სადაც ხდება წარდგინებები თეატრების ხელმძღვანელების დანიშვნასთან დაკავშირებით.
ახლახან ამ საბჭოს მიერ და კულტურის მინისტრის თანხმობით, ოზურგეთის ალ. წუწუნავას სახელობის სახელმწიფო თეატრის სამხატვრო ხელმძღვანელად დაინიშნა რეჟისორი ვასილ ჩიგოგიძე.
დღეს ის ჩვენი სტუმარია.
_ ბატონო ვასილ, მშობლიურ კუთხეს და ოზურგეთის თეატრს დაუბრუნდით…
_ სხვადასხვა ქვეყნის თეატრებში მიმუშავია, მაგრამ ვერსად ვერ ვგრძნობ თავს ისე კარგად, როგორც ოზურგეთში. ამჟამად ჩემი წარდგინება მოხდა საქართველოს თეატრის მოღვაწეთა კავშირის მიერ, რის საფუძველზეც მინისტრმა დაწერა ბრძანება ჩემი დანიშვნის შესახებ. ეს ბატონი გიგა ლორთქიფანიძის ბოლო სურვილი იყო, რომელიც დაჟინებით მთხოვდა, ოზურგეთის თეატრს დავბრუნებოდი. ამ თანამდებობაზე წლების მანძილზე მუშაობდა რეჟისორი ოთარ კუტალაძე. ბატონი ოთარი, რა თქმა უნდა, კვლავ ნაყოფიერად გააგრძელებს შემოქმედებით საქმიანობას და საინტერესო სპექტაკლებით წარდგება მაყურებლის წინაშე. ოზურგეთის თეატრის მმართველი წლების მანძილზე არის ზაზა ჯინჭარაძე. ზაზა ჩემი სტუდიელია, ჩემს ხელში გაიზარდა, აქვს სერიოზული განათლება და დაჯილდოებულია ორგანიზატორული ნიჭით, რომელიც ღირსეულად იღვწის თეატრის წინსვლისა და განვითარებისთვის. ამიტომ, მე, როგორც სამხატვრო ხელმძღვანელმა, კანონის შესაბამისად, ზაზა ჯინჭარაძე წარვადგინე თეატრის დირექტორის თანამდებობაზე, რაზედაც თანხმობა მივიღეთ, ასე რომ, შეგიძლიათ, მიულოცოთ.
_ თქვენ წლების მანძილზე მოღვაწეობდით ლიტვაში, სადაც სპექტაკლების დადგმასთან ერთად, ხელმძღვანელობდით თეატრალურ ფესტივალებსა და კონკურსებს, ასევე, იყავით ესპანეთის საფესტივალო საერთაშორისო ორგანიზაციის სამხატვრო ხელმძღვანელი. სამომავლოდ კვლავ გააგრძელებთ თუ არა შემოქმედებით ურთიერთობას ლიტვასთან და რომელ ფესტივალებს უხელმძღვანელებთ?
_ ამ ეტაპზე დავიტოვე მხოლოდ ორი ფესტივალი ესპანეთში, რომელიც ჩატარდება ივნისსა და სექტემბერში, დანარჩენი გადავაბარე ჩემს კოლეგებს.
_ როდის გაიხსნება სეზონი და რომელი სპექტაკლით წარდგებით მაყურებლის წინაშე?
_ სეზონი გაიხსნება ოქტომბერში და მაყურებელს მივესალმებით სპექტაკლით _ “გამარჯობათ, ხალხო!”
_ მაყურებელს აინტერესებს რომელ სპექტაკლზე დაიწყებთ მუშაობას…
_ ალბათ, ეს იქნება “ანტიგონე”.
_ მიიღებენ თუ არა ამ სპექტაკლში მონაწილეობას მოწვეული მსახიობები?
_ ჩვენ მოლაპარაკებები გვაქვს ცნობად სახეებთან, როგორებიც არიან: რუსკა მაყაშვილი და ზურაბ ცინცქილაძე. მე მაქსიმალურად ვეცდები, რომ ჩვენი თეატრის სპექტაკლები დადგან და მასში მონაწილეობა მიიღონ ქართული სცენის კორიფეებმა. ჩვენ ყველაფერი უნდა გავაკეთოთ იმისთვის, რომ ოზურგეთის თეატრი ერთ-ერთი მოწინავე იყოს საქართველოში და ღირსეულად წარდგეს მსოფლიოს სხვადასხვა თეატრალურ ცნობილ ფესტივალებზე.
_ როგორც ცნობილია, თქვენ არა მხოლოდ თეატრის სამხატვრო ხელმძღვანელად დაინიშნეთ, არამედ, ოზურგეთის კულტურულ ღონისძიებასაც უხელმძღვანელებთ.
_ საერთოდ, ოზურგეთი ფოლკლორის ქალაქია. აუცილებლად უნდა აღდგეს სახალხო სანახაობა “ალეგრობა”; გიორგი სალუქვაძის სახელობის საერთაშორისო ფესტივალი კიდევ უფრო გაძლიერდეს; ექვთიმეობა ყოველწლიურად უნდა აღინიშნოს, ბევრი მივიწყებული საუკეთესო ტრადიცია კვლავ ავაღორძინოთ. ამ საშვილიშვილო საქმეებში ჩვენ გვერდით არიან ჩვენი კუთხის მამულიშვილები: ბატონები ანზორ ერქომაიშვილი, ჯემალ ჭკუასელი, ნოდარ გოგუა, მამა იოანე (კიკვაძე) და სხვები.
_ რა არის თქვენი პროფესიის მთავარი სირთულე?
