თუმცა, პროცესი ჭიანურდება, რაც საზოგადოების უკმაყოფილებას იწვევს.
იუსტიციის მინისტრი თეა წულუკიანი “გურია ნიუსთან” ამბობს, რომ მთავრობა წინასაარჩვენო დაპირებას აუცილებლად შეასრულებს და მომდევნო თვეებში ხარვეზების დამდგენი კომისია განცხადებების მიღებას დაიწყებს: “მართლმსაჯულების ხარვეზების შესახებ კანონი საბოლოო სახით მომდევნო ორი კვირის განმავლობაში წარედგინება მთავრობას, რათა ის საკანონმდებლო ინიციატივად იქცეს. მე ვიცი, რომ ამ კანონს ჰყავს ძალიან ბევრი კრიტიკოსი, პირველ რიგში მართლმსაჯულების ხელმძღვანელობა და არა მხოლოდ, მაგრამ ის პირობა რაც ჩვენ მივეცით ამომრჩეველს, რომ უკანონო განაჩენები უნდა გადაიხედოს, პირობად რჩება.”
წულუკიანი თქმით, ვენეციის კომისიამ დაჩქარებული წესით შეიმუშავა რეკომენდაცია ხარვეზების დამდგენი კომისიის შესახებ, რაც იუსტიციის სამინისტროში უკვე გადმოგზავნილია: “კანონპროექტი გაგზავნილი იყო ვენეციის კომისიაში რომელმაც ზაფხულშივე მოგვცა დასკვნა სექტემბრის მაგივრად, რომ დრო მოგვეგო და სწორედ ამის წყალობით ჩვენ უკვე შეგვიძლია, რომ ეს შეუფერხებლად გავაფორმოთ საკანონმდებლო ინიციატივად. ამის შემდეგ უკვე დაინტერესებული პირების საქმე იქნება, რომ ზედმიწევნით შეასრულონ ის დასაშვებობის პირობები, რასაც ეს კანონი ითვალისწინებს. კანონი არის საკმაოდ მკაცრი პირობებით. არ არის გამორიცხული რომ დაინტერესებულ მხარეს ადვოკატის დახმარება დასჭირდეს, რომ სწორად შეადგინოს განცხადება. პირობები მკაცრია ერთი მიზეზის გამო: ჩვენ არ გვინდა საქართველოში მივიღოთ კომისია, რომელიც იქნება იგივე პრობლემის წინაშე, რის წინაშეც არის სტრასბურგის სასამართლო. თუ ბევრი საჩივარი იქნა, ვისაც მოესურვება და არ სჭირდება, მაინც იჩივლებს. შეიძლება ამან გადაწონოს ის სერიოზული საქმეები, სადაც მართლმსაჯულების მართლაც სამარცხვინო ხარვეზები იქნა დაშვებული 9 წლის მანძილზე და ამიტომ ჩვენ ისეთი კანონი დავწერეთ, რომელიც მაქსიმალურად მისცემს კომისიას საშუალებას ყველაზე დიდ უსამართლობებზე მოახდინოს კონცენტრაცია და პირველ რიგში ეს მოხდება სისხლის სამართლის საქმეებზე.”
იუსტიციის მინისტრი ამბობს, რომ ხარვეზების დამდგენი კომისიის ამოქმედების თარიღი მის დაფინანსებაზე იქნება დამოკიდებული: “მე ველოდები, რომ თუკი ბიუჯეტი ამის საშუალებას მოგვცემს, და დარწმუნებული ვარ, მოგვცემს, მომდევნო თვეებში უკვე კომისია ამუშავდება. მისი დაკომპლექტება აღარ იქნება ხელისუფლების უფლებამოსილება _ ამას გააკეთებს არასამთავრობო სექტორი, საზოგადოება და კომისიის წევრების ასარჩევი კრიტერიუმები იგივე იქნება, რაც იუსტიციის უმაღლესი საბჭოს არამოსამართლე წევრებისთვისაა დადგენილი”.
უკვე ცნობილია, რომ ხარვეზების დამდგენი კომისია მხოლოდ სისხლის სამართლის საქმეებს განიხილავს.
