ფინანსთა სამინისტრომ თანამშრომლებისთვის წინასაარჩევნოდ განმარტებები მოამზადა

განმარტებები საარჩევნოკოდექსის შესაბამისადაა მომზადებული და გაწერილია წინასაარჩევნო კამპანიის (აგიტაციის) პერიოდში თანამშრომელთა მხრიდან გასათვალისწინებელი ზოგიერთი მოთხოვნა.

გთავაზობთ ფინანსთა სამინისტროს მიერ მომზადებულ განმარტებებს:

წინასაარჩევნო კამპანია არის საარჩევნო სუბიექტის/საარჩევნო სუბიექტობის კანდიდატის მიერ არჩევნებში მონაწილეობისა და გამარჯვების მიზნით ჩატარებულ ღონისძიებათა ერთობლიობა;

წინასაარჩევნო აგიტაცია კი არის ამომრჩეველთა მოწოდება საარჩევნო სუბიექტის/საარჩევნო სუბიექტობის კანდიდატის მხარდასაჭერად ან საწინააღმდეგოდ, აგრეთვე ნებისმიერი საჯარო მოქმედება, რომელიც ხელს უწყობს ან ხელს უშლის მის არჩევას, ან/და რომელიც შეიცავს წინასაარჩევნო კამპანიის ნიშნებს, მათ შორის, წინასაარჩევნო ღონისძიების ორგანიზებაში/ჩატარებაში მონაწილეობა, საარჩევნო მასალების შენახვა ან გავრცელება, მხარდამჭერთა სიებზე მუშაობა, პოლიტიკური პარტიების წარმომადგენლობებში ყოფნა;

წინასაარჩევნო კამპანია (აგიტაცია) იწყება არჩევნების დანიშვნის თაობაზე გამოცემული სამართლებრივი აქტის გამოქვეყნებისთანავე. საქართველოს პრეზიდენტის მიერ 2013 წლის 4 ივლისს მიღებულ იქნა განკარგულება, რომლის მიხედვითაც საქართველოს პრეზიდენტის მორიგი არჩევნები დაინიშნა 2013 წლის 27 ოქტომბერს, შესაბამისად, 2013 წლის 4 ივლისიდან უკვე დაწყებულია წინასაარჩევნო კამპანია (აგიტაცია).

სახელმწიფო ხელისუფლების ორგანოების საჯარო მოხელეებს უფლება აქვთ მიიღონ მონაწილეობა წინასაარჩევნო კამპანიაში (აგიტაციაში), თუმცა მათ ამის გაკეთების უფლება არა აქვთ სამუშაო საათების განმავლობაში ან/და როდესაც ისინი უშუალოდ ასრულებენ სამსახურებრივ ფუნქციებს (ანუ, შეიძლება თანამშრომლების მიერ სამსახურებრივი ფუნქციების შესრულება მოხდეს არასამუშაო საათებშიც ან არასამუშაო დღესაც, მაგრამ მიუხედავად ამისა, ამ პერიოდში მას მაინც ეკრძალება წინასაარჩევნო კამპანიაში (აგიტაციაში) მონაწილეობა.

სამინისტროს სტრუქტურული ქვედანაყოფების (დეპარტამენტების, სამსახურების, ბიუროს) და სამმართველოების ხელმძღვანელებს ეკრძალებათ იყვნენ საუბნო საარჩევნო კომისიის წევრები.

არჩევნების დანიშვნიდან არჩევნ¬ების საბოლოო შედეგების გამოქვეყნებამდე აკრძალულია:

ა) საარჩევნო სუბიექტების, საარჩევნო სუბიექტობის კანდიდატებისა და მათი წარმომადგენლების მიერ პირადად ან ვინმეს მეშვეობით საქართველოს მოქალაქეებისათვის ფულადი სახსრების, საჩუ¬ქრებისა და სხვა მატერიალურ ფასეულობათა გადაცემა (მიუხედავად მათი ღირებულებისა), შეღავათიან ფასად საქონლის მიყიდვა, უფასოდ ნებისმიერი საქონლის (გარდა ამ კანონით გათვა¬ლი¬¬სწინებული სააგიტაციო მასალისა) მიწოდება ან გავრცელება, აგრეთვე საქართველოს მოქალაქეების დაინტერესება ფულადი სახსრების, ფასიანი ქაღალდებისა და სხვა მატერიალურ ფასეულობათა გადაცემის და¬პი¬¬რებით (მიუხედავად მათი ღირებულებისა) (ანუ, ჩვენი თანამშრომლის მიერ არ უნდა მოხდეს საარჩევნო სუბიექტის სასარგებლოდ ამ მოქმედებების განხორციელება, მათ შორის არასამუშაო პერიოდში);

ბ) ფიზიკური და იურიდიული პირების მიერ პირადი ფულადი სახსრებით ან/და საარჩევნო სუბიექტის სახსრებით ისეთი სამუშაოს შესრულება ან მომსახურების გაწევა (გარდა „სახელმწიფო შესყიდვების შესახებ“ საქართველოს კანონით დადგენილი წესით მოპოვებული სამუშაოს შესრულებისა ან მომსახურების გაწევისა), რომელიც საქართველოს კანონმდებლობის შესაბამისად განეკუთვნება საქართველოს სახელმწიფო ხელისუფლების ორგანოთა კომპეტენციას. (ანუ, ჩვენი თანამშრომლის მიერ, რასაკვირველია იგულისხმება არასამუშაო პერიოდიც, დაუშვებელია პირადი სახსრებითაც გასწიოს ისეთი სამუშაო, რისი შესრულებაც სახელმწიფო ორგანოების ფუნქციაა. სახელმწიფო ორგანოთა ფუნქციას კი, შეიძლება ითქვას რომ განეკუთვნება ნებისმიერი სფერო და შესაბამისად ნებისმიერი საქმიანობა (ანუ, დეფინიცია თითქმის შეუძლებელია))

