“ჯი-თი გრუპი” 2007 წლიდან NEW HOLLAND-ის ოფიციალური დილერია საქართველოში და სასოფლო-სამეურნეო ტექნიკის გაყიდვის ბიზნესში უკვე შვიდი წელია, აქტიურადაა ჩართული. ტენდერი, რომელიც სოფლის მეურნეობის სამინისტრომ გამოაცხადა, მათი ყურადღების ცენტრში მაშინვე მოექცა. ტენდერის შედეგებიც სწორედ მათ გააპროტესტეს.
“გურია ნიუსის” ვებ-გვერდზე გამოქვეყნებულ სტატიას სახელწოდებით “ტრაქტორების საქმე” _ გიგი უგულავას “კომპანიონები” ქართველი მეცნიერების წინააღმდეგ” ლევან გოგსაძის სატელეფონო ზარი მოყვა, რომელმაც განაცხადა, რომ მზად იყო საკუთარი პოზიციის დასაფიქსირებლად. ამის შემდეგ, “გურია ნიუსის” ვებგვერდზე გამოქვეყნდა მისი ინტერვიუ, სადაც ჩვენ აღვნიშნეთ, რომ გოგსაძის პრეტენზიების იმ ნაწილს, რომელიც სოფლის მეურნეობის პროექტების მართვის სააგენტოს ხელმძღვანელის, გიორგი ჩხეიძის მისამართით იყო გამოთქმული, ადრესატის კომენტარებთან ერთად შემოგთავაზებდით.
“პროკურატურას, თავისი მრავალთვიანი მუშაობის პროცესში, შესყიდვების კომისიის მუშაობასთან დაკავშირებით, არავითარი პრეტენზია არ ჰქონია. მოწმის სახით, რა თქმა უნდა, კომისიის ყველა წევრი დაიკითხა და პირადად მეც მათ შორის. შეიძლება, რომელიმე კერძო კომპანიის ხელმძღვანელს ან წარმომადგენელს აქვს იმედგაცრუება ან თავისი სუბიექტური აზრი გააჩნია, როგორ უნდა ემუშავა კომისიას, ეს მათი უფლებაა.” _ აცხადებს გიორგი ჩხეიძე “გურია ნიუსთან” საუბრისას.
_ ბატონო გიორგი, თუ თქვენთან, გადაწყვეტილების მიმღებებთან არ აქვთ პრეტენზია, მაშინ რაზეა საქმე აღძრული?
_ პრეტენზია აქვთ და ჩემი აზრით დაუსაბუთებელი, იმ კვალიფიციურ მეცნიერებთან, რომლებმაც დაადგინეს სპეციფიკაციები და ის ოპტიმალური პარამეტრები, რომელიც უნდა ჰქონოდა გაზაფხულზე შეძენილ ტექნიკას.
საუბარია იმაზე, პირველ ლოტში რატომ დაადგინეთ 115 სიმძლავრის ტრაქტორი და არა 110-ისო. 110 -ის რომ დაგედგინათ, უფრო იაფად იყიდდით და დაზოგავდით თანხასო. სწორედ ამ თანხაზე ამბობენ, რომ არის სახელმწიფოსთვის მიყენებული ზარალი. ეს ლოგიკაა ბრალდებაში.
რაც შეეხება ბატონი გოგსაძის განცხადებებს, რაც წავიკითხე, ეს მისი აზრია ალბათ, რომ კომისიას სხვანაირად უნდა ემუშავა. ეს მისი უფლებაა, მაგრამ მე მინდა გითხრათ, რომ კომისიის მუშაობასთან დაკავშირებით პრეტენზია არავის ჰქონია, მადლობის წერილები კი მივიღეთ.
_ ერთ-ერთი პრეტენზია, რასაც გოგსაძე თქვენი მისამართით აცხადებს, ტენდერიდან დილერების გამორიცხვააა. რატომ მიიღეთ ასეთი გადაწყვეტილება? ეს შეღავათს გაძლევდათ?
