ხატიაშვილი ამბობს, რომ რამდენიმე დღის წინ, წყალტუბოს შს სამმართველოში დაწინაურდნენ ის პოლიციელები, რომლებიც ევროპის ადამიანის უფლებათა სასამართლომ რევაზ დვალიშვილის წამებასა და არაადამიანურ მოპყრობაში დაადანაშაულა.
ხატიაშვილის თქმით, 2005 წლის 28 დეკემბერს, დვალიშვილი წყალტუბოს სამმართველოს თანამშრომლებმა მათ შორის, რევაზ ქობულიამ და მალხაზ მჟავიამ დააგდეს, ფეხებით შესდგნენ, ფეხით უჭყლეტდნენ ხელის თითებს, შემდეგ ფეხებით დაკიდეს ზემოდან ქვემოთ, დაასხეს “კოკა-კოლა” და მოსთხოვეს, რომ აელოკა.
დვალიშვილის საქმეზე სტრასბურგის სასამართლომ გადაწყვეტილება 2012 წლის 18 დეკემბერს გამოიტანა, რის შემდეგაც დაზარალებულმა ძალადობაში მხილებული პოლიციელების დასჯის მოთხოვნით მთავარ პროკურორს მიმართა. ამასობაში, შს მინისტრმა ღარიბაშვილმა ზემოხსენებული პოლიციელები დააწინაურა _ რევაზ ქობულია, რომელსაც დაზარალებული მთავარ მწამებლად ასახელებს, წყალტუბოს სამმართველოს უფროსი გახდა, ხოლო მალხაზ მჟავია _ გეგუთის ქვეგანყოფილების უფროსი.
ზაზა ხატიაშვილმა ამ საქმეს “გირგვლიანი 2” უწოდა და უფლებადამცველებს და მედიას მომხდარზე რეაგირება სთხოვა.
“როდესაც მიხეილ სააკაშვილი მოვიდა ხელისუფლებაში, მისი მმართველობის პირველ წელს არ ყოფილა შემთხვევა, რომ ადამიანის წამებაში და არაადამიანურ მოპყრობაში მხილებული ადამიანები დაწინაურებულიყვნენ _ ამას ადგილი აქვს დღევანდელი ხელისუფლების პირობებში. იმის ნაცვლად, რომ პოლიციის თანამშრომლები დაეკავებინათ და ისინი სისხლის სამართლებრივ პასუხისმგებლობაში მიცემულიყვნენ, დაწინაურდნენ. გახორციელდა იგივე, რაც თავის დროზე მოხდა სანდრო გირგვლიანის საქმესთან დაკავშირებით”, _ განაცხადა ზაზა ხატიაშვილმა.
რევაზ დვალიშვილის საქმე
2005 წლის 27 დეკემბერს, დაახლოებით 21.50 საათზე, რევაზ დვალიშვილი სამმა პოლიციელმა, წყალტუბოში, საზოგადოებრივი წესრიგის დარღვევისა და ტაქსის მძღოლისთვის ფიზიკური შეურაცხყოფის მიყენების ფაქტზე დააკავა. პოლიციის სამმართველოში მიყვანილმა ეჭვმიტანილმა თავი დამნაშავედ არ სცნო და დუმილის უფლება გამოიყენა.. ამოცნობის პროცედურა მაშინვე ჩატარდა და ტაქსის მძღოლმა თავდამსხმელში დვალიშვილი ამოიცნო . ამის შემდეგ, როგორც დვალიშვილი ყვება, სამმა პოლიციელმა დანაშაულის აღიარების მიზნით დაკავებული სასტიკად სცემა.
მეორე დღეს მას ბრალი წაუყენეს, ადვოკატის გარეშე დაკითხეს და ბრალიც აღიარებინეს, თუმცა, პოლიციაში მიღებული ტრავმების გამო დაკავებულისთვის სასწრაფო დახმარების გამოძახება გახდა საჭირო.
სასწრაფო დახმარების ექიმმა და ექთანმა, პროკურორის თანდასწრებით, ვიზუალურად შეამოწმეს ბრალდებული, შემდეგ კი შეადგინეს დასკვნა, რომელშიც აღნიშნული იყო, რომ მომჩივანს ჩალურჯებული ჰქონდა მარჯვენა თვალი, ცხვირზე კი ნაკაწრი ეტყობოდა. როდესაც დაზიანების მიზეზი ჰკითხეს, დვალიშვილმა თქვა, რომ წაიქცა, როდესაც დაკავების დროს, პოლიციელებისგან თავის დაღწევას ცდილობდა.
