ამის შესახებ საიას თავმჯდომარე კახა კოჟორიძემ ბათუმის რეაბლიტაციის შესახებ მომზადებული ანგარიშის წარდგენისას განაცხადა.
მხოლოდ ანგარიშში განხილული პროექტების მაგალითზე საიამ ბათუმის მერიის მიერ განუხორციელებელ პროექტებზე გახარჯული 3 მილიონ 533 364 ლარი დაითვალა.
ანგარიშში მიმოხილულია ბათუმის თვითმმართველობის მიერ 2009-2013 წლებში ბათუმში შესრულებული ისტორიული უბნებისა და ტურისტული ინფრასტრუქტურის რეაბილიტაციის პროგრამა. კოჟორიძის თქმით, კვლევისას გამოვლენილი ბევრი დარღვევა შესაძლოა, სამართალდამცავთა შესწავლის საგანი გახდეს.
საიას აღმასრულებელი დირექტორის ეკატერინე ფოფხაძის განცხადებით, კვლევისას ასევე გამოვლინდა გამჭვირვალობის პრობლემა.
“ბათუმის თვითმმართველობის მიერ 2009-2013 წლებში ბათუმის ისტორიული უბნებისა და ტურისტული ინფრასტრუქტურის რეაბილიტაციის პროგრამის შესრულებისას ქალაქის მერია ყველაზე ხშირად სახელმწიფო შესყიდვების იმ ფორმებს გამოიყენებდა, რომლებიც, როგორც წესი, ნაკლებად კონკურენტულია და გამჭვირვალობის მაღალ სტანდარტს ვერ უზრუნველყოფს. შესყიდვები ერთ პირთან მოლაპარაკებით მიმდინარეობდა. მხოლოდ პიაცას მოედნის პროექტის, ანბანის კოშკის მშენებლობისა და მიმდებარე ტერიტორის კეთილმოწყობის მიზნით ბათუმის მერიამ 80 მილიონზე მეტი ლარის ღირებულების სახელმწიფო შესყიდვა ერთ პირთან მოლაპარაკებისა და გამარტივებული სახელმწიფო შესყიდვის გზით განახორციელა”, _ აღნიშნა ფოფხაძემ.
ანგარიშში ასევე ნათქვამია, რომ სხვადასხვა წელს პროგრამის ფარგლებში, ბათუმის მერიამ მომსახურებისა და სამუშაოს სახით მილიონობით ლარის ღირებულების არაერთი ისეთი პროექტი შეისყიდა, რაც შემდგომში აღარ განხორციელებულა. მაგალითად, ბათუმის ძველ ბულვარში ოპერის თეატრის მშენებლობა, ბათუმის ფორტის სანაპიროზე პიაცას გადახურვის პროექტი და ა.შ.
ამასთან, პროგრამის მნიშვნელოვანი ნაწილი, რომელიც შესასრულებელ სამუშაოებსა და მომსახურებას უკავშირდებოდა, ხშირ შემთხვევებში ზუსტ და ამომწურავ ინფორმაციას არ ეფუძნებოდა.
ახალგაზრდა იურისტთა ასოციაცია მიიჩნევს, რომ ბათუმის 2009-2013 წლების ისტორიული უბნებისა და ტურისტული ინფრასტრუქტურის რებილიტაციის პროგრამით შესაბამისი სახელმწიფო ორგანოები აუცილებლად უნდა დაინტერესდნენ და კომპლექსურად შეისწავლონ.
