“ისეთი “ძლიერები” ვართ ქართველები, რომ დამოუკიდებლობის დღე სისხლიან დღედ ვაქციეთ” _ აცხადებს “ახალი მემარჯვენეების” წევრი დავით საგანელიძე.
_ ძნელია, დღეს, ცხელ გულზე გააანალიზო იმდღევანდელი მოვლენები. ქვეყანაში დაძაბულობამ კულმინაციას მიაღწია, რაზეც, პირველ რიგში, პასუხისმგებლობა ეკისრება ხელისუფლებას და ოპოზიციის იმ ნაწილს, რომელიც ამ აქციების ორგანიზატორი იყო. თავიდანვე ჩანდა, რომ ბევრი რამ გაუთვლელი და გაუაზრებელი იყო, რამაც მძიმე შედეგი მოიტანა.
“ახალი მემარჯვენეების” პოზიცია ასეთია _ ძალადობით და რევოლუციის გზით ქვეყანაში ცვლილებები ვერ გახორციელდება. ამიტომ არ შევუერთდით “რვიანში” შემავალი პოლიტიკური პარტიები ნინო ბურჯანაძის მიერ დაწყებულ აქციებს.
_ თქვენ ფიქრობთ, რომ ოპოზიციამ გაიმეორა შეცდომა, როცა სააკაშვილის გადადგომა მოითხოვა?
_ რა თქმა უნდა, ჩვენ გვქონდა ამის ცუდი გამოცდილება. მთელმა ოპოზიციურმა სპექტრმა თვეების მანძილზე ვერ შეძლო სასურველი შედეგის მიღწევა, ვერ დაათმობინა ხელისუფლებას პოზიციები. მაშინ მივხვდით, რომ ეს დიდი მსხვერპლის ხარჯზე თუ მოხდებოდა. ამიტომ კონსტიტუციური გზით სიარული ვამჯობინეთ _ შევცვალოთ საარჩევნო კოდექსი და არ მივცეთ გაყალბების საშუალება ხელისუფლებას. ჩვენთვის თავიდანვე მიუღებელი რევოლუციური გზა, მაგრამ, სამწუხაროდ, ბურჯანაძემ, შეძლო საზოგადოების გარკვეული ნაწილის აყოლიება.
_ მან გამოიყენა ცნობილი ადამიანების ფაქტორი?
_ როცა პოლიტიკოსის პასუხისმგებლობაზე ვსაუბრობთ, ეს მხოლოდ პოლიტიკოსების ტვირთია. არ შეიძლება იმ ადამიანებს გადავაბრალოთ, ვინც იქ იყვნენ მისულები და აკეთებდნენ განცხადებებს და მოწოდებებს.
_ ასეთი სასტიკი დარბევით რა დაანახა ხელისუფლებამ საზოგადოებას?
_ ის, რომ მათი უნდა ეშინოდეთ. ხელისუფლებას ხომ ხალხი მხოლოდ არჩევნების დროს ახსენდება? სააკაშვილს ჰგონია, რომ ხმების მოპოვების საუკეთესო მეთოდი დაშინებაა. შემდეგ კი მსოფლიოს ეტყვიან, რომ ლეგიტიმურად არიან არჩეულები.
ხელისუფლებამ ყურად არ იღო ჩვენი მოთხოვნა, უარი ეთქვა აღლუმის ჩატარებაზე. ქვეყნის მთავარსარდალს განდიდების მანია დაემართა _ ასეთი ტიპის აღლუმები საბჭოური გადმონაშთია. მათ მხოლოდ იურიდიული მხარე დაიცვეს, თითქოს 25 მაისს, 12 საათზე სრულდებოდა აქციის ვადა. აქაც შეიძლება ვიდავოთ _ არ არსებობს სანქცირებული და არასანქცირებული მიტინგები, საზოგადოებას აქვს უფლება გამოხატოს პროტესტი. ის კი, რაც შემდეგ მოხდა, იყო ანგარიშსწორება საკუთარ ხალხთან.
_ საზოგადოებამაც დაივიწყა 7 ნოემბერი, დიღომში პოლიციის სამმართველოსთან მომხდარი ფაქტი. იქნებ, ამიტომ აირჩია ხელისუფლებამ ისევ დასჯის მეთოდი?
_ ხელისუფლებამ დაინახა, რომ ასეთ მეთოდებზე მას არავინ პასუხს არ თხოვს, ამით კი აშინებს საზოგადოებას, რომ აღარ გაბედონ პროტესტის გამოთქმა. სხვა რა ვუწოდო იმ სისასტიკეს, როცა კოკისპირული წვიმის ქვეშ დარჩენილ მომიტინგეებს 3500 სპეცრაზმელი შეიარაღებული შეესია?!
