_ პრესკონფერენციებს ნაკლებად ვატარებ, იმიტომ, რომ ძალიან დატვირთული ვარ და როდესაც ამის აუცილებლობა იქნება, შეგაწუხებთ. დღევანდელი ჩემი შეხვედრა მინდა, იყოს კითხვა-პასუხის რეჟიმში. არის საკითხი, რომელიც ბოლო დღეების განმავლობაში ცალმხრივად შუქდება და აუცილებლად ჩავთვალე, რომ ამ ბრალდებებს გავცე პასუხი, რომელიც 80%-ით ჩემს პიროვნებას ეხება, _ განაცხადა კონსტანტინე შარაშენიძემ.
შეხვედრის დიდი ნაწილი ერთ-ერთი მედიასაშუალების და საკრებულოს დაპირისპირებას შეეხო. ორივე მხარემ თავისი პოზიციები დააფიქსირა.
შეხვედრაზე კონსტანტინე შარაშენიძემ “გურია ნიუსის” კითხვებსაც უპასუხა.
_ ბატონო კონსტანტინე, გვაინტერესებს აგვისტოში მომხდარმა სტიქიამ რა რაოდენობის ზიანი მიაყენა მუნიციპალიტეტს?
_ მონაცემები უკვე გაგზავნილია რეგიონული განვითარების და ინფრასტრუქტურის სამინისტროში. დაახლოებით ზარალი 800 000 ათას ლარს აღწევს.
_ საჯარო ინფორმაციაზე რას გვეტყვით, რომლის გამოთხოვის მოთხოვნით, თითქმის ერთი თვეა, წერილი გამოგზავნილი გვაქვს და პასუხი არ მოგვწერეთ. წერილი ეხება სტიქიისგან დაზარალებულების გამოგზავნილი წერილების რაოდენობას გამგეობაში. რამდენი ადამიანის წერილი დაკმაყოფილდა და ა.შ.
_ ეს ინფორმაცია ხომ მოგეცით?
_ ეს იყო ქალაქ ოზურგეთზე და ახლა გვაინტერესებს, სოფლებში რა მდგომარეობაა.
საუბარში ოზურგეთის მუნიციპალიტეტის გამგეობის პრესსამსახურის უფროსი ნინო სალუქვაძე ჩაერთო: _ პრობლემა არ არის არანაირი.
_ პრობლემა ისაა, რომ ინფორმაცია არ მოგიწოდებიათ.
_ ინფორმაციას აუცილებლად მოგაწოდებთ.
_ კონკრეტული თარიღი შეგიძლიათ დაგვისახელოთ?
_ ტექნიკური საკითხები იყო მოსაგვარებელი და ამის გამო შეფერხდა საჯარო ინფორმაციის მიწოდება.
