არ არის მატერიალური ბაზა: არ არის საკმარისი მერხები, საკანცელარიო ნივთები და ა.შ. ბაღი ვერ უზრუნველყოფს მის მთავარ _ სააღმზრდელო ფუნქციას, ის გახდა ერთგვარი უფასო კვების ობიექტი და ბავშვთა “თავშესაფარი”. საჭიროა ახალი, დამატებითი ჯგუფის გახსნა ან სხვა გარეუბანში არსებულ ბაღებში ბავშვების გადანაწილება. საბავშვო ბაღი არის სააღმზრდელო დაწესებულება, რომელიც ამზადებს პატარებს და მნიშვნელოვანია ამ სტრუქტურის მოწესრიგება, რათა ყველას ჰქონდეს კონსტიტუციით მინიჭებული განათლების უფლება, _ ამბობს “გურია ნიუსთან” საუბრის დროს ოზურგეთელი მშობლების გარკვეული ნაწილი.
ისინი ოზურგეთის დემოკრატიული ჩართულობის ცენტრში შეიკრიბნენ: _ სკოლამდელი ასაკის ბავშვები არის სახელმწიფოს ოქროს ფონდი და ამ ყველაფერს უფრო ფაქიზად უნდა მივუდგეთ. კონტიგენტი რომ გაიზრდებოდა, უნდა გვცოდნოდა, გადანაწილება რომ მოხდებოდა, ესეც უნდა გვცოდნოდა. ჩემი შვილი მომავალში უნდა წავიდეს სკოლაში და ახლა დამყავს ბაღში. იმიტომ მომყავს აქ, რომ მიიღოს შესაბამისი განათლება, რომელიც აუცილებელია. მაშინ დავიქირავებდი ძიძას და დავტოვებდი სახლში. ბაღში დამყავს იმის გამო, რომ მან ისწავლოს ბავშვებთან, საზოგადოებასთან ურთიერთობის უნარჩვევები. მოვედი ბაღში და დამხვდა ჯგუფში გაზრდილი კონტიგენტი. ვეკითხები ახალგადმოსული რამდენიმე ბავშვის მშობელს შვილების ასაკს და მეუბნებიან, რომ 3-4 წლისანი არიან. გამოდის, რომ ერთ ჯგუფში არიან 3-4-5 წლის ბავშვები. მე როგორც ვიცი, ნაცნობობით გადანაწილდა პატარები #3 საბავშვო ბაღში. უნდა მოგვარდეს ეს პრობლემა, ძალიან გაუსაძლისი პირობებია, _ თქვა ერთ-ერთმა მშობელმა, ცირა მდინარაძემ.
ოზურგეთის სკოლამდელი აღზრდის ცენტრის ხელმძღვანელის მაკა ჭყონიას თქმით, ამ ეტაპზე სამ საბავშვო ბაღში დაიწყო რემონტი და აქედან გამომდინარე, ის მშობლებისგან დახმარებას ითხოვს: _ რაც შეეხება მომატებულ კონტიგენტს, ივლისში, როდესაც საკრებულოს სხდომა ჩატარდა, მაშინვე დავაყენე საკითხი, რომ ჩვენ ველოდებით კონტიგენტის მომატებას და არ ვიქნებოდით 1 სექტემბრისთვის მზად, აი, ამ კონტიგენტის მისაღებად, თუნდაც არ ვიქნებოდით მზად ჯგუფების დასამატებლად. შესაბამისი ფართის პრობლემაც იყო. ჩვენ ერთი თვის წინ მოგვთხოვეს ანგარიში. დაგეგმილი ბიუჯეტით, 1 800 ბავშვიდან 340 ბავშვი გვყავდა სოციალურად დაუცველი და მთელი წლის განმავლობაში შემოტანილი უნდა ყოფილიყო 152 000 ლარი. ივნისის ჩათვლით შემოვიდა 65 ათასი ლარი, სახელმწიფოდან კი ოთხი თვის თანხა _ 96 000 ლარი მივიღეთ. ეს არ არის ჯგუფების დამატების თანხა ან ფართების_ ეს არის კვების თანხა ამ ბავშვებისთვის. ახლა ქალაქის სამი ბაღი რემონტდება და მრავალკონტიგენტიანი ბაღია სამივე. მაქსიმალურად რომ შეგვეწყო მშობლებისთვის ხელი, მოხდა ამ ბავშვების გადანაწილება სხვა ბაღებში. ჩვენ ვიქირავეთ ასევე ფართი, რომ პრობლემა არ შექმნილიყო, მაგრამ #3 ბაღისთვის დიდი ფართის მოძებნა ვერ მოხერხდა და მოხდა #2 საბავშვო ბაღში მათი გადანაწილება.
_ ქალბატონო მაკა, სარემონტო სამუშაოები რატომ დაიწყო ასე გვიან?
_ ეს არ მომხდარა ჩვენი მიზეზით. როდესაც სახელმწიფო ბიუჯეტიდან გამოიყო თანხა და მივიღეთ განკარგულება, გამგეობამ მაშინვე გამოაცხადა ტენდერი, რადგან ამის უფლება მიეცა. ტენდერი იყო 21-დღიანი, სამწუხაროდ, დროში გაიწელა. საბავშვო ბაღები უკვე დაცლილია და გვეუბნებიან, რომ სამუშაოები ნოემბრის ბოლოს უნდა დასრულდეს.
_ სამუშაოები არ დაწყებულა?
_ ერთ ბაღში უკვე დაწყებულია სარემონტო სამუშაოები და ასევე დანარჩენ ბაღებში უახლოეს დღეებში დაიწყება.
_ 40 ბავშვი არის ერთ პატარა ოთახში. ამაზე რას გვეტყოდით?
_ მესამე ბაღი არის არატიპიური ბაღის შენობა და არასდროს არ აკმაყოფილებდა სტანდარტებს. ახლა გვინდა მშობლების დახმარება და გვერდში დგომა _ არ შეიძლება, ყველას უნდოდეს #3 საბავშვო ბაღში ბავშვების შეყვანა.