სახელმწიფო ხელისუფლების ორგანოების საჯარო მოხელეებს წინასაარჩევნო კამპანიის პერიოდში ეკრძალება რომელიმე პოლიტიკური პარტიის, საარჩევნო სუბიექტობის კანდიდატის, საარჩევნო სუბიექტის მხარდასაჭერად ან საწინააღმდეგოდ წინასაარჩევნო აგიტაციისა და კამპანიის პროცესში ადმინისტრაციული რესურსების გამოყენება; (აღნიშნული გულისხმობს ნებისმიერი ადმინისტრაციული რესურსის, ტელეფონის, ფაქსის, კომპიუტერის, ქაღალდის, ბაინდერის, ტრანსპორტის, საწვავის და სხვა ნებისმიერი ქონების, რომელიც ადმინისტრაციული ორგანოს ბალანსზე იმყოფება, გამოყენებას) მათ შორის, იკრძალება:

ა) სახელმწიფო ხელისუფლების ორგანოების მიერ დაკავებული შენობების გამოყენება იმ შემთხვევაში, თუ სხვა პოლიტიკურ პარტიებს, საარჩევნო სუბიექტობის კანდიდატებს, საარჩევნო სუბიექტებს არა აქვთ იმავე ან ანალოგიური დანიშნულების შენობების იმავე პირობებით გამოყენების შესაძლებლობა;

ბ) სახელმწიფო ხელისუფლების დაწესებულებებისათვის განკუთვნილი საკომუნიკაციო საშუალებების, საინფორმაციო მომსახურებისა და სხვადასხვა სახის ტექნიკის გამოყენება;

გ) სახელმწიფო ხელისუფლების ორგანოების საკუთრებაში არსებული სატრანსპორტო საშუალებების გამოყენება.

ადმინისტრაციული რესურსის გამოყენებად ჩაითვლება აგრეთვე საქართველოს სახელმწიფო ბიუჯეტის დაფინანსებით ორგანიზებულ ღონისძიებაზე/პრეზენტაციაზე ორგანიზატორის მიერ წინასაარჩევნო აგიტაციის გაწევა.

წინასაარჩევნო აგიტაციაში მონაწილეობის უფლების მქონე სახელმწიფო ხელისუფლების ორგანოში მომუშავე თანამდებობის პირს, ეკრძალება რომელიმე პოლიტიკური პარტიის, საარჩევნო სუბიექტობის კანდიდატის, საარჩევნო სუბიექტის მხარდასაჭერად ან საწინააღმდეგოდ წინასაარჩევნო აგიტაციისა და კამპანიის წარმოების პროცესში თავისი თანამდებობრივი ან სამსახურებრივი მდგომარეობის გამოყენება. აღნიშნული გულისხმობს შემდეგს:

ა) სამსახურებრივად დაქვემდებარებული ან სხვაგვარად დამოკიდებული პირის ჩაბმას ისეთ საქმიანობაში, რომელიც ხელს უწყობს კანდიდატის წარდგენას ან/და არჩევას;

ბ) სახელმწიფო ხელისუფლების ორგანოს მიერ დაფინანსებული სამსახურებრივი მივლინებების დროს ხელმოწერების შეგროვებას და წინასაარჩევნო აგიტაციის გაწევას;

გ) წინასაარჩევნო აგიტაციის გაწევას სამუშაო საათების განმავლობაში ან/და სამსახურებრივი ფუნქციების შესრულებისას.

აღმასრულებელი ხელისუფლების დაწესებულებებში წინასაარჩევნო კამპანიის (აგიტაციის) ჩატარება აკრძალულია.

წინასაარჩევნო აგიტაციაში მონაწილეობის უფლების მქონე სახელმწიფო ხელისუფლების ორგანოში მომუშავე პირის მიერ (ისევე როგორც სხვა ნებისმიერი პირის მიერ) აკრძალულია სააგიტაციო მასალის განთავსება/გაკვრა საკულტო ნაგებობებზე, კულტურული მემკვიდრეობის შენობა-ნაგებობებზე, სახელმწიფო ხელისუფლებისა და ადგილობრივი თვითმმართველობის ორგანოების, სასამართლოების, პროკურატურის, სამხედრო შენაერთებისა და პოლიციის შენობების ინტერიერებსა და ექსტერიერებში, აგრეთვე საგზაო ნიშნებზე.

არჩევნების დღემდე მე-60 დღიდან არჩევნების დღის ჩათვლით აკრძალულია ისეთი პროექტების/პროგრამების განხორციელება, რომლებიც მანამდე არ იყო გათვალისწინებული საქართველოს სახელმწიფო ბიუჯეტში, კერძოდ აკრძალულია სოციალური გასაცემლების (პენსია, სოციალური დახმარება, შემწეობა და სხვა) ოდენობების ზრდა, გარდა იმ გასაცემლებისა, რომელთა ოდენობების ზრდა საქართველოს კანონმდებლობით გათვალისწინებული იყო არჩევნების დღემდე არანაკლებ 60 დღით ადრე. დაუშვებელია სახელმწიფო ბიუჯეტის სახსრებით ისეთი ვიდეო-აუდიომასალის, ვებგვერდის დამზადება/შექმნა, რომელშიც/რომელზეც ასახულია საარჩევნო სუბიექტის არჩევნებში მონაწილეობის რიგითი ნომერი, არჩევნებში მონაწილე ამა თუ იმ სუბიექტის მხარდასაჭერი/საწინააღმდეგო ინფორმაცია.