ის მიიჩნევს, რომ კოალიციაში შიდა დაპირისპირება და ვიწრო პიროვნული ინტერესები საერთო საქმეს ამუხრუჭებს.
_ თქვენ ყველა ხედავთ არსებულ ვითარებას, თუ რა ხდება ოზურგეთში პოლიტიკის მხრივ. იცით იმ დაძაბულობის შესახებ, რაც ხდება ოზურგეთულ კოალიციაში საპრეზიდენტო კანდიდატის გიორგი მარგველაშვილის ოზურგეთის შტაბის ხელმძღვანელად დანიშვნასთან დაკავშირებით. ჩვენ, კოალიციის წევრმა პარტიებმა, ჩვენი მკვეთრი პოზიციები დავიჭირეთ. გამოვხატეთ ჩვენი დამოკიდებულება მიმდინარე პროცესთან დაკავშირებით, რაც რაიონშია და ჩვენთვის არასასურველია, _ ამბობს იგი.
_ ბატონო შოთა, იქნებ, დააკონკრეტოთ, რას გულისხმობთ.
_ აქ ვგულისხმობ ძალიან ბევრ თემას. უპირველეს ყოვლისა, მოლოდინი იმასთან დაკავშირებით, რომ შესაძლებელი იყო ბატონი ბიძინა ივანიშვილის მოსვლის შემდეგ შექმნილი საინვესტიციო ფონდების ამოქმედება რაიონში და რაღაც სამუშაო ადგილების შექმნაზე ფიქრი, არ გამართლდა. “ქართული ოცნების” ოფიციალურ გვერდზე დევს ინფორმაცია, რომ ეს ფონდი სხვა რეგიონებში აქტიურად მუშაობს. შეგიძლიათ, ნახოთ, რა თანხები გადის კახეთის რეგიონში. მილიონობით ლარია გაცემული სხვადასხვა ბიზნესპროექტებზე. რატომღაც, გურიაში ნულოვანი მაჩვენებლებია ამ მხრივ.
_ თქვენი აზრით, რისი ან ვისი ბრალია ეს?
_ ალბათ, მეტი აქტიურობაა საჭირო იმ ადამიანების მხრიდან, რომლებმაც ამ რაიონზე, მთელ რეგიონზე პასუხისმგებლობა აიღეს თავის თავზე არჩევნების შემდეგ. მხედველობაში მყავს ხელისუფლების წარმომადგენლები: გამგებელი, მაჟორიტარი დეპუტატი და “ქართული ოცნების” ოზურგეთის რაიონული ორგანიზაციის თავმჯდომარე. სწორედ ისინი არ ინტერესდებიან ამ თემით. ასევე ურთულესი თემაა ის, რომ ბატონი ბიძინა ივანიშვილის მიერ ინიცირებული და მთავრობის მიერ გატარებული ძალიან მნიშვნელოვანი “სოფლის პროგრამა” არც თუ სრულყოფილად იქნა გახორციელებული და ოზურგეთში 3 000 ოჯახი დარჩა ვაუჩერების გარეშე. დატოვო 3000 ოჯახი ბარათის გარეშე, ეს არაა იოლი თემა. ჩვენ ვართ არჩევნების მზადების პროცესში და ეს თემა ძალიან მტკივნეულად მოქმედებს საზოგადოებაზე. (ცნობილია, რომ იმ ოჯახებს, რომლებსაც საგაზაფხულოდ ვაუჩერი არ გადაეცათ გარკვეული მიზეზების გამო, ვაუჩერებს მიიღებენ საშემოდგომო სამუშაოების შესასრულებლად. ავტორი) მოხდა თუ არა ამ საკითხის შესწავლა, მოხდა თუ არა პასუხისმგებლობის გამიჯვნა? ჩვენ მიგვაჩნია და მე კიდეც აღვნიშნე, რომ ეს იყო კლასიკური ნიმუში საბოტაჟისა. ისიც საინტერესოა, იმ ოჯახებმა, ვინც მიიღო ვაუჩერი, მიიღეს თუ არა სრულყოფილად და ისე, როგორც ეკუთვნოდათ? ნუთუ არ ჰქონდა ხელისუფლებას იმის რესურსი, რომ კარდაკარ, ოჯახ-ოჯახ ევლო და ეს საკითხი შეესწავლა? ამაზე დიდი პროგრამა არ გახორციელებულა სოფლის მეურნეობის მხარდასაჭერად _ ამაში მილიარდობით ლარია დახარჯული. ასევე არსებობს სხვა თემებიც, _ საკადრო გადაწყვეტილებები.
აქვე უნდა აღინიშნოს, რომ “ეროვნული ფორუმი”, რა თქმა უნდა, მიიღებს მონაწილეობას არჩევნებში. ჩვენ ყველა რესურსს გამოვიყენებთ, რომ ძალიან აქტიურად წარმოვჩნდეთ. ჩვენ ჩვეულებრივად საშტაბო მუშაობას შევუდგებით, რათა პოლიტიკური მიზანი, რაც დასახულია, შევასრულოთ. ამიტომ ჩვენ პიროვნებებს ნაკლებ ყურადღებას ვაქცევთ _ ჩვენთვის მთავარია გამარჯვება.
“ქართული ოცნება-დემოკრატიული საქართველოს” ოზურგეთის რაიონული ორგანიზაციის თავმჯდომარე დავით დარჩია, “ეროვნული ფორუმის” ოზურგეთის ლიდერის ბრალდებას ასე პასუხობს:
_ რა უნდა გაკეთდეს ოზურგეთში? კახეთში რთველია და ძალიან კარგია, თუ თანხები იქეთ მიემართება. დარწმუნებული ვარ, როცა მოვა ციტრუსის ჩაბარების დრო, აქაც მასე იქნება და უფრო უკეთესად. აბა, დღეს რა უნდა მოხდეს, არ ვიცი. თუნდაც ეს ხვნა-თესვის პროცესი ძალიან კარგად ჩატარდა.. გასაგებია, დარჩა ბევრი ოჯახი, თუმცა, ეს არც ჩვენი ბრალია და არც არავისი. მიღებულია შესაბამისი ზომები და ალბათ, რაღაცნაირად მოხდება ამ ოჯახების კომპენსირება დროთა განმავლობაში. ზუსტად თარიღს და დროს ვერ გეტყვით, მაგრამ დაკმაყოფილდებიან. არ აქცევს ადგილობრივი ხელისუფლება ყურადღებას მოსახლეობასო, _ არ მესმის ამ განცხადებისა. რას ჰქვია, არ აქცევს? აქცევს იმაზე მეტად, რაც შეიძლება გაკეთდეს. რას ითხოვს შოთა გოგიბერიძე _ ზეციდან ჩამოფრინდება ვინმე? რა უნდა გაკეთდეს მაშინ, ისიც ახსნას. კითხვებზე პასუხები მასაც შეუძლია მოითხოვოს _ კოალიციის წევრია და ვალდებულია, საქმე აკეთოს, მასაც აქვს პასუხისმგებლობა. თუ მან იცის, უკეთესად როგორ უნდა გაკეთდეს საქმე, ჩვენც გვასწავლოს. თუ ის უნდა მოვითხოვოთ, რომ რადგან უჭირს გურიას, ყველა ოჯახში უნდა დავარიგოთ ფული, დიდი მადლობა ამის სწავლებისთვის _ ეს ჩვენც გვინდა, მაგრამ, სამწუხაროდ, ასეთი რამ ბუნებაში არ ხდება, _ ამბობს დარჩია.
