე ლანჩხუთის მუნიციპალიტეტის გამგეობის შიდა აუდიტის სამსახურის მიერ ა(ა)იპ “ლანჩხუთის კულტურის ცენტრი” ჩატარებული იქნა შიდა აუდიტორული შემოწმება. ჩატარებული აუდიტის შედეგად აღმოჩენილ იქნა სხვადასხვა სახის დარღვევები, კერძოდ: 2012 წლის 5 ივლისს, ლანჩხუთის მუნიციპალიტეტის ყოფილ მოადგილეს, გიორგი გოგუაძესა და ა(ა)იპ კულტურის ცენტრის ხელმძღვანელს სოფიკო ჭელიძის ხელმოწერით შედგენილ იქნა მატერიალურ ფასეულობათა მიღება-ჩაბარების აქტი. მიუხედავად ამისა, ქონება, საერთო ღირებულებით 141 702 ლარი, არ იქნა აყვანილი ბალანსზე. შემოწმების პერიოდში ჩატარებული იქნა ადგილზე არსებული ქონების ინვენტარიზაცია და რეალური სურათი შედარებული იქნა ზემოაღნიშნულ ინვენტარიზაციის მასალებთან, რა დროსაც გამოვლინდა მატერიალურ ფასეულობათა დანაკლისი, კერძოდ 20 ცალი ჩოხის, ერთეულის ფასი 250 ლარი, ჯამში 5 000 ლარი; აზიური ჩექმა, 20 ცალი, თითოეულის ფასი 82.60 ლარი, ჯამში 1 652 ლარი. ორთავე დასახელების ფორმის დანაკლისმა შეადგინა 6 652 ლარი.
საგულისხმოა ის ფაქტიც, რომ მატერიალურ ფასეულობათა აღრიცხვა ამჟამადაც მოუწესრიგებელია, არ არის აღრიცხული ცეკვის ფორმები _ 11 820 ლარის ღირებულების, აუდიო დისკები _ 3 500 ლარის ღირებულების, სულ 34 478 ლარის მატერიალური ფასეულობა.
შემოწმების პერიოდში კულტურის ცენტრის თანამშრომელთა ჯგუფის მიერ დაისვა ცენტრის შენობის უკანა მხარეს არსებული წყლის რეზერვუარის გასხვისების კანონიერების საკითხი. გაირკვა, რომ ზემოაღნიშნული წყლის 3 ცალი რეზერვუარი შავი მეტალისგან დამზადებული სხვადასხვა ტევადობის, რომელიც არ ირიცხება ცენტრის ბალანსზე, სავარაუდოდ 2010 წელს ჩაბარდა დირექციის მიერ ჯართის მიმღებ პუნქტს. რა რა ოდენობის თანხა იქნა მიღებული და რას მოხმარდა, ვერ დადგინდა.
დარღვევებია ასევე სატრანსპორტო მომსახურების საქმეში, კერძოდ: საწვავის ჩამოწერისა და ტრანსპორტით მომსახურების ანაზღაურების საქმეში, მაგალითად 2010 წელში “კულტურის ცენტრის” დირექტორის სოფიკო ჭელიძის კუთვნილი ავტომანქანით, რომელიც “კულტურის ცენტრის” მიერ იჯარით იყო აყვანილი, გარბენილია 13 374 კმ. რომელზეც დაწერილია 1 077 ლიტრი საწვავი, 2 078 ლარის ღირებულების, ისე, რომ საგზაო ფურცელში არ არის აღნიშნული მგზავრობის მიზნობრიობა. ხშირია შემთხვევა, როცა ხელოვნურად ხდება მიმოსვლის მანძილის გაზრდა და შემდეგ მისი არარეალურად ანაზღაურება. მაგალითად: 2008 წლის 23 ივლისს № 18 სასაქონლო ზედნადებით (ლაჩხუთი-მამათი, მამათი-ლანჩხუთის) მიმოსვლის გზაზე ნაჩვენებია 130 კმ. მაშინ როცა აღნიშნული მარშრუტი 32 კმ-ია. ე. ი. ნაჩვენებია 98 კმ-ით მეტი.
