_ თორმეტი სულისგან შემდგარი ოჯახი, ფაქტობრივად, ღია ცის ქვეშაა დარჩენილი.
იქ მისულებს მართლაც უკიდურესი მდგომარეობა დაგვხვდა და ნანახმა ყოველგვარ მოლოდინს გადააჭარბა. ეზოში დგას ორი ავარიული სახლი, სადაც სამი ძმა ცხოვრობს მცირეწლოვანი შვილებით. მათგან ყველაზე უმცროსი ცხრა თვისაა; ერთ-ერთი პატარა კი მუდმივად საჭიროებს ექიმის მეთვალყურეობას, რის საშუალებაც ოჯახს არ აქვს.
ზენაიშვილების თქმით, მიუხედავად იმისა, რომ განცხადებით არაერთხელ მიმართეს ადგილობრივ ხელისუფლებას, არანაირი დახმარება არ მიუღიათ. სამი თვეა სოციალური დახმარებაც მოეხსნათ, რაც ოჯახის ერთადერთი შემოსავალი იყო.
_ მაზლს 4 ბავშვი ჰყავს; მათ შორის ერთ მცირეწლოვანს ჯანმრთელობის პრობლემა აქვს და იმის საშუალება არ არის, ვუმკურნალოთ. უსახლკარობის გამო ჩვენთან ცხოვრობენ; არადა, ჩვენც უკიდურეს მდგომარეობაში ვართ _ როცა გაწვიმდება, ისე წვიმს სახლში, როგორც გარეთ. ვცხოვრობთ ამ პატარა სახლში ორი ძმა _ ომარ და ისაკ ზენაიშვილები ოჯახებით; 12 სულიდან 7 ბავშვია. მეზობლები დაგვეხმარნენ და დავიწყეთ სახლის აშენება, მაგრამ იმათაც არ აქვთ საშუალება, ვის რა უნდა მოვთხოვოთ?! სოციალური დახმარება სამი თვეა არ მიგვიღია, შეგვიწყვიტეს; გვითხრეს, სექტემბერში აიღებთო. ერთჯერად დახმარებას რაც შეეხება, მე სულ ახლახან შევიტანე განცხადება, ჩემი მაზლი და მისის ოჯახი კი, უკვე სამი წელია ითხოვენ, მაგრამ არავითარი რეაგირება არ მოჰყოლია მათ თხოვნას. ადგილობრივ რწმუნებულს მივმართეთ და მან ჩვენი განცხადება წაიღო ლანჩხუთში. კაცები უმუშევრები არიან, _ გვითხრა ნანული გოგუაძემ.
_ თავდაპირველად, ლანჩხუთში სხვის ოჯახში ვცხოვრობდით; დახმარებისთვის როცა მივმართეთ მაშინდელ გამგებელს გია გოგუაძეს, შემოგვთავაზეს სოფელში წადით და მიტოვებულ ოჯახში შედითო, მაგრამ ასეთი სახლი ვერსად ვიპოვეთ. უკვე 2 წელია აქ ვართ ჩამოსული. ახლა დასაშლელი სახლი ვიშოვეთ, მაგრამ ფული ჯერ არ მიგვიცია. დავიწყეთ მისი აშენება, მაგრამ როგორ მოვახერხებთ, როცა ერთი პატარა ავადმყოფი, სამი კი სკოლამდელი ასაკის ბავშვი გვყავს?! მაზლის ოჯახს შემოვეკედლეთ, მაგრამ მცირეწლოვანი ბავშვები ჰყავთ ავარიულ სახლში.
12 სული ერთ ოთახში ვიძინებთ. სოციალურ დახმარებას არც ჩვენ ვიღებთ… ძალიან ცუდ მდგომარეობაში ვართ. იქნებ, სახლის აშენებაში დაგვეხმარონ და თავშესაფარი გაგვიჩნდეს, _ ამბობს ჩვენთან საუბარში მარინა ტუღუში.
მუნიციპალიტეტის გამგებლის ზაზა ურუშაძის თქმით, ლანჩხუთში, მსგავსს პირობებში 450 ოჯახი ცხოვრობს: _ ცხადია, ერთბაშად ყველას დახმარებას, საცხოვრებელი პირობების გაუმჯობესებას ბიუჯეტი ვერ შეწვდება. კომისიამ შეისწავლა არსებული მდგომარეობა და რისი გაკეთებაც შეგვეძლება, აუცილებლად დავეხმარებით; რაც შეეხება სოციალურ შემწეობას, მოხდა გადამოწმება და სამი თვის შემდეგ აუცილებლად აღუდგებათ დახმარება, _ ამბობს ურუშაძე.
