_ ბატონო დავით, თქვენ ინტენსიურად გიხდებათ პრემიერ-მინისტრთან ურთიერთობა. როდესაც თქვენს სამინისტროს ეხება საქმე, რა არის მისი პრიორიტეტები. რა უნდა ძალიან სწრაფად მოწესრიგდეს, კარგად გაკეთდეს და რა დავალებებს იღებთ მისგან?
_ კომუნიკაციის საშუალება ყოველკვირეულად გვაქვს მთავრობის სხდომებზე, როცა საქმე მოითხოვს, სატელეფონო არხების მეშვეობითაც გვაქვს ურთიერთობა. პერიოდულად ტარდება ეკონომიკური ბლოკის შეხვედრები და ზოგჯერ ცალკეული შეხვედრები პრემიერ-მინისტრთან. N1 საზრუნავი და მთავარი დავალება, კიდევ ერთხელ ხაზს ვუსვამ, ეს არის ინფრასტრუქტურის სამუშაოების ხარისხი. ეს არის თემა, რომელზეც ყველა შეხვედრის დროს საუბრობს და გვაძლევს დავალებებს არ მოვეშვათ ხარისხის დაცვასთან დაკავშირებულ საკითხებს. სხვა თემები არის ტენდერებთან და სამუშაოების ღიად ჩატარებასთან დაკავშირებით, ასევე რეგიონულ განვითარებასთან, თვითმმართველობის რეფორმასთან დაკავშირებული საკითხები. ეს არის ყველაზე ფართოდ გავრცელებული თემატიკა იმ საკითხებისა, რაზეც ჩვენ გვიხდება საუბარი.
_ თქვენს მიერ ჩატარებულ ტენდერებზე რამდენი საჩივარი შემოვიდა?
_ მოდის საჩივრები, ოღონდ ძალიან იშვიათად. რადგან სისტემა გავხადეთ ღია და გამჭვირვალე, საჩივრები პრაქტიკულად აღარ მოდის. არის 2-3 შემთხვევა. ერთ-ერთმა კომპანიამ მეორე კომპანიას უჩივლა ჩვენს მიერ გამოცხადებულ ტენდერთან დაკავშირებით. მოუგო და ის მეორე კომპანია ჩაენაცვლა სამუშაოებში. იყო გარკვეული კითხვა ერთ-ერთ ტენდერთან დაკავშირებით მაჟორიტარი დეპუტატის მხრიდან და შესაბამისი საჩივარი შესწავლის პროცესშია.
_რომელმა მაჟორიტარმა შემოიტანა საჩივარი, საიდუმლოა ეს ამბავი?
_ არა. საიდუმლო არ არის. ეს ამბავი ღია გახდება შესაბამის დროს. მაგრამ, მე შემიძლია ერთ კარგი მაგალითი მოვიყვანო. თბილისი-რუსთავის ავტომაგისტრალზე, როცა სატენდერო დოკუმენტაციის მიღება დასრულდა, იმავე დღეს, ყველა კომპანიის თანდასწრებით, ვისაც შემოტანილი ჰქონდა საბუთი, გავხსენით ეს სატენდერო დოკუმენტაცია. იქვე დასკანერდა, იქვე გამოჩნდა ეკრანზე, რომ ყველას ენახა ერთმანეთის მიერ შეთავაზებული ფასი. ყველა ინიშნავდა ამ ყველაფერს, რომ იქ ზედმეტი კითხვები არ გაჩენილიყო. წინა ხელისუფლების დროს, როცა მსგავსი ტენდერები იყო გამოცხადებული, ყოველთვის 2-3 კომპანია მონაწილეობდა. ჩვენთან მონაწილეობა მიიღო 14 კომპანიამ. თავიდან 22 კომპანიამ.
_ თბილისი- რუსთავის ავტომაგისტრალთან დაკავშირებით პრეტენზიები ჰქონდა დავით კირკიტაძეს და საკმაოდ მკვეთრ განცხადებებს აკეთებდა.
_ კი. შენიშვნები ჰქონდა კირკიტაძეს და აკეთებდა მკვეთრ განცხადებებს. თუმცა, ჩვენ ის დავადანაშაულეთ კანონმდებლობის დარღვევაში, მიკერძოებაში, სამსახურებრივი უფლებამოსილების ზედმეტად და ბოროტად გამოყენებაში. გარკვეული მასალები საგამოძიებო ორგანოებში ჩვენი მხრიდან გაგზავნილია და მათ საკმაოდ სერიოზული კითხვები აქვთ კირკიტაძესთან.