_ მე არ ვარ მხატვარი, არც კომპოზიტორი, მე არ ვარ ხელოვნების იმ დარგის წარმომადგენელი, რომ შეგეძლოს შენს თავში ჩაიკეტო და შექმნა ნაწარმოები, რომელიც სამუდამოდ იარსებებს. რეჟისორი შენს თავს არ ეკუთვნი _ შენ დამოკიდებული ხარ სადადგმო ჯგუფზე. მოგეხსენებათ, თეატრი სინთეზური ხელოვნებაა, ანუ რეჟისორმა უნდა შეადუღაბოს ლიტერატურული მასალა, მხატვრობა, მუსიკა, ქორეოგრაფია, პლასტიკა და მიიღოს სპექტაკლი. ამაში უზარმაზარი შრომა იდება, იხსნება ფარდა და იქ რა მოქმედებები განვითარდება, უკვე შენ ვეღარ აკონტროლებ _ შენი კოლოსალური შრომა დამოკიდებულია მსახიობზე, მის ნიჭსა და უნარზე, რათა მართალი სახით წარდგეს მაყურებლის წინაშე.
_ რა მდგომარეობაა დღეს ოზურგეთის თეატრში, როგორც შემოქმედებითი, ასევე მატერიალურ-ტექნიკური ბაზის თვალსაზრისით?
_ ძალიან მძიმე მდგომარეობაა მატერიალურ-ტექნიკური მდგომარეობის მხრივ. მსახიობებს გაუსაძლის მდგომარეობაში უწევთ მუშაობა. მოგეხსენებათ ოზურგეთის თეატრი სახელმწიფო თეატრია და დიდი იმედი მაქვს, რომ ბატონმა ბიძინა ივანიშვილმა, რომელმაც სიცოცხლე შეუნარჩუნა საქართველოში არსებულ კულტურის მრავალ კერას, ოზურგეთის თეატრსაც დაუთმობს მნიშვნელოვან ყურადღებას და მისი თანადგომით ჩვენს თეატრში შესაძლებელი იქნება, სრულყოფილ პირობებში ჩავატაროთ რეპეტიციები, ვიზეიმოთ მაღალ დონეზე წარმოდგენილი სპექტაკლებითა და შემოქმედებით ღონისძიებებით. ასევე, დიდი იმედი მაქვს ადგილობრივი ხელისუფლების წარმომადგენლების _ მჯერა, რომ ისინი ჩვენ გვერდით დადგებიან და სათანადო დახმარებას გაგვიწევენ. რაც შეეხება თეატრის დასს, უნიჭიერესი მსახიობები გვყავს, მაგრამ ასევე აუცილებელია, ახალი სახეები გამოჩნდნენ ჩვენი თეატრის სცენაზე. სულ მალე თეატრთან ჩამოყალიბდება სტუდია და ყოველ წელს ნიჭიერი და ღირსეული ახალგაზრდები ჩააბარებენ თეატრალურ უნივერსიტეტში, ჩვენ ვიზრუნებთ მათ სტიპენდიასა და სხვა პრობლემების მოგვარებაზე. ხოლო ყოველ ოთხ წელიწადში, იქნება ერთ-ერთი ახალი ჯგუფი _ ოზურგეთის ჯგუფი.
_ როგორ ფიქრობთ, რა სახის სპექტაკლები უნდა შესთავაზოს თეატრმა მაყურებელს?
_ დღეს მაყურებლისთვის საინტერესო იქნება ყველა თემატიკის სპექტაკლი, რომელიც მაღალპროფესიულ დონეზე გახორციელდება. ამ ქაოსურ პერიოდში მაყურებელიც გაურკვეველ მდგომარეობაშია, ამიტომ საზოგადოებას ძალიან მშვიდად და პროფესიონალიზმით უნდა ვაჩვენოთ გზა სულიერებისკენ, თუ საით უნდა წავიდეს მისი აზროვნება..
_ ბატონო ვასილ, გაეზრდებათ თუ არა მსახიობებსა და ტექნიკურ პერსონალს ხელფასები?
_ აუცილებლად უნდა ვიზრუნოთ მსახიობებისა და ტექნიკური პერსონალის ხელფასის ფონდის გაზრდაზე. ასევე შეიქმნება ფონდი, რომლის საშუალებით მსახიობი ყოველ შესრულებულ როლზე (შეფასდება 10 -ბალიანი სისტემით) მიიღებს ხელფასის დანამატს. ეს ევროპული გამოცდილებაა და ვიმედოვნებ, ჩვენთანაც წარმატებით დამკვიდრდება.
_ როგორც ვიცით, თქვენ უკვე დაიწყეთ მზადება თეატრის 150 წლის იუბილესთან დაკავშირებით.
_ დიახ, ჩვენ უკვე გვაქვს საიუბილეო საღამოს მონახაზი, დავიწყეთ მუშაობა წიგნის პროექტზე, ჩვენ გვექნება შესაძლებლობა, ოზურგეთის თეატრის სცენაზე სპექტაკლები ვნახოთ, რომლის რეჟისორები იქნებიან: რობერტ სტურუა, თემურ ჩხეიძე, ლევან წულაძე და სხვები. მოკლედ, თეატრის ისტორია კიდევ უფრო მდიდარი და მრავალფეროვანი გახდება. ასე ნებიჯ-ნაბიჯ მივალთ საიუბილეო თარიღამდე. რაც მთავარია, ოზურგეთის თეატრი 2014 წელს უნდა გახდეს თეატრების საერთაშორისო ფესტივალის წევრი. ასე რომ, დიდი გეგმებითა და იმედებით ჩამოვედი და მჯერა, ჩემი მეგობრებისა და კოლეგების თანადგომით, ოზურგეთი კულტურის ერთ-ერთ მძლავრ კერად იქცევა.
