დასკვნის მიხედვით შს სამინისტროში მილიონობით ლარი ბროლის საკიდზე და ფუფუნების სხვადასხვა საგნების შესყიდვაზე იფლანგებოდა. ამ მხრივ განსაკუთრებით პრეტენზიული ვანო მერაბიშვილის მოადგილე ამირან მესხელი ყოფილა, რომელმაც კაბინეტში რამდენიმე ათას ლარად ღირებული ბროლის საკიდი ჩამოკიდა.
2011 წლის 16 თებერვალს შპს “ნიუ იტალმობილთან” გამარტივებული შესყიდვის საშუალებით დაიდო ხელშეკრულება ერთი ცალი, იტალიური წარმოების ტანსაცმლის საკიდის (H-180 სმ ბროლი, ალუმინის საკიდი) შესყიდვის შესახებ. საკიდი, რომლის ღირებულება 4,750.0 ლარს შეადგენდა, მინისტრის მოადგილის მესხელის მისაღებში განთავსდა.
2011 წლის 4 თებერვალს ა. მესხელის თანაშემწის პატაკის საფუძველზე ი/მ “ფოტინე ნემსაძესთან” გამარტივებული შესყიდვის საშუალებით დაიდო ხელშეკრულება ორი ცალი იტალიური კედლის საათის (Diamantini&Domeniconi) შესყიდვის მიზნით. აღნიშნული ნივთები, რომელთა ღირებულებაც ჯამში შეადგენდა 2,466.0 ლარს (ერთი მათგანის ფასია 1 978 ლარი, მეორესი კი 488 ლარი), ასევე მესხელის მისაღებში განთავსდა.
2005 წლიდან შს სამინისტროს ცენტრალურ საწყობში ინახებოდა ანტიკვარული საათი, რომლის ღირებულებაც 1 მლნ 810 ათასს შეადგენდა. თბილისში, 2012 წლის მაისში მომხდარი სტიქიური მოვლენების გამო საწყობი დაიტბორა, რის გამოც მინისტრის 2012 წლის 29 ივნისის ბრძანებით საათი ჩამოწერეს.
თბილისში მომხდარი წყალდიდობის შედეგად სამინისტროს რამდენიმე შენობა-ნაგებობა დაიტბორა, მათ შორის საწყობების ნაწილი და მათი მიმდებარე ტერიტორია. ზარალმა რამდენიმე მილიონი შეადგინა.
მინისტრის 2012 წლის 14 მაისის ბრძანების საფუძველზე კომისია შეიქმნა, რომელსაც მიყენებული ზარალის ოდენობის დადგენა დაევალა. კომისიის 2012 წლის 1 ივნისის ოქმის მიხედვით, სამინისტროსათვის მიყენებულმა ზარალმა 4,099.2 ათასი ლარი შეადგინა, საიდანაც 3,164.1 ათასი ლარი დაზიანებული და გამოუსადეგარი მატერიალური ფასეულობების ღირებულებაა, 935.1 ათასი ლარი კი აღდგენით სამუშაოებზე გაწეული და გასაწევი სავარაუდო ხარჯის ოდენობა. აღნიშნულის საფუძველზე გამოცემულია მინისტრის 2012 წლის 29 ივნისის N469 ბრძანება “დატბორილი მატერიალური ფასეულობების ჩამოწერისა და განადგურების შესახებ”, თუმცა, აუდიტის პერიოდის დასრულებამდე აღნიშნული ფასეულობები ჩამოწერილი და განადგურებული ჯერ არ იყო.
“დატბორილი მატერიალური ფასეულობების შესახებ შესაბამისი კომისიის მიერ შედგენილი აქტების ანალიზით დადგინდა, რომ წლების მანძილზე სამინისტროს მიერ ხორციელდებოდა საბიუჯეტო სახსრების არარაციონალური ხარჯვა. კერძოდ, ხშირ შემთხვევაში შესყიდულია ისეთი დასახელების და რაოდენობის მატერიალური ფასეულობები, რომლებიც ან საერთოდ არ იყო საჭირო, ან საჭირო იყო გაცილებით ნაკლები ოდენობით. შედეგად, დატბორილ საწყობებში აღმოჩნდა საკმაოდ დიდი ხნის წინ შემოტანილი და გამოუყენებელი მატერიალური ფასეულობები, რომელთა ნაწილი დაზიანდა და ჩამოსაწერი გახდა. ყოველივე ეს, კი არასწორი მენეჯმენტის შედეგია,” _ ნათქვამია აუდიტის ანგარიშში.
2010 წელს შპს “აზრი”-სგან შს სამინისტრომ შეისყიდა 950 ცალი “წამკითხავ/ჩამწერი მოწყობილობა უკონტაქტო პლასტიკური ბარათისათვის”, საერთო ღირებულებით 135.85 ათასი ლარი (ერთეულის ფასი 143 ლარი). აღნიშნული მოწყობილობა საწყობში განთავსდა 2011 წლის 28 თებერვალს და 4 მარტს და 14 თვის შემდეგ, ანუ წყალდიდობის დროს 99%, ანუ 940 ცალი (91.5 ათასი ლარის ღირებულების) ჯერ კიდევ საწყობში ინახებოდა, საიდანაც 640 ცალი (91.5 ათასი ლარის ღირებულების) დაზიანდა და ჩამოიწერა.
შპს “CHINA GARMENTS CO”-საგან 2009 წლის 3 იანვრის N9 ხელშეკრულების საფუძველზე შესყიდულია 3 500 ცალი მამაკაცის მაჯის საათი, საერთო ღირებულებით 44.5 ათასი ლარი. აღნიშნულიდან, 35.7 ათასი ლარის ღირებულების 2 368 ცალი (67.7%) საათი, შესყიდვიდან სამწელიწადნახევრის შემდეგაც კი, ჯერ კიდევ საწყობში ინახებოდა წყალდიდობის დროს, საიდანაც 22.6 ათასი ლარის ღირებულების 1 500 ცალი საათი დაზიანდა და ჩამოიწერა.
