აქედან გამომდინარე, ბატონი ჰამარბერგის მიერ გაკეთებული განცხადების ჭეშმარიტებასა და სარწმუნოობაში ეჭვის შეტანა შეუძლებელია. შესაბამისად, სრულად ვიზიარებ მის ამ პოზიციას.” _ აცხადებს საპარლამენტო უმრავლესობის წევრი, შალვა შავგულიძე “გურია ნიუსთან” საუბრისას.
წერილის უშუალო ადრესატი, ლაშა ნაცვლიშვილი იმ რეკომენდაციის შესახებ, რომელიც მას საქართველოში ევროკავშირის სპეციალურმა მრჩეველმა კონსტიტუციური რეფორმებისა და ადამიანის უფლებათა საკითხებში თომას ჰამარბერგმა ე.წ “ტრაქტორების საქმეზე” მიწერა, კომენტარს არ აკეთებს.
“დაკვირვებით შევისწავლე აღნიშნული დოკუმენტი და კვლავ არ ვარ დარწმუნებული, რომ ეს არის მტკიცებულებებით გამყარებული საქმე მათ წინააღმდეგ, ვინც ეჭვმიტანილად სცნეს.” _ წერს ჰამარბერგი ლაშა ნაცვლიშვილს.
თომას ჰამარბერგი ლაშა ნაცვლიშვილს წერს, რომ მისი წარმოდგენით სასწრაფოდ უნდა გათავისუფლდნენ ე.წ. “ტრაქტორების საქმეზე” პატიმრობაში მყოფი ადამიანები, რადგან არ არსებობს არანაირი საფუძველი მათი დაკავებისა და რომ იგი ეთანხმება ამერიკის სახელმწიფო დეპარტამენტის ანალოგიურ დასკვნას ამ საქმის თაობაზე.
შალვა შავგულიძე “გურია ნიუსთან” აცხადებს, რომ საქმეში კითხვის ნიშნები ნამდვილად არის.
“რაც შეეხება ჩემს სუბიექტურ მოსაზრებას ე. წ “ტრაქტორების საქმესთან” დაკავშირებით, მე დეტალური კომენტარისგან თავს შევიკავებ, რადგან ვარ კონკრეტული პოლიტიკური პარტიის წარმომადგენელი, პარლამენტის წევრი და არ მინდა ჩემი განცხადება თუნდაც მცირე ზემოქმედებად იქნას აღთქმული სასამართლოზე. როგორც ვიცი, სასამართლო განხილვა ორშაბათს იწყება.
_ ბატონო შალვა, აღნიშნული საქმე ფართო საზოგადოებრივი მსჯელობის თემად იქცა და ამასთან დაკავშირებით, სახალხო დამცველს პარლამენტშიც დაუსვეს კითხვები…
_ თავად ის ფაქტი, რომ ეს საქმე საზოგადოების ასეთი სერიოზული მსჯელობის საგანი გახდა, უკვე ბევრ რამეზე მეტყველებს. ჩვენ ვუსმენდით ძალიან კვალიფიციური ადვოკატების განცხადებებს, რომლებიც საუბრობდნენ ბრალდების მხარის არასაკმარის და უსაფუძვლო მტკიცებულებებზე, რაც ნამდვილად საყურადღებოა.
ის, რომ პროკურატურამ თვითონ დააყენა აღკვეთის ღონისძიების შეცვლის შუამდგომლობა და მათ უკვე მიმართეს სასამართლოს, რომ ორშაბათს, სასამართლო სხდომაზე იმ ორ ბრალდებულსაც შეეცვალოს აღკვეთის ღონისძიება, რომლებიც პატიმრობაში რჩებიან, უკვე საინტერესოა. ეს ალბათ მიანიშნებს იმაზე, რომ თავად ბრალდებაც არ არის იმდენად დასაბუთებული და რეალური. უფრო მეტის თქმისგან თავს შევიკავებ, რადგან ჩემი დღევანდელი სტატუსი არ მაძლევს ამის საშუალებას. მე მჯერა, რომ ამ საქმესთან დაკავშირებით სასამართლო იქნება ობიექტური და აქედან გამომდინარე შედეგიც ანალოგიური დადგება.
შემიძლია დავამატო ის რომ, პროკურატურის ქმედებები რომელიც მედიაში შუქდებოდა და მე ამ ყველაფერს თვალყურს ყურადღებით ვადევნებდი, აშკარად აჩენდა კითხვის ნიშნებს. მაგალითისთვის შემიძლია მოვიყვანო ის ფაქტი, თუ როგორ აიცილა ერთ-ერთმა ბრალდებულმა მამუკა ივანიაძემ ისეთი კვალიფიციური და გამოცდილი ადვოკატი, რომლის კომპეტენციაში ეჭვი არავის ეპარება. ეს ყველაფერი ძალიან წააგავდა ფოტორეპორტიორების საქმეს, სადაც ზუსტად ასეთივე ფორმით მოხდა ადვოკატის აცილება.
_ ანუ თქვენი აზრით ე.წ “ტრაქტორების” და “ფოტორეპორტიორების” საქმეში ერთნაირი მეთოდები იყო გამოყენებული?
_ ადვოკატის აცილების ეპიზოდს რაც შეეხება, ნამდვილად ვხედავ მსგავსებას. როგორ კი ამ ფაქტის შესახებ გავიგე “ფოტორეპორტიორების” საქმე გამახსენდა. ის სქემები რომელზეც შემდეგ ამახვილებდნენ ყურადღებას, თითქოს ეს ყველაფერი იყო კირვალიძის კლასელის და ნათესავის ჩვენება, სინამდვილეში არაფრის მთქმელია. ამ სქემების ჩვენებაზე ძალიან დიდი დრო დახარჯა გადაცემა “პოსტსკრიპტუმმა,” მაგრამ მინდა გითხრათ, რომ სამართლებრივად ეს არაფრის მომცემია. კარგად მახსოვს როგორ ასე სქემატურად ხატავდნენ ბადრი პატარკაციშვილის ბრალეულობას.
დიახ, ვხედავ მსგავსებას “ფოტორეპორტიორების” საქმესთან და ის კითხვის ნიშნები რაც ე.წ. “ტრაქტორების” საქმეს ახლდა, როგორც ჩანს ძალიან საინტერესო აღმოჩნდა ბატონი ჰამარბერგისთვისაც. ის ძალიან გამოცდილი სპეციალისტია და მისი კომპეტენციის შესაბამისი რეაგირება მოახდინა. მე ჩემი კომპეტენცია უფრო ვრცელი განცხადების გაკეთების საშუალებას არ მაძლევს, თუმცა გიდასტურებთ რომ ამ საქმეში კითხვის ნიშნები არის.
