როცა მე მინისტრად დავინიშნე, მე და პრემიერ-მინისტრმა ერთმანეთს მივეცით პირობა და ბატონი ბიძინასგან მივიღე დავალება, რომ ხარისხზე ზრუნვა იქნებოდა ჩვენი სამინიტროს საქმიანობის N1 ამოცანა და პრიორიტეტი.დავიწყეთ და ყველაფერი ჩავდეთ იმაში, რომ ხარისხი გაუჯობესებულიყო. ხშირად ვაფრთხილებდი კომპანიებს იმასთან დაკავშირებით, რომ შემოწმდებოდა ხარისხი.” _ აცხადებს რეგიონული განვითარებისა და ინფრასტრუქტურის მინისტრი დავით ნარმანია “გურია ნიუსთან.”
_ ბატონო დავით, უკვე 10 თვე გავიდა, რაც თქვენ ამ უწყებას ხელმძღვანელობთ. რას ფიქრობთ, რა გამოგივიდათ ამ ხნის მანძილზე ყველაზე უკეთესად და რა რჩება იმ პრობლემად, რის მოგვარებაც არც ისე მარტივი აღმოჩნდა?
_პირველ რიგში, გამოგვივიდა ის, რომ პროექტების განხორციელებისას წესრიგი დამყარდა. ყველა სამუშაოს, რომელსაც ვიწყებთ, ჯერ კარგად ვსწავლობთ, პროექტს ვამზადებთ და მხოლოდ ამის შემდეგ ვაკეთებთ საქმეს. სამართლებრივად მოგვარებული და მოწესრიგებულია პროცედურები, რაც ამ პროექტის გაკეთებას სჭირდება.
რაც ჯერჯერობით ბოლომდე ვერ მოვაწესრიგეთ, მაგრამ ძალიან აქტიურად ვმუშაობთ, ეს არის ინფრასტრუქტურული პროეტების ხარისხისხის შენარჩუნებასთან დაკავშირებული საკითხები. ამ კუთხითაც ბევრი რამ გავაკეთეთ. მაგალითისთვის შემიძლია მოგიყვანოთ ის, რომ დავავალეთ იმპორტირებული საგზაო ბიტუმის ხარისხის შემოწმების საკითხები მოწესრიგებული იყოს. გარდა ამისა, ერთწლიანი საგარანტიო პერიოდიდან ორწლიანზე გადავედით. მომავალი წლიდან სამწლიანი პეირიოდი იქნება. ინსტრუქციული ნაწილი მოვამზადეთ, სხვა ნაწილზე აქტიურად ვაგრძელებთ მუშაობას და ბოლომდეა მისაყვანი. ეს ის თემაა, რომელიც მეგონა მარტივად მოწესრიგდებოდა, თუმცა წინააღმდეგობები ბევრია.
მივაღწიეთ იმას, რომ სამსახურში თანამშრომლები ერთმანეთს პატივს ცემენ და კვალიფიციური ადამიანები არიან. ჩვენ გავიარეთ მენეჯმენტის კონკურსი. დეპარტამენტის უფროსები, მოადგილეები, სამმართველოს უფროსები შეიცვალა და 1 აგვისტოდან სამინისტრო ახალი შემადგენლობით შეუდგება მუშაობას. რითაც მე ყველაზე მეტად ვამაყობ, ის გახლავთ, რომ ჩვენ ვართ #1 გამჭირვალე სამინისტრო, სადაც არაფერი იმალება. ანუ ყველა შემოსულ განცხადებაზე რეაგირება ხდება და ყველა საჯარო ინფრმაცია გაიცემა. ყველა საჯარო შეხვედრა ქვეყნდება ვებგვერდის და ფეისბუქის მეშვეობით. შედარებით უფრო მნიშვნელოვანი შეხვედრები კი _ ტელევიზიით, რადიოთი და სხვა მასობრივი ინფორმაციის საშუალებებით შუქდება.
ასევე რაც ამ სამინისტროში არ კეთდებოდა და ჩვენ წესად ვაქციეთ, ეს არის საჯარო ანგარიშის ჩაბარება. პერიოდულად მედიას ვხვდებით და ვაბარებთ ანგარიშს. მედიას, არასამთავრობო და საერთაშორისო ორგანიზაციებს და მასობრივი ინფორმაციის საშუალებით ანგარიშს ვაბარებთ ხალხს.