2005 წლის 29 დეკემბერს, წყალტუბოს რაიონულმა სასამართლომ დვალიშვილი გირაოს სანაცვლოდ გაათავისუფლა. მან აღიარებითი ჩვენება სასამართლოზეც გაიმეორა, რადგან პოლიციელები გათავისუფლებას დაპირდნენ. 30 დეკემბერს, ძლიერი თავის ტკივილების გამო, ქუთაისის საავადმყოფოში მოხვდა, სადაც განაცხადა, რომ რამდენიმე დღის წინ პოლიციელებმა სცემეს. სამედიცინო გამოკვლევის შემდეგ, დვალიშვილს დაუდგინდა თავის შიდა ტრავმა, ტვინის შერყევა და ქრონიკული გასტროდუოდენიტი. ჰემატომა ზომით 2×2.5 სმ შეიმჩნეოდა მარჯვენა თვალზე, აგრეთვე, მცირე სისხლჩაქცევები მარჯვენა ბარძაყზე, მარცხენა მხარსა და მარჯვენა ხელზე; მცირედი შეშუპებები აღინიშნებოდა მარჯვენა საფეთქლის მიდამოში და ქვედა ყბაზეც. დვალიშვილი საავადმყოფოდან 6 იანვარს გამოწერეს, თუმცა, 7 იანვარს ძლიერი ტკივილების გამო კვლავ იქნა ჰოსპიტალიზებული. 2006 წლის 21 მარტს, დვალიშვილის საქმეზე პასუხისმგებელმა გამომძიებელმა სასამართლო-სამედიცინო ექსპერტიზის ჩატარების ბრძანება გასცა, რათა დადგენილიყო დაზარალებულის დაზიანებათა სიმძიმის ხარისხი და მათი გამომწვევი სავარაუდო მიზეზი. იმავე დღეს, სასამართლო ექსპერტიზის ეროვნული ბიუროს იმერეთის რეგიონულმა ოფისის ექსპერტმა დაადგინა, რომ დაზიანებები მიყენებული იყო მაგარი, ბლაგვი საგნით და მიეკუთვნებოდა დაბალი სიმძიმის დაზიანებათა კატეგორიას, რომელმაც ხანგრძლივი ზიანი მიაყენა მომჩივნის ჯანმრთელობას.
2006 წლის 12 ოქტომბერს დვალიშვილის ადვოკატმა ზაზა ხატიაშვილმა ალტერნატიული ექსპერტიზა ჩაატარა.
სასამართლო ექსპერტიზის ეროვნული ბიუროს ექსპერტებმა დაადგინეს შემდეგი: “რევაზ დვალიშვილისთვის მიყენებული დაზიანებები არ შეიძლება გამოწვეული ყოფილიყო მხოლოდ მაგარ ბლაგვ საგანზე სხეულის დაცემით”.
2007 წლის 9 ივლისს, ქუთაისის სააპელაციო სასამართლომ, შეცვალა რა დანაშაულის სიმძიმე და მიანიჭა რა მას საზოგადოებრივი წესრიგის მსუბუქი დარღვევის კვალიფიკაცია, ძალაში დატოვა დვალიშვილის მსჯავრი და პატიმრობა ჯარიმით შეცვალა. სააპელაციო სასამართლომ ასევე უარყო მომჩივნის ბრალდება არასათანადო მოპყრობის შესახებ, როგორც დაუსაბუთებელი. 2008 წლის 1-ლი აპრილის განჩინებით, საქართველოს უზენაესმა სასამართლომ დაუშვებლად სცნო მომჩივნის სარჩელი სამართლებრივ საკითხებთან დაკავშირებით.
2006 წლის 10 თებერვალს, დვალიშვილმა პოლიციელთა წინააღმდეგ სისხლის სამართლის საქმის აღძვრის მოთხოვნით, დასავლეთ საქართველოს პროკურორის სახელზე სარჩელი შეიტანა. პროკურორმა დაკითხა 7 პოლიციელი, იმ პოლიციელთა ჩათვლით, რომლებმაც მომჩივანი დააკავეს და რომელთაგან 2, მომჩივნის მტკიცებით, მონაწილეობდა მის მიმართ არასათანადო მოპყრობაში. ყველა პოლიციელმა უარყო დვალიშვილის ცემა. 24 მაისს, პროკურორმა, მტკიცებულებათა უკმარისობის გამო, საქმე შეწყვიტა. ბოლოს დვალიშვილის ადვოკატმა სტრასბურგის სასამართლოს მიმართა, რომელმაც დაადგინა, რომ დვალიშვილის მიმართ ადგილი ჰქონდა არასათანადო მოპყრობას.
სტრასბურგის სასამართლოს გადაწყვეტილებაში ნათქვამია: “არგუმენტების გარეშე მიიღეს მხედველობაში პოლიციელთა ჩვენებები, იმ ფაქტის მიუხედავად, რომ აღნიშნული ჩვენებები შესაძლოა იყო სუბიექტური და მიზნად ისახავდა სისხლის სამართლის პასუხისმგებლობის არიდებას. პოლიციელთა ჩვენებების სანდოობა ასევე უნდა დამდგარიყო კითხვის ნიშნის ქვეშ, ვინაიდან გამოძიებას უნდა დაედგინა მათი დისციპლინური თუ სისხლის სამართლებრივი პასუხისმგებლობის საკითხი.”
საქართველოს მორალური ზიანის სახით დვალიშვილისთვის 12 ათასი ევროს გადახდა დაეკისრა.
ადვოკატ ზაზა ხატიაშვილის ბრალდებას შინაგან საქმეთა სამინისტრო დღესვე გამოეხმაურა. პრესსამსახურის უფროსმა ნინო გიორგობიანმა “ინტერპრესსნიუსს” დაუდასტურა, რომ რევაზ ქობულია ამჟამად წყალტუბოს პოლიციის უფროსია, ხოლო მჟავიას დაწინაურების ფაქტი უარყო. მისი თქმით ეს უკანასკნელი, ერთი განყოფილებიდან მეორეში, იგივე თანამდებობრივ პოზიციაზე გადაიყვანეს. ამასთან, როგორც გიორგობიანმა განაცხადა, დვალიშვილის საქმესთან დაკავშირებით სტარსბურგის სასამართლოს გადაწყვეტილებაში არც ერთი პოლიციელის გვარი არ ფიგურირებს.