2009 წელში ადგილი ჰქონდა საბიუჯეტო თანხის, საერთო ჯამში 6 000 ლარის არამიზნობრივ ხარჯვას. კერძოდ: 2009 წლის 20 აგვისტოს ფონდ “ბარბარეს” პრეზიდენტ სერგო ირემაშვილსა და სოფიკო ჭელიძეს შორის გაფორმდა ხელშეკრულება, რომლის თანახმად, იმავე წელს, 22 აგვისტოს ფონდი ჩაატარებდა საქველმოქმედო კონცერტს, ხოლო ” კულტურის ცენტრი” დაუთმობდა მას შენობას და გადაურიცხავდა 3 000 ლარს.
მეორე ხელშეკრულება, იმავე შინაარსით, დაიდო 2009 წლის 12 ნოემბერს “ფოცხიშვილი კონცერტი კომპანიას” დირექტორი გელა ფოცხიშვილთან, რომ იმავე წლის 23 ნოემბერს ის ჩაატარებდა საქველმოქმედო კონცერტს და კულტურის ცენტრი მასაც გადაურიცხავდა 3 000 ლარს. ორივე შემთხვევაში თანხა ჩარიცხულ იქნა არამიზნობრივად.
გამოვლინდა შრომითი ხელშეკრულების უკანონო მოშლისა და აღნიშნულის საფუძველზე თანხის არამიზნობრივად გამოყენების ფაქტი. კერძოდ: ბრძანებაში შრომითი ხელშეკრულების მოშლის შესახებ საფუძვლად მითითებულია შრომის კოდექსის 37-38 მუხლები. აღნიშნულ მუხლებს გააჩნიათ _ პირველს 9 პუნქტი, მეორეს _ 4, არც ერთ ბრძანებაში ქვეპუნქტებზე მინიშნება არ არის, ასეთი ბრძანების საფუძველზე შეუწყდა 73 თანამშრომელს ანაზღაურება.
სახელფასო თანხა _ 9 469 ლარი, გადატანილ იქნა ოფისის ხარჯებში, რომელიც შემდგომში გამოყენებულ იქნა სხვადასხვა დაუგეგმავი ღონისძიებების დაფინანსებაში. მათ შორის, 2 250 ლარი გადაეცა შპს “დელუქსს” სტუმრების მიღებაში. ამავე სახის დარღვევებია აღმოჩენილი წინა წლებში, კერძოდ: 2010 წლის შემოსულობებისა, გადასახდელების, შესრულების ანგარიში, რომელიც წარმოდგენილია საფინანსო განყოფილებაში, ხელფასის სახით განაცემი შეადგენს 170 315 ლარს, მაშინ როდესაც საგადასახადო ინსპექციაში წარდგენილი დეკლარაციით 2010 წელს დარიცხული ხელფასი ნაჩვენებია 168 897 ლარი, ანუ 1 418 ლარით ნაკლები. ანგარიშში საერთოდ არ არის ნაჩვენები 13 650 ლარი _ სტუმრების მიღებაზე გაწეული წარმომადგენლობითი ხარჯი, არც 29 685 ლარის არაფინანსური აქტივები (სხვადასხვა ძირითადი საშუალებების შეძენა არის ნაჩვენები. ყველა ხარჯი ოფისის ხარჯში არის ნაჩვენები.
2010 წელს ხელშეკრულების დარღვევით იქნა გაშვებული თანამშრომელთა უმრავლესობა უფასო შვებულებაში, რის ხარჯზეც მოხდა აღნიშნული ოპერაციების გახორციელება. 2011 წლის ანგარიშში ხელფასის სახით გაცემული არის 201 758 ლარი, როდესაც საგადასახადო ინსპექციაში წარდგენილი დეკლარაციებით მხოლოდ 199 740 ლარს შეადგენს _ 2 018 ლარის გაცემა ზედმეტად არის ნაჩვენები. არც აქ არის ნაჩვენები სხვადასხვა სტუმრის მიღებაზე გაწეული ხარჯი _ 13 645 ლარი, რომელიც ოფისის ხარჯებში არის ნაჩვენები.