_ რა თქმა უნდა, გარდა იმისა, რომ შეღავათს გვაძლევდა, ჩვენ ამ შემთხვევაში ძალიან შემჭიდროვებულ ვადებში უნდა მოგვეხდინა ტექნიკის შესყიდვა და ჩამოყვანა, რისთვისაც მწარმოებლებს მოუხდათ თავიანთი საწარმოო გეგმის შეცვლა. ეს ძალიან რთული საქმეა, როგორც წესი, ტრაქტორების შესყიდვა ხდება დაახლოებით 6 თვით ადრე, ჩვენ მოგვიხდა 2-3 თვის შუალედში ყველაფრის მოგვარება.
ნიუ ჰოლანდი არ აკმაყოფილებდა დადგენილ სპეციფიკაციას და ჩვენ მხოლოდ ამიტომ არ განვიხილეთ კონკრეტული ტრაქტორი. შეიძლება, მათ დროულად მოეწოდებინათ ტექნიკა, აქამდე საქმე არც მისულა, მაგრამ იმ კომპანიებმა, რომლებმაც მზადყოფნა გამოთქვეს, რომ მთლიან რაოდენობას მოგვაწვდიდნენ დადგენილ ვადებში, მათ მოუხდათ საწარმოო გეგმის შეცვლა. ასეთი რამის გაკეთება შეუძლია მხოლოდ მწარმოებელს და მწარმოებლის მართვის მაღალ რგოლს. გარდა ამისა, დილერი ბუნებრივია, საკომისიოს იღებს, რაც დამატებითი ხარჯია და ერთ-ერთი მიზეზი ესეც იყო. ჩვენ გვინდოდა ურთიერთობა გვქონოდა უშუალოდ მწარმოებლებთან, რათა მაქსიმალურად საუკეთესო პირობები მიგვეღო.
ჩვენ სახუმარო საქმეს არ ვაკეთებდით და გვჭირდებოდა პასუხისმგებლობის უფრო მაღალი ხარისხი მომწოდებლებისგან, ვიდრე შეიძლებოდა გვქონოდა დილერებისგან. არავის ვაკნინებ, მაგრამ მიმაჩნია, რომ მწარმოებელ კომპანიას უფრო დიდი პასუხისმგებლობა შეიძლება ჰქონდეს, ვიდრე მის წარმომადგენელ ქართულ კომპანიას.
_ სწორედ მაგ ფაქტის გამო აცხადებს “ჯი-თი” ჯგუფი, რომ თავს დამცირებულად გრძნობენ გოგსაძის თქმით, პირადად თქვენ დაურეკეთ “ნიუ ჰოლანდის” წარმომადგენლებს და ის სამინისტროშიც კი არ შემოუშვეს…
_ მომიტევეთ რა, მაგრამ დავუშვათ ჩემს ღონისძიებაზე თქვენ არ დაგპატიჟეთ და დავპატიჟე ვიღაც სხვა. ეს შეურაცხმყოფელია? არ ვიცი საიდან და რა ურთიერთობებიდან გამომდინარე, მაგრამ ბატონი გოგსაძე რატომღაც დარწმუნებული იყო იმაში, რომ უშუალოდ ის უნდა ყოფილიყო მოლაპარაკების პროცესში. მისი განცხადება იმის შესახებ, რომ სამინისტროში არ შემოუშვეს, ცოტა გადაჭარბებული იყო. ბატონი გოგსაძე არაერთხელ იყო სამინისტროში შეხვედრებზე და მე ის პირადად მყავს ნანახი. მე ის არ მიცნობს, მაგრამ მე ვცნობ მას. თუ კომისიამ გადაწყვიტა, რომ ასე წარემართა თავისი საქმიანობა, ეს მისი პრეროგატივაა და არა კონკრეტული პირის. სხვა კომპანიებს ამის გამო პრეტენზიები არ გამოუთქვამთ.