შპს “ფოტო სამყარო”-საგან 2011 წლის 7 აპრილის ხელშეკრულების საფუძველზე შესყიდულია შსს-ს აღლუმის 500 ცალი ფოტოსურათი საერთო ღირებულებით 13.3 ათასი ლარი (ერთეულის ფასი 26.6 ლარი). აღნიშნული ფოტოსურათიდან მხოლოდ 58 ცალი გაიცა სხვადასხვა ქვედანაყოფებზე და წყალდიდობის დროს 442 ცალი (11.8 ათასი ლარის ღირებულების) ჯერ კიდევ საწყობში ინახებოდა.
შპს “ტექნოსერვისი”-საგან 2011 წლის 21 სექტემბერს ტენდერში გამარჯვების საფუძველზე შესყიდულია 457.5-ლარიანი კარტრიჯის 90 კომპლექტი, საერთო ღირებულებით 41.2 ათასი ლარი. აქედან, 2011 წლის ბოლომდე არც ერთი არ გაცემულა. 2012 წლის 5 თვეში კი გაცემულია მხოლოდ 10 კომპლექტი. წყალდიდობის დროს 36.6 ათასი ლარის ღირებულების 80 კომპლექტი ჯერ კიდევ საწყობში ინახებოდა და განადგურდა.
2010 წლის 30 სექტემბერს, სამინისტროს საწყობში შესულია 10.0 ათასი ლარის ღირებულების (ერთეულის ფასი 20 ლარი) 500 ცალი რუსულენოვანი წიგნი სახელწოდებით “პატარა ომი, რომელმაც შეძრა მსოფლიო”. წიგნები მოწოდებულია შპს “პარნასის” მიერ 2010 წლის 6 ივლისის ხელშეკრულების საფუძველზე და დატბორვამდე, ანუ თითქმის ორი წელიწადი ინახებოდა გამოუყენებლად. წარმოდგენილი აქტების მიხედვით დატბორვის შედეგად ყველა მათგანი დაზიანდა, ამიტომ ჩამოიწერა და განადგურდა.
2010 წლის 14 ივნისიდან სამინისტროს ცენტრალურ საწყობში ინახებოდა სამი ცალი ე.წ. “შეუფერხებელი ფრენის აბონემენტი”, ჯამური ღირებულებით 2.7 ათასი ლარი. 2012 წლის მაისში აღნიშნული საწყობის დატბორვამ გამოიწვია აბონემენტების დაზიანება, რის გამოც იგი ჩამოიწერა, განადგურდა და ეს თანხაც სხვა დაზიანებული ფასეულობების ღირებულებებთან ერთად მიეწერა სტიქიური მოვლენების მიერ მიყენებულ ზარალს.
“ამ საკითხისადმი ასეთი მიდგომა არასწორია, რადგან აღნიშნული აბონემენტები სამინისტრომ შპს “ეარ ბათუმისაგან” შეიძინა 2010 წლის 17 მაისს, როგორც “თბილისი-ბათუმი” და “ბათუმი-თბილისის” მიმართულებით 3-თვიანი (2010 წლის 1 ივნისიდან 1 სექტემბრამდე) შეუფერხებელი ფრენის დოკუმენტი. აქედან გამომდინარე, 2010 წლის 1 სექტემბრის შემდეგ ეს აბონემენტები უკვე არანაირ ფასეულობას აღარ წარმოადგენდნენ, იმავე წელს უნდა მომხდარიყო მათი ჩამოწერა. მიუხედავად ამისა, ისინი თითქმის წელიწადნახევრის მანძილზე ირიცხებოდნენ მატერიალურ მარაგებად, რის გამოც 2.7 ათასი ლარით არასწორად იყო გაზრდილი აქტივების ღირებულება და ამავე თანხით მექანიკურად გაიზარდა სტიქიური მოვლენების მიერ მიყენებული ზარალის ოდენობა.
აღსანიშნავია ის გარემოებაც, რომ ზემოხსენებული სამივე აბონემენტი სამინისტროს საწყობში შემოსულია 14 ივნისს და იქვე ინახებოდა გამოუყენებლად დატბორვამდე, რაც საბიუჯეტო სახსრების არაეკონომიური ხარჯვის კიდევ ერთი მაგალითია,” _ ნათქვამია აუდიტის ანგარიშში.
აუდიტორთა თქმით, რომლებმაც მხოლოდ მიმდინარე წლის შემოწმებით აღმოაჩინეს შს სამინისტროში არსებული დარღვევები, უწყების საწყობებში დაგროვილია გაუმართლებლად დიდი რაოდენობის და ღირებულების მატერიალური ფასეულობები, რომელთა დიდი ნაწილიც გამოუყენებლად ინახება თვეების და ზოგ შემთხვევაში წლების მანძილზეც.
მაგალითად, 2012 წლის 3 აპრილს შპს “ოლბერთან” გაფორმებული N276 ხელშეკრულებით შეძენილია 215.0 ათას ლარად ღირებული 4 300 ცალი მამაკაცის საგაზაფხულო-საშემოდგომო ქურთუკი, რომელიც საწყობში შეტანილია 29 მარტს და 2012 წლის ბოლომდე არც ერთი ცალი არ გაცემულა, 2013 წლის 1 აპრილამდე (29 მარტს) კი მხოლოდ 32 ცალი, ანუ 0.74%-ია გაცემული და 213.4 ათასი ლარის ღირებულების ქურთუკები უკვე წელიწადზე მეტია ინახება საწყობში.
