რაც შეეხება ერთთვიან თუ ერთწლიან ბოსტნეულ კულტურებს, სექტემბერში აუცილებლად უნდა დავთესოთ ქინძი, ოხრახუში, სასურველია ნიახურის დათესვაც. განსაკუთრებით აუცილებელია სექტემბრის დასაწყისში ზამთრის ბოლოკის დათესვა. ის არ უნდა აგვერიოს თვის ბოლოკში, რადგან ზამთრის ბოლოკს შემოდგომაზე მიწისზედა მწვანე მასა ეფურჩქნება, ზამთარში კი ხდება ბოლქვების ზრდა. თვის ბოლოკი კი, როგორც მისი სახელწოდებაც გვიჩვენებს, შესაძლებელია, დავთესოთ ყოველი თვის დასაწყისში.
სექტემბრის დასაწყისში აუცილებლად უნდა დავთესოთ ფოთლოვანი ხახვი, რომელსაც მრავალშვილასაც ეძახიან. არ დაგვავიწყდეს მწვანე სალათის დათესვა. მართალია, ნივრის დათესვა მიზანშეწონილია აგვისტოში, მაგრამ ვისაც მოუგვიანდა, სასწრაფოდ უნდა დაითესოს სექტემბრის დასაწყისში.
როგორ გავახმოთ ზაფრანის ყვავილი, წითელი წიწაკა, პიტნა, მოცვის ჩაი
ზაფრანის ყვავილს ხშირად ძაფზე აცმულს ახმობენ, თუმცა, ასე გახმობა და შენახვა კარგია მხოლოდ სათესლე მასალისთვის. დანარჩენ შემთხვევაში კი თავთავი ყუნწთან უნდა მოვაჭრათ, ყვავილედი წვრილად დავჭრათ და ქაღალდზე ან ფანერზე თხლად გაფენილი ჩრდილში გავახმოთ. სასურველია, სახლის მეორე სართულზე, რომელიმე ოთახში მოვათავსოთ, იქ, სადაც ჰაერი მოძრაობს.
რაც შეეხება მწარე წიწაკას, გასაკვირია, როცა მის აცმულებს არა ერთ ოჯახში მზის გულზე გაკიდულს ვხედავთ. წიწაკა აუცილებლად უნდა ჩამოვკიდოთ ისეთ ადგილზე, სადაც უფრო ორპირი ქარია და მზის სხივი არ მიწვდება. წინააღმდეგ შემთხვევაში, ის დაკარგავს სიწითლეს და მიიღებს ღია ჩალისფერს. ასევე, ნახევრად მაინც დაკარგავს არომატს და ასე აუცილებელ სიცხარეს.
პიტნის ფოთლებს აყვავებული ნაწილიანად მოვკრეფთ, წვრილად დავჭრით და ისეთივე წესით გავახმობთ, როგორც ზაფრანის ყვავილს.
რაც შეეხება მოცვის ფოთლებისგან დამზადებულ ჩაის, უნდა შევარჩიოთ უფრო ნაზი დუყები. მოცვის უამრავი ჯიში ხარობს გურიის ტყეებში და დაახლოებით მოვჟღლიმოთ ისე, როგორც ჩაი. ოღონდ, ჩაის მსგავსად დიდხანს სრესა არ სჭირდება მოცვის ფოთოლს. შემდეგ გავშალოთ სუფთა ტილოზე და გავახმოთ ჩრდილში, სადაც კარგად იმოძრავებს ჰაერი _ ჩახუთულ სივრცეში ლპობას დაიწყებს. გამოცდილებით, დრო და დრო, ოქტომბრის შუა რიცხვებამდეა შესაძლებელი ზემოთ აღნიშნული პროცედურების ჩატარება, ოღონდ უკვე გამხმარი და გამზადებული მასა არ უნდა შევურიოთ ნედლს. საბოლოოდ, გამხმარი ერთად მოვათავსოთ მარლის ტოპრაკში, შევინახოთ და გამოვიყენოთ ზამთარში თუ ნებისმიერ სხვა დროს.