_ თუმცა, მინისტრის სახელზე დაწერილ წერილს ოთხი კომპანია აწერდა ხელს…
_ მაგ საპრეტენზიო წერილში არცერთი არ წერდა იმას, რომ ისინი შეურაცხყოფილები არიან იმის გამო, რომ არ დაესწრნენ მოლაპარაკებას. ისინი აპროტესტებენ იმას, რომ სპეციფიკაციები არასწორად იყო, აპროტესტებენ, რომ ვითომ კომისია ცუდად მუშაობდა. მე არ ვაკეთებ მათზე კომენტარს, იმიტომ რომ ისინი სუბიექტურები არიან. ყველა ყველაფერს ვერ მოიგებს, ხო?
ჯი-თი ჯგუფს რატომღაც მიაჩნდა, რომ კომისიას სწორედ მისი შემოთავაზებული ტრაქტორი უნდა ეყიდა. დარწმუნებულები იყვნენ ამაში და შეიძლება ასეთ პროგნოზს გასული წლების პრაქტიკის საფუძველზე აკეთებდნენ. მე ვფიქრობ, რომ მექანიზატორის გასული წლების შესყიდვების საკითხებს სერიოზულად უნდა გადავხედოთ. მე როგორც ვიცი, ასეთი მასშტაბური და გამჭვირვალე ტენდერი წინა წლებში არ ჩატარებულა და მინდა ვიცოდე, რატომ ჰქონდა ასეთი დარწმუნებული მოლოდინი “ჯი-თი” ჯგუფს, რომ სწორედ ის გაიმარჯვებდა ტენდერში? რატომ აღიქვეს ასე მტკივნეულად და შეურაცხმყოფელად ის, რომ მათ ეს ვერ მოახერხეს იმ მარტივი მიზეზის გამო, რომ უფრო უკეთესი ტექნიკა იქნა შესყიდული? არავინ უარყოფს იმას, რომ თავის კლასში მათი ტრაქტორი შეიძლება ძალიან კარგია.
_ ისინი აცხადებენ, რომ არა თუ თავის კლასში, არამედ 115- იან “ზეტორს” “ნიუ ჰოლანდის” 110-იანი ტრაქტორი ჯობიაო. არგუმენტად კი მოჰყავთ ტრაქტორების შეჯიბრი, რომელიც შსს-მ მოაწყო და ვიდეოკადრებიც გაავრცელა.
_ იცით რა, საერთოდ უკომენტაროდ მინდა დავტოვო ის გაუგებარი, ამას არაპროფესიონალურიც არ შეიძლება ეწოდოს, დილეტანტის ქვემოთ არის კიდევ ის პირობები, რითაც რაღაც ექსპერიმენტი ჩატარდა. იმასაც ვერ ვიტყვი, რომ ეს არის ექსპერიმენტი, თუნდაც მტკიცებულება იყოს სასამართლოში. ნებისმიერი, ოდნავ მაინც ჩახედული ამ საქმეში დაგიდასტურებთ იმას, რომ ის ექსპერიმენტი იყო უაზრობა და ემსახურებოდა სწორედ მაგ შედეგის მიღებას, რომელსაც ისინი ამბობენ.
და ყველაზე საინტერესო იცით რა არის, “ჯი-თი” ჯგუფი საერთოდ არ მონაწილეობდა კონკურსში, კონკურსში მონაწილეობას იღებდა “ნიუს ჰოლანდი.” ზოგადად ნიუს ჰოლანდზე კარგის მეტი არაფერი გვეთქმის, ისევე როგორც სხვა მწარმოებლებზე, რომლისგანაც ტექნიკა შევისყიდეთ.
_ ფასების შედარებაზე მინდა გკითხოთ, გოგსაძე ჩვენთან ინტერვიუში 2012 წლის მაღალ ფასებს შემდეგი მიზეზით ხსნის: “2012 წლის ფასებს რაც შეეხება, სახელმწიფოს მიერ გამოცხადებული იყო პირობა, 15% იხდიდნენ წინასწარ, ღირებულების 85% კი 5 წლიანი გადავადებით. წელს რაც იყიდეს, “ზეტორი” და “კლაასი” არავითარი განვადება არ ყოფილა. პირდაპირ გადაუხადეს ქეში.”
