“ნებისმიერ მოქალაქეზე, მიუხედავად აღმსარებლობისა, კანონები თანაბრად უნდა ვრცელდებოდეს”

ამის შესახებ ჰამერბერგმა მედიის წარმომადგენლებთან დღევანდელ შეხვედრაზე განაცხადა. მისივე თქმით, ეკლესიის ლიდერებიც და სასულიერო პირებიც, იქიდან გამომდინარე, რომ საზოგადოების წარმომადგენლები არიან, კანონს უნდა ემორჩილებოდნენ.

“ჩვენ ვიცით, რომ ეკლესიის ლიდერებიც არიან საზოგადოების წარმომადგენლები. შესაბამისად, მათაც პატივი უნდა სცენ კანონს. თუმცა, ვხედავ, რომ პროკურატურა ყოყმანობს, დაიწყოს გარკვეული საქმეების წარმოება. შეიძლება ის ფიქრობს, რომ სამღვდელოებასთან დაპირისპირება ამ ეტაპზე არ იყოს მომგებიანი, მაგრამ ეს საკითხი სერიოზულად უნდა იყოს განხილული, მათ შორის, მუსლიმთა თემთან დაკავშირებული საკითხებიც საჭიროებს სერიოზულ გამოკვლევას”, _ დასძინა თომას ჰამერბერგმა.

ამასთან, მისივე განმარტებით, სტანდარტები ყველა რელიგიისთვის ერთია და ადამიანის უფლებების დაცვა ყველა რელიგიას თანაბრად ეხება:

“ყველა რელიგია თანაბარი უნდა იყოს, რადგან ადამიანის უფლებათა დეკლარაცია იყენებს სიტყვას “ყველა”, ე.ი. ის ეხება ყველას”, _ აღნიშნა ჰამერბერგმა.

მისივე თქმით, ვერც პატრიარქი და ვერც მუფტი ვერ დადგებიან კანონზე მაღლა, რადგან ისინიც საზოგადოების წევრები არიან.

“საქართველოს დემოკრატიული ინიციატივის” გამგეობის წევრი გიორგი მშვენიერაძე “გურია ნიუსთან” საუბრისას ამბობს, რომ მოქალაქეების კანონის წინაშე თანასწორობის შეხსენება სახელმწიფოსთვის სირცხვილია.

“სირცხვილია ჩვენი სამხელმწიფოსთვის, როცა ჰამერბერგის მხრიდან გვიწევს შეხსენება იმისა, რომ ნებისმიერი მოქალაქე, მიუხედავად მისი სოციალური სტატუსისა თუ აღმსარებლობისა, არის თანასწორი, საზოგადოების თანაბარი წევრი _ ყველა მოქალაქეზე კანონები თანაბრად უნდა ვრცელდებოდეს. ეს ეხება როგორც მართლმადიდებლურ ეკლესიას, ასევე სხვა რელიგიას და მის წარმომადგენელ პირებს.

შესაბამისად, ცალსახაა, რომ კანონის უზენაესობა ნიშნავს, კანონი იყოს ყველასათვის და კანონი იყოს ყველასათვის თანაბარი,” – უთხრა “გურია ნიუსს” მშვენიერაძემ.

მისივე თქმით, პროკურატურამ საქმე, რომელიც სასულიერო პირებს ეხებოდა, სავარაუდოდ, არაადეკვატურად გამოიძია და შესაბამისად, არაადეკვატური ზომები იყო მათი მხრიდან მიღებული.

“აქცენტები რაზეც იყო დასმული ამ განცხადებაში, სახელმწიფოს მოუწოდებდა, რომ გამოძიება მოხდეს. კონკრეტულად, პროკურატურაზე იყო მითითება და უნდა ვიგულისხმოთ, რომ აქ მოიაზრება 17 მაისის ინციდენტი, სადაც რამდენიმე სასულიერო პირი ორგანიზებას უწევდა კონტრაქციას, რომელმაც შემდეგ უკანონო ხასიათი მიიღო და დაპირისპირებაში გადაიზარდა. სამწუხაროდ, ამ საკითხზე ჩვენ საზოგადოებას არ მიგვიღია სრული და ამომწურავი ინფორმაცია. თუ როგორ დაასრულა პროკურატურამ საქმის წარმოება, ხოლო რა ინფორმაციაც მივიღეთ, გვიბიძგებს იქითკენ, რომ არაადეკვატური ზომები იყო გამოყენებული და არაადეკვატურად იყო გამოძიება ჩატარებული.

საზოგადოება ვერ გამოვიდა იმ განცდიდან, რომ ჩვენი, როგორც სახელმწიფოს ამოსავალი წერტილი, არის საეროობა სეკულარიზმი. ხალხი ვერ მიჯნავს ერთმანეთისგან სასულიერო დოგმატიკასა და საერო კანონმდებლობას, შესაბამისად ჩვენ როცა ვსაუბრობთ ვინმეს პასუხისგებაზე , დასჯაზე აქ იგულისხმება ის, რომ ამ ადამიანებმა დაარღვიეს სამოქალაქო კანონი, ის კანონი, რომელიც ყველასთვის, მიუხედავად მისი რწმენისა, საერთოა,” _ ამბობს მშვენიერიძე და დასძენს, რომ თუნდაც მოჰყვეს სასულიერო პირების მიმართ კანონის უზენაესობის გამოყენებას საზოგადოების უკმაყოფილება, ეს არაა სახელმწიფოსთვის გამართლება, რადგან “კანონი მკაცრია მაგრამ კანონია და ის აუცილებლად უნდა შესრულდეს.”