ჩოხატაურის მუნიციპალიტეტის გამგებლის მოვალეობის შემსრულებლის, თამაზ ჯინჭარაძის ინფორმაციით, ღონისძიებაზე მთავრობის ყველა წევრი იყო მოწვეული:
_ დავპატიჟეთ ყველა _ მინისტრები, მათი მოადგილეები, პარლამენტარები. გვინდა, ყველამ ნახოს ჩვენი სიმდიდრე _ ბახმარო, _ გვითხრა ჯინჭარაძემ.
მიუხედავად დაგზავნილი მოსაწვევებისა, კურორტზე არც მინისტრები, არც მათი მოადგილეები და არც პარლამენტარები გამოჩენილად. ტრადიციულ ღონისძიებას ჩოხატაურის, ლანჩხუთისა და ოზურგეთის მუნიციპალიტეტების საკრებულოს თავმჯდომარეები, ჩოხატაურის მაჟორიტარი დეპუტატი, გამგებლის მოვალეობის შემსრულებელი, ოზურგეთისა და ლანჩხუთის სხვადასხვა სამსახურის უფროსები და პოლიტიკური პარტია “ქართული ოცნების” წარმომადგენლები დაესწრნენ. სტუმრები სახელდახელოდ მოწყობილი, გადახურული ტრიბუნიდან ადევნებდნენ თვალს მიმდინარე ღონისძიებას. აღსანიშნავია, რომ მათგან ნახევარი, გასულ წელს, ამავე ტრიბუნიდან, “ნაციონალური მოძრაობის” მაისურებითა და კეპებით იწონებდა თავს. ნახევარს კი, იმის გამო, რომ “ქართული ოცნების” მაისურებით იმყოფებოდნენ, ბახმაროში ფეხიც არ შემოადგმევინეს, უფრო მეტიც, სპეცრაზმიც კი დაახვერდეს. შარშანდელივით მრავლად არა, მაგრამ “ნაციონალური” ატრიბუტიკის გარეშე ფერისცვალების დღესასწაულს წელსაც არ ჩაუვლია. ღონისძიება უამინდობის გამო დაგეგმილზე ადრე დასრულდა. ორგანიზატორებს, რატომღაც, არ უფიქრიათ, რომ მონაწილეებს წვიმა დაასველებდათ. როგორც ჩანს, თავად რომ არ დასველდნენ, ესეც საკმარისი იყო.
აღსანიშნავია, რომ ბახმაროში, როგორც აანონსებდნენ, არც მომღერლები _ ლაშა ღლონტი, კვარტეტი “ალილო” და “ქართული ხმები” ყოფილან. ადგილობრივმა ხელისუფლებამ ეს იმით ახსნა, რომ მათი ჩამოყვანისთვის საჭირო სახსრები ბიუჯეტს არ გააჩნდა, თუმცა, კითხვა _ თუკი ფული არ ჰქონდათ, რატომ დაანონსეს მომღერლების ჩამოყვანა, უპასუხოდ დარჩა. უნდა ითქვას ისიც, რომ ადგილობრივი ძალებით ჩატარებულმა კონცერტმაც ვერ გაამართლა მაყურებლის მოლოდინი. ჩვენებურების ნამღერმა მრავალჟამიერმა კი ყველა მოლოდინს გადააჭარბა:
_ არ ვიცოდი, მრავალჟამიერი რვა ხმაში თუ შეიძლებოდა, ემღერათ. კიდევ კარგი, მეტი წევრი არ ჰყავდათ ანსამბლში, _ კომენტარი არ დაუშურებიათ მაყურებლებს.
ბახმაროს კინოთეატრში არც დოკუმენტური ფილმი გაუშვიათ. ერთადერთი, რაც განრიგის მიხედვით ჩატარდა, დოღი იყო. დოღში მონაწილეობა მიიღეს ჩოხატაურის, სამტრედიის, ოზურგეთის, ლანჩხუთის, ბათუმის, ფოთის, აბაშისა და ხულოს მუნიციპალიტეტების 34 ცხენოსანმა. ერთკილომეტრიან გარბენში I ადგილი დაიკავა ოთარ ჭელიძემ (ოზურგეთი, ცხენი “ბროლია“); II ადგილი _ ასლან ტუნაძემ (ზოტი, ცხენი “იმედი“ ). ორკილომეტრიან გარბენში I ადგილი დაიკავა თორნიკე ანდრეევმა (კოხნარი, ცხენი “სატანა“), II ადგილი _ სოსო რამიშვილმა (დიდივანი, ცხენი “ველური“). სამკილომეტრიან გარბენში პირველი ადგილი ზურაბ თევზაძეს ერგო (ჩოხატაური, ცხენი “ჟრუანტელი“), მეორე ადგილზე ჯემალ გორგაძე გავიდა (ჩოხატაურის მუნიციპალიტეტის ზედამხედველობის სამსახური, ცხენი “სონა“), მეორე ადგილი ვაჟა პაიჭაძემ მოიპოვა (გუთური, ცხენი “ლურჯა“). ოთხკილომეტრიან გარბენში I ადგილი დაიკავა ლაშა წულაძემ (ოზურგეთი), II ადგილი _ ტარიელ გორგაძემ (ოზურგეთი, ცხენი “ქარიშხალა“). ხუთკილომეტრიან გარბენში I ადგილი დაიკავა მურად გიორგაძემ (“ბახმარო“, ცხენი “ვასკა“), II ადგილი _ უსუფ გორგაძემ (ხულო, ცხენი “შტერიკა“).
გამარჯვებულები სხვადასხვა სახის პრიზებით დაჯილდოვდნენ. ევროპაბეთმა 1, 2 და 4-კილომეტრიან გარბენში გამარჯვებულებს 500-500 ლარი გადასცა, სამ და ხუთკილომეტრიანი გარბენის გამარჯვებულებს კი 1500 ლარიანი უნაგირები ერგოთ.
