აქციაზე მწერალმა ირაკლი ლომოურმა მთავრობა ხალხის იმედების გაცრუებაში დაანაშაულა და აღნიშნა, რომ არ ითვალისწინებს რა ხალხის ინტერესს, ახალი ხელისუფლებაც ძველის გზას ადგას.
“მე გულუბრყვილოდ დავიჯერე წინასაარჩევნო დაპირება ბატონი ბიძინასგან, რომ საქართველოში აღარ აშენდებოდა გიგანტური ჰესები. აღმოჩნდა, რომ მოვტყუვდი. ნელ-ნელა ვრწმუნები, რომ ძველსა და ახალ ხელისუფლებას შორის პრინციპული განსხვავება არ არის. მე ამის დაჯერება არ მინდოდა და ახლაც არ მინდა, თუმცა მგონია, რომ ხალხის აზრი არც ძველ ხელისუფლებას აინტერესებდა და არც ახალს აინტერესებს. უნდა ვაიძულოთ, რომ ჩვენი ხმა გაიგონონ. ამ წუთში ცოტანი ვართ, მაგრამ ყველა უნდა გამოვიდეს და გამოხატოს პროტესტი. ეს არის კატასტროფა. ჩვენი მიწა-წყალი არ შეიძლება ვიღაცის გამდიდრებას მოემსახუროს, ტერიტორიების ჩაძირვის ხარჯზე. მე არ მემეტება ჩემი ქვეყანა მძევლობისთვის. ქვეყანას, რა თქმა უნდა, ელექტროენერგია სჭირდება, მაგრამ ამისთვის არსებობს პატარა და საშუალო ჰესები, არსებობს ალტერნატიული ენერგიის წაყროები, რომლებიც არც ისე ძვირია, როგორც ამბობენ. განსაკუთრებული მადლობა უნდა მოვახსენო ქალბატონ ნაირა გელაშვილს, რომელმაც თავისი გამოსვლით და სამოქალაქო პოზიციის დაფიქსირებით საზოგადოებას გაახსენა ის უბედურება, რომელიც ჩვენ ყველას მოგველის”,-აღნიშნა ირაკლი ლომოურმა.
აქციაზე სიტყვით გამოსვლისას თბილისის სახელმწიფო უნივერსიტეტის სტუდენტმა ლევან ლორთქიფანიძემ დეტალურად მიმოიხილა, რა საფრთხეების წინაშე დგას საქართველო და კონკრეტულად, სვანეთის მოსახლეობა, თუ ხუდონჰესი აშენდება:
“ათასობით ჰექტარი მიწა იტბორება. ათასობით ჰექტარი ტყე იჩეხება. 14 სოფელი გადასახლდება. ამ 14 სოფლის მოსახლეობაზე გაიცემა ჯერ დაუდგენელი კომპენსაცია. მათ თავიანთი ნების გარეშე მოუწევთ კერძო საკუთრების მიტოვება. გარდა ამისა, არსებობს სერიოზული საფრთხე კლიმატის გაუარესებისა, მეწყრული ზონების გაძლიერებისა. ენგურში ნაშალის შემცირების და ზღვის დონის აწევისა. ანუ ჩვენ ვდგავართ განუზომლად დიდი ეკოლოგიური საფრთხის წინაშე”.
ლევან ლორთქიფანიძემ ხაზი გაუსვა იმასაც, რომ ქვეყანას ხუდონზე კაშხლის აშენებით ძალიან მცირე სარგებელი ექნება, სხვა სახელმწიფოები კი მოგებას ნახავენ.