ხელფასების გაცემისას ადგილი აქვს ხელზე მისაღები თანხების არასწორ ჩარიცხვას თანამშრომელთა ანგარიშზე. სერიოზული ნაკლოვანებებია ფიზიკურ პირზე საშემოსავლო გადასახადის დაკავებისა და ბიუჯეტთან ანგარიშსწორების საქმეში.”
აუდიტის ამ დასკვნის დადების შემდეგ, სოფო ჭელიძემ მალევე დატოვა თანამდებობა, დაწერა განცხადება, რასაც მოაყოლა ახსნა-განმარტებითი ბარათი, რომელსაც შემოკლებით გთავაზობთ:
“ახსნა განმარტება პირველი: როგორც აღნიშნავთ, მიღება-ჩაბარების აქტი ლანჩხუთის “კულტურის ცენტრსა” და გია გოგუაძეს შორის შედგა, მაგრამ უნდა აღინიშნოს, რომ დანართში მითითებული მატერიალური ფასეულობების ღირებულებები არარეალურია, რადგან მათი შეძენა მოხდა დაახლოებით 70-იან წლებში და მათი უდიდესი ნაწილი ამორტიზირებულია და ექსპლოატაციას არ ექვემდებარება. საჭიროა დამოუკიდებელი აუდიტის მოწვევა რეალური ღირებულების დადგენის მიზნით.
ახსნა განმარტება მეორე: მატერიალური ფასეულობების აყვანა შესაძლებელია მიმდინარე საანგარიშო წელს, საწყისი ღირებულების აღდგენით და შესაბამისი ბუღალტრული გატარების შემდეგ.
ახსნა განმარტება მესამე: რაც შეეხება კულტურის სახლის უკან არსებულ ორ კოროზირებულ მცირე ზომის რკინის რეზერვუარს, გაცნობებთ, რომ აღნიშნული რეზერვუარი არ ირიცხება კულტურის ცენტრის ბალანსზე, რადგან გადმოცემა მიღება- ჩაბარების აქტი არ გახორციელებულა. აღნიშნული რეზერვუარი იყო ამორტიზირებული, კოროზირებული და იქმნებოდა საფრთხე იმისა, რომ შეიძლება მომხდარიყო უბედური შემთხვევა. აღნიშნულიდან გამომდინარე, კულტურის ცენტრის ეზოს დასუფთავების დროს მოხდა მისი დემონტაჟი.
ახსნა განმარტება მეოთხე: რაც შეეხება საწვავის ხარჯვას, საგზაო ფურცლებში მითითებულია თარიღი, მარშრუტი და გავლილი მანძილი. აქვე განგიმარტავთ, რომ საგზაო ფურცლების შევსება ხდებოდა ელექტრონულად, რის გამოც ტექნიკური პრობლემების გამო ამობეჭდილი 2010 წლის ხელმოუწერელი საგზაო ფურცლები, რომლებიც აუდიტის მიერ იქნა აღმოჩენილი შესაცვლელია დასრულებული (ხელმოწერილი) ფურცლებით.
ახსნა განმარტება მეხუთე: რაც შეეხება საქველმოქმედო კონცერტებს, 2009 წლის 22 აგვისტოს ფონდი “ბარბარე ” და 23 ნოემბერს შპს “ფოცხიშვილი კონცერტ კომპანიის” აღნიშნული ღონისძიებებისთვის მიეცათ ანაზღაურება 3 000-3 000 ლარის ოდენობით, შესაბამისად ხელშეკრულებისა.”
სტატია მომზადებულია ფონდის “ღია საზოგადოება _ საქართველოს” მიერ დაფინანსებული პროექტის _ “დათვალე საკუთარი ფული!”, ფარგლებში და მასში გამოთქმული მოსაზრება არ გამოხატავს ფონდის პოზიციას.