შესყიდვების რა სქემაა ეს? სახელმწიფოს ჯერ კიდევ აქვს “ჯი-თის” ვალი?
_ არავის არანაირი ვალი არ აქვს არც ჯი თის და არც ნიუ ჰოლანდის. იქ არის ფინანსური ორგანიზაციები, რომელთანაც ვალდებულებები გააჩნია “მექანიზატორს” მოწოდებულ ტექნიკაზე. რამდენიმე ევროპული ბანკია. მექანიზატორს და ამ ბანკებს შორის კი საქართველო ბანკი დგას, რომელიც გარანტორია. შესაბამისად, საქართველოს ბანკს დაგირავებული აქვს მექანიზატორის ქონება ამ ვალდებულების უზრუნველყოფის მიზნით. რაც შეეხება “ჯი-თის” განცხადებას, თუ რატომ გაყიდეს ძვირად, თუ მასეთი რამე თქვა, ეგ ტყუილია! თვითონ გამყიდველს მიღებული აქვს მთლიანად ეგ ფული. თქვენ გგონიათ, ეგ უფასო კრედიტია? თუ კრედიტში გაიყიდა, იმას ფასში ასახვა არ უნდა ჰქონოდა. რა შუაშია ტექნიკის ფასი გადახდის პირობებთან? იმ გადახდის პირობებს, განვადებას და კრედიტს თან ახლავს პროცენტი, რომელსაც ყოველწლიურად იხდის მექანიზატორი. ამიტომ, ეგ განცხადება არ არის სწორი და შეცდომაში შეყვანაა. დღეს მაშინ მექანიზატორი რის პროცენტებს იხდის? მაშინაც მომატებული ფასი გადაიხადა და ახლა პროცენტებს იხდის კიდევ? თუ მასეა, ეგ საერთოდ გამოსარკვევია.
_ გოგსაძის განცხადებით, “ალმექსისგან” იყიდეთ ხორბლის სათესი, რომელსაც აწარმოებს “ატეშპარი”, რომელიც მონაწილეობდა ამ შესყიდვაში და ვაჭრობა შეწყვიტა იმის გამო, რომ არარსებული ფასი დაუსახელეთ და უთხარით, 5000 ევროზე ნაკლებად თუ მოგვყიდით, ვიყიდით თქვენგანო. ამ განცხადებას აკეთებს გოგსაძე. თქვენ რას იტყვით ამ ფაქტზე?
_ ჩვენ ძალიან ინტენსიური მოლაპარაკებები გვქონდა კომპანიებთან და დეტალები ნამდვილად არ მახსოვს, მაგრამ ის, რომ კონკურსიდან გავიდა, ეს მისი უფლება იყო. ძალით უნდა დაგვეჭირა? ჩვენ შეიძლებოდა გვეთქვა, რომ მათზე უკეთესი წინადადება სხვა კომპანიებს ჰქონდათ.
რაც შეეხება ატეშპარს, თურქული კომპანიაა, რომელსაც ყიდის “აგრომასტერი” ასეთი კომერციული კომპანიაა, რომელთა წარმომადგენელიც თუ არ ვცდები, “ჯი-თი” ჯგუფია. იმათზე უკეთესი წინადადება მოგვცა სხვა თურქულმა კომპანიამ, რომელთაგან გუთნები და სხვა მისაბმელი ტექნიკა ვიყიდეთ. ჩვენ როგორ ვაწარმოებდით მოლაპარაკებებს მათთან და წარმოდგენილი წინადადებებიდან საუკეთესო როგორ მივიღეთ, ეს უკვე ჩვენი, კომისიის კომპეტენცია იყო და უკაცრავად და ამაში ნურავინ ჩაგვერევა რა. ეს როგორღაც სხვებზე უკეთ ვიცით. მთავარი ისაა, რომ მოლაპარაკების პროცესში მივაღწიეთ იმას, რომ ყველამ საგრძნობლად დააკლო ფასები და უპრეცედენტო ფასებზე ჩამოვედით. ეს ჩვენი დამსახურებაა და არა ვიღაცის კრიტიკის საგანი.
