“სახელმწიფო შესყიდვების შესახებ” კანონის თანახმად, სატენდერო განცხადება გაზეთ “24 საათში” ქვეყნდება. პარლამენტის პრესსამსახურის ინფორმაციით, აღნიშნული ნორმის გაუქმებას ითვალისწინებს “საქართველოს პრესის ასოციაციის” მიერ მომზადებული საკანონმდებლო წინადადება, რომელიც კომიტეტის წევრებს აღმასრულებელმა დირექტორმა, ლაშა ტუღუშმა გააცნო.
_ “მოქმედი კანონი აწესებს ერთი გაზეთის პრივილეგიას. კანონში არსებული ეს ნორმა პირდაპირ ეწინააღმდეგება თავად კანონის სულისკვეთებას და მიზნებს, რაც კონკურენტული გარემოს ჩამოყალიბების ხელშეწყობაში მდგომარეობს”, – განაცხადა ლაშა ტუღუშმა. მისი მოსაზრებით, სამომავლოდ, ტენდერის საფუძველზე და შეჯიბრობითობის პრინციპის სრული დაცვით უნდა შეირჩეს ის ბეჭდური მედიასაშუალებები, სადაც ასეთი ტიპის მასალები გამოქვეყნდება.
კომიტეტის წევრებმა “საქართველოს პრესის ასოციაციის” მიერ მომზადებულ საკანონმდებლო წინადადებას, “24 საათის” მონოპოლიის გაუქმებასთან დაკავშირებით მხარი ერთხმად დაუჭირეს. როგორც სხდომაზე ითქვა, კომიტეტი აღნიშნულ საკითხთან დაკავშირებით საკანონმდებლო ინიციატივას მოამზადებს.
მსჯელობის საგანი გახდა ის, თუ რამდენად საჭიროა სატენდერო განცხადების ბეჭდურ მედიაში განთავსება და ამისთვის სახელმწიფოს ბიუჯეტიდან თანხების ხარჯვა.
_ “სახელმწიფო ბეჭდურ მედიას ფულს უხდის იმაში, რომ ტენდერებთან დაკავშირებით განცხადებები განათავსონ. თუკი ამაზე მოთხოვნა არსებობს, ბეჭდურმა მედიამ თავად უნდა გადაიხადოს ფული იმაში, რომ სატენდერო განცხადებები ექსკლუზიურად მიიღოს“ – განაცხადა ზურაბ ტყემალაძემ.
კონკურენციისა და სახელმწიფო შესყიდვების სააგენტოს საინფორმაციო ტექნოლოგიების დეპარტამენტის დირექტორმა, დავით მარღანიამ კითხვის ნიშნის ქვეშ დააყენა სატენდერო განცხადებების ბეჭდურ მედიაში განთავსების აუცილებლობა. მისი თქმით, სახელმწიფო შესყიდვები ელექტრონული გზით ხორციელდება. გარდა ამისა, როგორც დავით მარღანიამ აღნიშნა, სააგენტო დაინტერესებულ ბიზნეს-სექტორს, გამოცხადებულ შესყიდვებთან დაკავშირებით, დამატებით SMS-სერვისით უზრუნველყოფას ახდენს.
