კვირიკაშვილს განცხადებით, 2008 წელს მას ნოდარ ჭარხალაშვილმა “ობიექტივის” წილი გადასცა, ხოლო შემდეგ მან ტელეკომპანია და ლიცენზია სახელმწიფოს აჩუქა. კომისია დაინტერესდა, რა იყო ჩუქების მიზეზი და მოტივი.
“ობიექტივი ჩემზე 12000 ლარის ქონებით გადმოფორმდა. კახა ნინუამ მთხოვა, რომ ეს წილი უნდა მეყიდა. ჩემზე გადმოვიდა ეს წილი, რომელიც მერე ვაჩუქე სახელმწიფოს. აღარ მსურდა, ეს კომპანია ჩემს სახელზე ყოფილიყო. გადავეცი მინდობილობა იურისტს, რომელსაც უნდა წარედგინა ჩემი ინტერესები მარეგულირებლისთვის. არველაძის კაბინეტში იყო საუბარი იმ გზებზე, თუ როგორ უნდა გადამეცა ლიცენზია,” _ განაცხადა კვირიკაშვილმა.
დეპუტატ თინა ხიდაშელის კითხვაზე, თუ რატომ იყო ანგარიშვალდებული ნინუას წინაშე, კვირიკაშვილმა უპასუხა, რომ მას და ნინუას დიდი ხნის ურთიერთობა აკავშირებდათ _ “იმისთვის, რომ მეგობრის მეუღლეს მუშაობა დაეწყო, 10 000 წილი უნდა გადამომეფორმებინა ჩემზე. ის, თუ რა ხდებოდა სინამდვილეში ამის უკან, ეს ბოლო დროს საგაზეთო პუბლიკაციებიდან გავიგე,” _ აღნიშნა კვირიკაშვილმა.
მისივე თქმით, იგი სახელმწიფოსთვის მსგავსი იძულებითი “ჩუქების” ფაქტის წინაშე არაერთხელ დამდგარა. ომის შემდგომ პერიოდში, როცა კონტროლის პალატის შენობას ფასადი უკეთდებოდა, მისმა შვილობილმა კომპანიამ სახელმწიფოს 200 000 ლარის ოდენობის სამუშაო აჩუქა. ჩუქების მიზეზი კი, გურამ კვირიკაშვილის მამის დაშანტაჟება იყო, რომელიც აღნიშნულ პერიოდში საქართველოში შვილის არყოფნისას მის მოვალეობას ასრულებდა.
მიუხედვად იმისა, რომ გურამ კვირიკაშვილმა “იძულებითი ჩუქების” აქტი არაერთხელ განახორციელა, 2010 წელს მის სამშენებლო კომპანია “არდიაი”-დან გენერალურმა პროკურატურამ დოკუმენტაცია გაიტანა. კვირიკაშვილის თქმით, ფინანსურ საკითხებში დარღვევა ვერ აღმოუჩინეს. თუმცა, სრულიად გაურკვეველი მიზეზების საფუძველზე კომპანიის 3 თანამშრომელი დააკავეს: მუშა, მომმარაგებელი და წარმოების უფროსი.
“არანაირ ჩარჩოებში არ ჯდებოდა ამ ხალხის დაკავება. ზაზა ქაჩიბაიას კაბინეტში ამ ხალხის გათავისუფლებაზე ვაჭრობა შედგა მაშინ, როცა დაკავებულები მოდულის შენობიდან ციხეში გადაჰყავდათ. იქ თანხების მოთხოვნაც იყო და სამუშაოს შესრულების ვალდებულებაც. კომპანიის უდანაშაულო თანამშრომლები საპროცესო შეთანხმებით გაათავისუფლეს,” _ განაცხადა კვირიკაშვილმა.
მისივე თქმით, ამის შემდეგ კომპანიამ ყვარელში სპორტის სასახლე შეაკეთა და მილიონ-ნახევრის ოდენობის სამუშაო სახელმწიფოს ისევ “აჩუქა”.
“პროკურატურაში გადმომეცა ქაჩიბაიას ნახაზი, როგორი უნდა ყოფილიყო შენობა. ადგილზე რომ ჩავედით, ამ საკითხს კურირებდა ყვარლის გამგებელი ლევან გამსახურდია. ანალოგიურად შევაკეთეთ შსს-ს შენობაც, 2011 წელს გენშტაბის შენობასთან დაკავშირებით შესრულებული 6 500 000 ლარის ღირებულების სამუშაოებიდან 500 000-ის მიღებაზე უარი ვთქვით,” _ აღნიშნა კვირიკაშვილმა.
ამასთან, როგორც მან განაცხადა, იმ პერიოდში თავდაცვის მინისტრი ბაჩო ახალაია იყო, სამშენებლო სფეროს კურირებდა ვახტანგ გორდაძე, ხოლო თანხების გადაცემას მთავარი პროკურატურა წყვეტდა.
