ორშაბათს, ჩოხატაურის მუნიციპალიტეტის გამგებელმა, გია გიორგაძემ, ტრადიციულ თათბირზე, სამსახურის უფროსებთან და სოფლის რწმუნებულებთან ერთად, მუნიციპალიტეტში ფუნქციონირებადი ყველა სამსახურის ხელმძღვანელი დაიბარა. თავდაპირველად თათბირის დახურვა სცადეს, თუმცა, მას შემდეგ, რაც გასაიდუმლოების მოტივი ვერ დაგვისაბუთეს, სხდომაზე ჩვენც შევედით. სწორედ იქ გახდა ცნობილი, რომ ჩოხატაურში საქონლის დაავადება გავრცელებული: _ ჯერ არ ვიცით, რა დაავადებაა, თუმცა, ცნობილია, რომ დაავადებული საქონელი სამტრედიის ტერიტორიიდან შემოვიდა, _ აღნიშნა თათბირზე სურსათის უვნებლობისა და ვეტერინარიის სამსახურის წარმომადგენელმა ლევან კეკელიძემ.
როგორც გაირკვა, რამდენიმე დაავადებული პირუტყვი სოფელ კოხნარშია:
_ საქონელს ჩლიქები დაუსკდათ. უკვე დავიწყეთ აცრები. სოფელმა საკუთარი სახსრებით შეიძინა შრატი. 100 ძროხის სამყოფი წამალი 150 ლარი ღირს, _ თქვა კოხნარის რწმუნებულმა ჟიფო ცინცაძემ.
ამავე თათბირზე ითქვა, რომ დაავადებას, რომლითაც კოხნარში პირუტყვი დაავადდა, თურქული ეწოდება და ის ადამიანებზეც გადადის: _ დაავადებული პირუტყვის რძე და მისი ნაწარმის მიღება არ შეიძლება, _ განგვიმარტა ლევან კეკელიძემ.
მისივე თქმით, ამ დაავადების გადატანა ასაკოვან საქონელს შეუძლია: _ უწლოვან საქონელს ამ დაავადების გადატანა უჭირს, _ დასძინა მან.
კეკელიძემ ვერ გვითხრა, არსებობს თუ არა ქვეყანაში ვაქცინის მარაგი: _ ოზურგეთშიც იყიდება ეს წამალი და სხვაგანაც, ამიტომ, ვფიქრობ პრობლემა არ იქნება.
ჩვენს შეკითხვაზე, რატომ არ უზრუნველყოფს სახელმწიფო მოსახლეობის წამლით მომარაგებას პასუხი არავის აღმოაჩნდა. გამგებლის, გია გიორგაძის თქმით, ამ საკითხს გადახედავენ და არ არის გამორიცხული, აცრისთვის საჭირო თანხები მუნიციპალიტეტის ბიუჯეტიდან გამოიყოს.
ამავე თათბირზე, გამგებელმა კეკელიძეს დავალება მისცა, რომ ამ დაავადების და პრევენციული ზომების შესახებ განმარტებები მოსახლეობისთვის პრესის საშუალებით გაეკეთებინა, რაზეც თანხმობა მიიღო, თუმცა, სურსათის უვნებლობის და ვეტერინარიის სამსახურის წარმომადგენელმა პირობა არ შეასრულა _ როგორც წყარომ გვითხრა, კეკელიძეს ზემდგომმა ამ საკითხზე კომენტარების მიცემა აუკრძალა.
სიტუაციაში გარკვევა სამხარეო ადმინისტრაციასაც ვთხოვეთ. მათი ჩარევის შემდეგ, სურსათის უვნებლობის და ვეტერინარიის სამსახურის პრესამსახურის უფროსმა ვერიკო გულუამ განმარტება გააკეთა:
_ არის თუ არა ჩოხატაურში თურქულის დაავადება, ჯერ დადასტურებული არ არის. ამისთვის ლაბორატორიული ანალიზია საჭირო და დიაგნოზის დადგენას ერთი კვირა დასჭირდება. როგორც კი კვლევის შედეგები მზად გვექნება, აუცილებლად შეგატყობინებთ.
_ ქალბატონო ვერიკო, მანამდე რა ქნას ამ ადამიანებმა? ისინი ამბობენ, რომ გავრცელებული დაავადება სიმპტომების მიხედვით თურქულს გაქვს.
_ თქვენ თქვით, რომ ამბობენ. ესე იგი, ჯერ დადასტურებული არ არის. თურქულს სიმპტომების მიხედვით რამდენიმე დაავადება ჰგავს. ამიტომ, წინასწარ ვერაფერს გეტყვით. ამ ეტაპზე ვეტერინარი ყველა იმ პირუტყვს შეამოწმებს, რომელიც დაავადებულია. ჩვენი სპეციალისტები დაავადების კერებსაც ნახავენ და შესაბამის რეკომენდაციას გასცემენ, _ გვითხრა გულუამ.
სპეციალისტების განმარტებით, თურქულით ყველა ჩლიქოსანი ცხოველი შესაძლოა დაავადდეს, ამ ავადმყოფობის ამთვისებელია ადამიანიც, განსაკუთრებით კი ბავშვი.
როგორც გვითხრეს, ამ ეტაპზე კოხნარში მყოფი პირუტყვს იზოლირება გაუკეთეს. ჯერჯერობით უცნობია, გამოვლინდა თუ არა დაავადებული საქონელი მუნიციპალიტეტის სხვა სოფლებში.
