როგორც გაირკვა, ბათუმის ქუჩებში ისინი მსუბუქი ავტომობილით გადაადგილდებოდნენ, როდესაც პოლიციის თანამშრომლებმა შემოწმების მიზნით საბუთების წარდგენა მოსთხოვეს. გავრცელებული ინფორმაციით ჩეჩენმა პირმა ცეცხლსასროლი იარაღიდან რამდენჯერმე გაისროლა.
გასროლის შედეგად ბრმა ტყვიით მუცლის არეში დაიჭრა მოქალაქე, რომელიც პუშკინის ქუჩაზე იმყოფებოდა, ხოლო პოლიციის თანამშრომელს ჭრილობა ხელის არეში აქვს მიყენებული. ჩეჩენი მოქალაქის მიერ ცეცხლის გახსნის შემდეგ საპასუხო გასროლა განახორციელეს პოლიციის თანამშრომლებმა, რა დროსაც დაიჭრა ჩეჩენი მოქალაქე.
სამივე დაჭრილი შემთხვევის ადგილთან ბათუმის რესპუბლიკურ საავადმყოფოში გადაიყვანეს და ქირურგიული ოპერაცია ჩაუტარეს.
ევროპის ჩემპიონი ფირუზ წულუკიძე და მისი მწვრთნელი თემურ ბახუნდარიძე “გურია ნიუსთან” ერთი თვის წინ აცხადებდნენ, რომ შინაგან საქმეთა სამინისტრო მათ რელიგიური ნიშნით დევნიდა. წულუკიძე ბულგარეთში ოლიმპიადაზე მიემგზავრებოდა, როდესაც აეროპორტიდან უკან მოაბრუნეს, თუმცა მისთვის არაფერი აუხსნიათ. “გურია ნიუსს” ჭიდაობის ფედერაციაში უთხრეს, რომ სპორტსმენს ტრავმა ჰქონდა და სწორედ ეს გახდა მისი სათადარიგო მოჭიდავით ჩანაცვლების მიზეზი. დღეს კი “რუსთავი 2”-ის ეთერში ჭიდაობის ფედერაციის ხელმძღვანელმა ლუკა კურტანიძემ განაცხადა, რომ წულუკიძეს, როგორც პერსპექტიულ ახალგაზრდას ყველანაირად უწყობდნენ ხელს, მაგრამ როდესაც მან ანტისახელმწიფოებრივი განცხადებების გაკეთება დაიწყო და ფედერაციამაც შესაბამისი ზომები გაატარა. წულუკიძის კრიმინალთან კავშირს მაშინ არც შს სამინისტრო ადასტურებდა.
_ დანაშაულში რომ იყოს ეჭვმიტანილი, აეროპორტიდან სახლში კი არ გაუშვებდნენ, დაიჭერდნენ, _ უთხრა შსს სამინისტროს პრესსამსახურის უფროსმა ნინო გიორგობიანმა “გურია ნიუსს”.
