“კუს ტბის მიმდებარე ტერიტორიაზე ნარგავების გაჩეხვა ივლისიდან დაიწყო. თუმცა, როგორც მერიის საიტიდან მოპოვებული ინფორმაციიდან ირკვევა, მშენებლობის ნებართვა მერიის მიერ 12 სექტემბერს არის გაცემული. ანუ მთელი ამ ორი თვის მანძილზე „ციყვების“ტერიტორია უკანონოდ იყო შემოსაზღვრული. გუშინ შუადღით შევიტყვეთ, რომ ნერგებით დატვირთული მანქანა გადიოდა აქედან და მისი გასვლა შევაფერხეთ. პოლიციამ სხვა მხრიდან გაუხსნა გზა ნერგების მანქანას და ჩვენ ფიზიკური ძალის გამოყენებით გაგვიყვანა ადგილიდან“. – უთხრა”გურია ნიუსს“ ნატა ფერაძემ პარტიზანი მებაღეების წარმომადგენელმა.
კუს ტბის მიმდებარე ტერიტორიას თბილისის მერიის გადაწყვეტილებით რეკრეაცილი ზონის სტატუსი აქვს მოხსნილი. მერიის მიერვე გაიცა კომპანია „ემ გრუპზე“ რესტორნის მშენებლობის ნებართვა. თუმცა როგორც ახლა ირკვევა „ციყვების“ ტერიტორიაზე რესტორანს შ.პ.შს „კოლორიტი“ აშენებს. სწორედ მასზეა 12 სექტემბერს მერიის მიერ ნებართვა გაცემული.
“აქ ყოველგვარი წესების დარღვევით ხდება ნარგავების ამოძირკვა. აქვთ მათი სხვა ტერიტორიაზე გადატანის მცდელობა, მაგრამ იგი სხვაგან გახმება. დღეს კომპანია „კოლორიტის“ წარმომადგენელმა დაადასტურა, რომ „ემ ჯგუფის“ მფლობელის არჩილ გეგენავას თანამშრომელია. არჩილ გეგენავა კი გახლდათ „ნაციონალური მოძრაობის“ ერთ-ერთი ყველაზე გამორჩეული პერსონაჟი, რომელსაც სახელმწიფოსთან მონოპოლისტური ხასიათის კონტრაქტები ჰქონდა. ეს ადამიანი უკვე „ქართული ოცნების“ პირობებში ბედავს და აგრძელებს გარემოსთვის ზიანის მოტანას და პოლიციაც პირდაპირ იცავს მის ინტერესებს“,-აცხადებს გარემოსდამცველი ლაშა ჩხარტიშვილი.
ირაკლი ღუტიძე ერთ-ერთია იმ პარტიზანი მებაღეებიდან, რომლებიც კუს ტბის ტერიტორიის დასაცავად ადგილზე მორიგეობენ.
“გუშინ დილის 10 საათიდან ვმორიგეობდი. ისე წინა ღამით გავინაწილეთ საათები ბიჭებმა და ერთმანეთს ვენაცვლებოდით. ჯერ ისეთი საუბარი დაიწყო, თითქოს ამოთხრილი ნერგები პატივცემულ ინვესტორს უკან უნდა ჩაერგო. მაგრამ ბოლოს თქვეს, რომ სხვაგან უნდა გადაეტანათ. გუშინ როდესაც მოვიდნენ, ტელევიზიების დაძახება გადაწყვიტა ლაშა ჩხარტიშვილმა და ინვესტორები გაიკრიფნენ. შემდეგ მოვიდა პატრული და მისი დახმარებით გაიტანეს მუშებმა ტექნიკა, ბუჩქები-არა. ის ამოღებული ბუჩქები ახლაც იქ ყრია. მანამდე, ნებართვა როცა არ ჰქონდათ და ისე ამოთხარეს ბუჩქები და ჩააბრუნეს უკან, დღეს ისინი გამხმარია. ანუ, სავარაუდოდ, წესიერად არ უვლიან“, – ამბობს ირაკლი ღუტიძე.
გუშინ 7 საათზე კუს ტბის მიმდებარე ტერიტორიის დასაცავად მოქალაქეებმა აქცია გამართეს.
ნათია გოგიჩაიშვილი, აქციის მონაწილე: “ვარ თბილისის მაცხოვრებელი და არ მინდა, შენობებისგან შედგებოდეს მარტო ქალაქი. მინდა ქალაქში მწვანე ზონები იყოს, სადაც წასვლა და დასვენება შეიძლება. თუ სახლთან არ გვექნება ასეთი ადგილები, სხვაგან მაინც გვქონდეს წამოსასვლელი. ასეთ ადგილებს ყველგან მიადგნენ და ჩეხავენ. არ შეიძლება ასეთი რაღაცის დაშვება. პირველ რიგში, ჰაერი უნდა გვქონდეს და მერე სხვა დანარჩენი“.
აქციის მონაწილეების გადაწვეტილებით, ისინი დღეს თბილლისის საკრებულოს განცხადებით მიმართავენ, რომ კუს ტბის მიმდებარე ტერიტორიის საკითხი საკრებლოს სხდომის დღის წესრიგში შეიტანონ და იმსჯელონ.