“წარმოებული ელექტროენერგიის 91% გავა თურქეთში და მის განვითარებას შეუწყობს ხელს. მისი დისტრიბუცია მოხდება რუსული კომპანიის მფლობელობაში არსებული მაღალი ძაბვის გადამცემი ხაზების საშუალებით. მოგებას ნახავს ინდური საინვესტიციო კომპანიაც. საქართველოში კი დარჩება გამომუშავებული ელექტროენერგიის მხოლოდ 9%. ის, რაც ჩვენ ხუდოჰესიდან გვრჩება, გასული ერთი წლის განმავლობაში გამოიმუშავა ზაჰესმა, რომელიც გაცილებით მცირე ელექტროსადგურია, ვიდრე ხუდონი. ის ელექტროენერგია, რაც ჩვენ ხუდონიდან დაგვრჩება, უკვე გამოიმუშავა ხრამი 2-მა, რომელიც ასევე, გაცილებით პატარა კაშხალია. ძალიან ცალსახაა, რომ ეს პროექტი შექმნილია მხოლოდ კაპიტალის სასარგებლოდ, საქართველოში კი ეკოლოგიური, სოციალური, ჰუმანიტარული ფაქტორები გაუთვალისწინებელი რჩება. ეკონომიკური მოგებაც ნაკლებია და საბოლოოდ, საზოგადოება რჩება მოტყუებული, ეკოსისტემები კი განადგურებული.”
აქციის კიდევ ერთმა მონაწილე ტატიანა რედკოვმა ყურადღება წმინდა გიორგის სახელობის ეკლესიაზე გაამახვილა, რომელიც დატბორვის ზონაში ექცევა და გადატანას ექვემდებარება.
“მიკვირს, ისეთ ქვეყანაში, სადაც წმინდა გიორგის თაყვანს სცემენ, მისი სახელობის ეკლესიას კილოვატ საათებზე როგორ ცვლიან. მე თანადგომას თბილისიდან ვუცხადებ იმ 80 ადამიანს, რომელმაც წმინდა გიორგის შეჰფიცა, რომ ხაიშში ჰესს არ ააშენებინებენ. მთელი კაცობა, ქართველობა, მართლმადიდებლობა აი ამ 80 ადამიანში დავინახე. წმინდა გიორგის სახელობის ტაძარს, სადაც საუკუნეების მანძილზე ლოცულობდა ხალხი და მის მადლს, ვერანაირი ნათურა ვერ შემიცვლის. სადაც მექნება საშუალება ყველგან გამოვალ და შევუერთები ხუდონჰესის საწინააღდეგო აქციას”, _ განაცხადა რედკოვმა.
ანტისაოკუპაციო ეროვნულ-გამათავისუფლებელი მოძრაობის ინიციატორთა დასის ერთ-ერთი ლიდერი ირაკლი წერეთელი კი ხუდონჰესის მშენებლობას, ერისა და საშობლოს გაყიდვად აფასებს. მისი აზრით, უნდა განიდევნონ არამარტო პროექტის განმხორციელებლები, არამედ იდეის ავტორებიც.
“არამარტო ხუდონჰესი, არამედ გიგანტური ჰესები საქართველოში საერთოდ არ უნდა აშენდეს. სოფლები უნდა აიყაროს, ტენიანობამ უნდა მოიმატოს და რისი გულისთვის?! ვიღაც ინვესტორმა რომ “მაყუთი”იშოვოს?! ენგურჰესიც გასაშვებია. ამხელა გაზსადენი გადის საქართველოზე, ჩვენ უნდა მოვითხოვოთ იმხელა საწვავი, რომ თბოელექტრო სადგური ავამუშაოთ. 21-ე საუკუნეში რაღა დროს ჰესებია?! ათასი ტექნიკური საშუალება არსებობს, ენერგიის მისაღებად”, -ამბობს წერეთელი.
მოსახლეობა დანებებას არ აპირებს. შაბათს სტუდენტთა ჯგუფი, სამოქალაქო აქტივისტები, რომლებიც მუდმივად ფიქრობენ ეკოლოგიურ პრობლემატიკაზე, პროტესტის გაგრძელებას სოფელ ხაიშის ცენტრში გეგმავენ.
“შაბათს 3 საათზე ჩავალთ სვანეთში. მოსახლეობას გამოვუცხადებთ სოლიდარობას და ვაგრძნობინებთ, რომ თუ ის პრემიერ მინისტრმა, მთავრობამ, პარლამენტმა და გარემოს დაცვის კომიტეტმა მიატოვა, ჩვენ არ მივატოვებთ და მოქალაქეები გვერდით დავუდგებით.”
გარემოსდამცველი ლაშა ჩხარტიშვილის თქმით, პარალელურად აქციები თბილისშიც გაგრძელდება.