ხელისუფლებამ არაფერი არ გააკეთა, რომ მოსალოდნელი საფრთხის პრევენცია მომხდარიყო. როგორც ჩანს, მათ უნდოდათ უფრო მეტი შიში ჩაენერგათ ხალხში და უმოწყალოდ, სვავებივით შეესივნენ მომიტინგეებს. როცა საავადმყოფოებში გადაიყვანეს დაშავებულები, შეუძლებელი იყო მათი იდენტიფიცირება, არ გვაწვდიდნენ არანაირ ინფორმაციას. ხალხის ნაწილი წაიყვანეს შსს-ს შენობებში და იქ სცემეს. საკრებულოს სხდომაზე ოპოზიციურმა ფრაქციებმა ერთობლივად დავაყენეთ 26 მაისის მოვლენების შემსწავლელი კომისიის შექმნის საკითხი, რაც დღის წესრიგშიც კი არ შეიტანეს. ამიტომ, დემონსტრაციულად დავტოვეთ სხდომათა დარბაზი.
_ უნდა აიღოს თუ არა მომხდარზე პასუხისმგებლობა “სახალხო კრებამ”?
_ როცა ხალხს მოუწოდებ, მოვიდნენ აქციაზე; რომ ბოლო წუთამდე იქნები მათ გვერდით; არწმუნებ, რომ გადავაყენებთ სააკაშვილს და ამ დროს ყველაფერი მსგავსი ტრაგედიით მთავრდება, მაშინ პასუხისმგებლობას ვერ გაექცევი. ირაკლი ოქრუაშვილი აცხადებს, რომ როგორც კი ჩამოვა საქართველოში, ერთ დღეში დასრულდება ეს ხელისუფლება _ ეს ხომ აბსურდია?! ყველაზე მეტად დაიჩაგრა საზოგადოებისთვის ცნობილი სახეები და ის უპატრონო ხალხი, რომელიც ასე გაწირეს. სპორტის მსგავსად, პოლიტიკაშიც რომ იყოს დისკვალიფიკაციის საშუალება, ნინო ბურჯანაძეს, ირაკლი ოქრუაშვილს და ზურაბ ნოღაიდელს მივცემდი ამ დისკვალიფიკაციას. ისინი ხომ იყვნენ ხელისუფლებაში და ხომ დავინახეთ როგორები არიან? მე მათ ამ წარსულს ვერ დავუკარგავ და არ დავხუჭავ თვალს მათ დანაშაულობებზე. ამ ხალხმა გარკვეული პასუხისმგებლობა უნდა აიღონ საკუთარ თავზე.
_ დაისჯებიან ეს ლიდერები?
_ ჯერ სახელმწიფოს როლი და ფუნქცია მინდა დავინახო _ მას უნდა ჰქონდეს საკუთარი პოზიცია. ახლა საუბარია, რომ მზადდებოდა სამხედრო გადატრიალება, საქართველოში უნდა შემოსულყვნენ რუსული ჯარები. თუ ასეთი ინფორმაცია ჰქონდათ, მანამდე რატომ არ გაახმაურეს?
_ საუბარია მოახლოებულ საპარლამენტო არჩევნებზე.
_ 9 წლის განმავლობაში ვიყავი ორი მოწვევის დეპუტატი. დიდუბის რაიონში მოვიგე არჩევნები, თუმცა, უარი ვთქვი მანდატზე. ეს ჩემი მხრიდან იყო მორალური ნაბიჯი. თუ არჩევნები ჩატარდა დემოკრატიულად, მაშინ პარლამენტში იქნება ძალთა თანაფარდობა და ვერც ერთი პოლიტიკური მხარე თავის ჭკუაზე ვერ წაიყვანს ქვეყანას. დღეს ერთ პოლიტიკურ პარტიას აქვს უზურპირებული პარლამენტი, რომელიც პრეზიდენტის ნოტარიუსი გახდა.
ის, რაც დამოუკიდებლობის დღეს რუსთაველის გამზირზე მოხდა, ყველას სირცხვილია. ის ადგილი, რომელიც სისხლით იყო მორწყული, გადარეცხეს და დილით სამხედრო აღლუმი ჩაატარეს. ასეთი ფაქტები არ უნდა დარჩეს დაუსჯელი. დარწმუნებული ვარ, საზოგადოება სათანადოდ შეაფასებს ამ მოვლენებს.