_ ბატონო გიორგი, გაქვთ რამე ვერსია, ვის დაჭირდა ამხელა აჟიოტაჟის ატეხვა ამ საქმეზე?
_ მე მაქვს ვერსია, რომ გარკვეული პირების სუბიექტური დაინტერესების შედეგად და ვგულისხმობ იმ განაწყენებულ ადამიანებს, რომლებმაც ვერ მოახერხეს თავიანთი ტექნიკის გაყიდვა, არასწორი ინფორმაცია მიაწოდეს სამართალდამცავ ორგანოებს და ალბათ, შეიყვანეს შეცდომაში. აი, ამ არასწორ ინფორმაციაზე ატყდა ერთი ამბავი, რაზეც, ჩემი აზრით, გარკვეულმა პირებმა პასუხი უნდა აგონ.
_ პოლიტიკურ მოტივებს გამორიცხავთ? ეს აზრი ლობირებს საზოგადოებაში აქტიურად.
_ რაც ზუსტად არ ვიცი, იმაზე ვერაფერს ვიტყვი, მაგრამ არსებობს საზოგადოებაში მასეთი მოსაზრებაც. გარკვეულ ადამიანებს გაუჩნდათ მაგის ეჭვები, რასაც აფიქსირებენ კიდეც მედიასთან საუბრისას. ვკითხულობ პრესას და ვეცნობი ამ ინფორმაციებს.
_ ვერსიას პოლიტიკურ მოტივებზე თავისი მყარი არგუმენტიც აქვს. შს სამინისტროსა და პროკურატურაში ასე უცებ საქმის აღძვრა და ასე ვთქვათ, დაჩქარებულ ტემპში ბოლომდე მიყვანა, როგორც წესი, არ ხდება ხოლმე… მითუმეტეს, კომპანიის წარმომადგენლებს სამართალდამცავი ორგანოებისთვის განცხადებით არ მიუმართავთ…
_ მე შემიძლია დაგეთანხმოთ… სამწუხაროა, რომ მაღალი რეპუტაციის მქონე ადამიანები დაკავებულები იყვნენ და მათ სახელს ჩირქი მოეცხო. სამწუხაროა ისიც, რომ მათი ჯანმრთელობა დადგა სერიოზული საფრთხის ქვეშ. ძალიან ძნელია, როცა უდანაშაულოდ გსჯიან. მე ვფიქრობ, რომ ეს არის დიდი შეცდომა, რომელსაც რაღაც მიზეზები აქვს. ვინც გარეულია ამ საქმეში, ყველას უნდა მოეთხოვოს პასუხი. ეს უკვე სამართალდამცავი ორგანოების გადასაწყვეტია. ჩვენ ისღა დაგვრჩენია, რომ სასამართლოს გადაწყვეტილებას დაველოდოთ. დარწმუნებული ვარ, ყველაფერი ბრალდებულების სასარგებლოდ გადაწყდება.
მიუხედავად იმისა, რომ ძალიან რთულ პირობებში გვიხდებოდა ბოლო თვეებში მუშაობა და ნაცვლად იმისა, გახარებულები ვყოფილიყავით იმ შედეგით, რასაც სოფლის მეურნეობის სამინისტროს გუნდმა მიაღწია, ჩვენი კოლეგები დაკავებულები იყვნენ და დღესაც მძიმე დანაშაულში ედებათ ბრალი. მიუხედავად ამისა, ჯერჯერობით წარმატებით ვართმევთ თავს ამ ყველაფერს და ასეც იქნება. მიუხედავად იმისა, რომ ძალიან დიდი რისკი იყო ამ ყველაფერს შევეფერხებინეთ და საქმე გაეფუჭებინა. არ გამოვრიცხავ, რომ ვიღაცას ამის დიდი სურვილიც ჰქონდა…
