22 ივლისს, მის ადგილზე ლანჩხუთის თეატრის რეჟისორი გია ქურიძე ოფიციალურად დაინიშნა. ახალი ხელმძღვანელი თანამშრომლებს საკრებულოს თავმჯდომარემ, ამირან გიგინეიშვილმა წარუდგინა. ახალი ხელმძღვანელის წარდგენას გამგებლის მოვალეობის შემსრულებლის მოადგილე ვახტანგ ზენაიშვილიც ესწრებოდა.
როგორც საკრებულოს თავმჯდომარემ თქვა, ქურიძე თანამდებობაზე საცდელი ვადით _ ერთი თვით ინიშნება. თავად ქურიძის თქმით არ იგეგმება არანაირი ძირეული საკადრო ცვლილებები _ მოხდება მხოლოდ შიდა გადაადგილება.
ამირან გიგინეიშვილი: “მოგახსენებთ, რომ სოფიკო ჭელიძემ პოსტი პირადი განცხადების საფუძველზე დატოვა. ჭელიძის შემოქმედებით საქმიანობას მე ძალიან ვაფასებ, მაგრამ იყო ფინანსური საკითხები, რის გამოც მან გადაწყვიტა ასე მოქცეულიყო.
ჩვენთან შემოსული იყო ამ თანამდებობის ორი მსურველის განცხადება _ გია ქურიძის და ლოლიტა ურუშაძის. ქალბატონ ლოლიტას, ჩემთვის სამწუხაროდ, არ ვიცნობ, თუმცა, როდესაც ორივე მათგანის ბიოგრაფია განვიხილეთ, აღმოჩნდა, რომ ურუშაძეს ამ სფეროსთან შეხება არ ჰქონია, აქედან გამომდინარე, დაგვრჩა ბატონი გია ქურიძის კანდიდატურა. ჩვენ ბატონ გიასთან ვისაუბრეთ, როგორ უნდა მოხდეს ფინანსური პრობლემების გამოსწორება. ისეთ კოლექტივთან, როგორიც თქვენ ხართ, მას უნდა ჰქონდეს არა მხოლოდ მენეჯერული, არამედ ადამიანური ურთიერთობა. გია დაინიშნა საცდელი ვადით _ ერთი თვით. შევხედავთ, რას გააკეთებს და ამის შემდეგ გადავწყვიტოთ, შეძლებთ თუ არა ერთად მუშაობას,” _ თქვა ამირან გიგინეიშვილმა.
გია ქურიძე: “ჩემი წარდგენა არ გჭირდებათ _ გვიმუშავია ერთად და ყველა მიცნობთ. უბრალოდ მინდა მოგმართოთ _ არანაირ საკადრო ცვლილებებსა და ვინმესთან ანგარიშსწორებას არ ვაპირებ, საკუთარ თავზე მაქვს ეს ყველაფერი გამოცდილი და ნამდვილად არ მსურს განმეორდეს. უბრალოდ, წინასწარ გაფრთხილებთ _ სამსახურის შიგნით აუცილებლად იქნება გადაადგილებები ისე, რომ სახელფასო სხვაობა გათანაბრდეს _ ერთ-ერთი თანამშრომელი მთელი დღე ორ საჟენს შეშას ჩეხდეს და მას 80 ლარი ჰქონოდეს ხელფასი, ყავისა და მზესუმზირას ჭამაში მეორე თანამშრომელს კი ბევრად მეტი, არ გამოვა _ ამაზე ჩვენ ერთად შევთანხმდეთ. ვაპირებ სამხატვრო საბჭოს შეკრებას, რომელიც აუცილებლად განიხილავს ყველა სცენარს და ერთ კაცზე არ იქნება ჩამოკიდებული სცენარის დამტკიცება, გატანა და პასუხისმგებლობა. ვაპირებ შევქმნა 5-კაციანი სამხატვრო საბჭო, რომელიც თავისთავად აიღებს პასუხისმგებლობას ღონისძიებაზე და საჯაროს გახდის ფინანსების გამჭვირვალობას. გასასწორებელი ძალიან ბევრია. აუდიტის სამსახური, საგადასახადო სამსახური, კერძო შესაბამისი სტრუქტურები დაგვეხმარებიან ამ საკითხში.
რაც შეეხება ჩვენს შემდგომ ურთიერთობას, ეს კულტურის სფეროა და არ არის იმის აუცილებლობა, რომ ვინმემ ვინმეს რამე გაუვრცელოს, დააბეზღოს და ა.შ. საქმეში შეიძლება ვიყო ფიცხი, მაგრამ სცენას ეს უხდება _ ეს არის საქმე, რომელიც გაფრენას გპატიობს და თუ არ გააფრინე , მაშინ შენი ადგილი აქ არ არის. ამიტომ, ვისაც მორალური უფლება არ აქვს კულტურის სფეროში იმუშაოს, თვითონ გამოიტანოს საკუთარი თავის განაჩენი _ მე არავის არ ვეხები. მინდა ვიმუშაოთ ერთად, ერთი რაიონის შვილები ვართ, არ მაქვს იმის დრო, უკან დავიხიო _ რაც მაქვს მოსასწრები, უნდა მოვასწრო. ძალიან გთხოვთ ამყევით ამაში და ნუ გავფლანგავთ ძვირფას წუთებს ერთმანეთის ძირის თხრაში. დავკავდეთ მხოლოდ და მხოლოდ საქმით,” _ უთხრა თანამშრომლებს ახალმა ხელმძღვანელმა.
ვახტანგ ზენაიშვილი: “ბევრი მითქმა-მოთქმაა აუდიტის დასკვნასთან დაკავშირებით. ერთია შემოქმედება და მეორე _ საკმაოდ ტრივიალური საკითხი _ ფინანსებს და არასწორად მართვა. მე ვფიქრობ, რომ ბატონი გია ამ საქმის კარგი მცოდნე და ძალიან ნიჭიერი კაცია. ჩემი ოცნებაა, რომ ლანჩხუთში იყოს თეატრი და მუშაობდეს ისე, როგორც მუშაობდა თავის დროზე. ასევე, მინდა მაყურებელიც იყოს _ მას ჰქონდეს საშუალება, რომ ბილეთი შეიძინოს და და ასევე სურვილი, რომ თეატრს უყუროს. როგორც გიამ თქვა, თუ შეწყობილად იმუშავებთ და შემოქმედებითად დამუხტულები იქნებით, ყველაფერი გამოვა.”
