ღონისძიება იუსტიციისა და სასჯელაღსრულების სამინისტროების მიერ გაეროს ბავშვთა ფონდისა (იუნისეფის) და ევროკავშირის მხარდაჭერით იმართება. კონსულტაციაში განათლებისა და მეცნიერების; ჯანდაცვისა და შინაგან საქმეთა სამინისტროებიც მონაწილეობენ.
ახალი მიდგომა გულისხმობს საქართველოში უკვე მრავალი წლის წინ დანერგილი “არასრულწლოვანთა მართლმსაჯულების” კონცეფციის გაფართოებას − “მართლმსაჯულება ბავშვებისათვის”. ახალი კონცეფციის თანახმად, საქართველოში მართლმსაჯულების სისტემის რეფორმის ერთ-ერთი მთავარი სამიზნე უნდა იყოს ყველა ბავშვი, ვინც კი “რაიმე შეხებაშია” კანონთან, მათ შორის, კანონდამრღვევი, დანაშაულის მსხვერპლი და მოწმე ბავშვები, აგრეთვე, ბავშვები რომელნიც კავშირში არიან ადმინისტრაციულ სამართალდარღვევასთან ან სამოქალაქო სამართალწარმოებასთან – განსხვავებით წინა სისტემისაგან, რომელიც მხოლოდ კანონთან “კონფლიქტში მყოფ” ბავშვებზე იყო ორიენტირებული.
იუსტიციის მინისტრის მოადგილემ შეხვედრა ძალზე საინტერესოდ და ნაყოფიერად შეაფასა.
“დაიგეგმა მთელი რიგი ღონისძიებები, განვიხილეთ კონკრეტული სტრატეგია და გეგმა, რომელთა შესრულებასაც შეუდგებიან მონაწილე ორგანიზაციები და უწყებები და, რაც მთავარია, გადაწყდა, რომ შემდგომი საქმიანობის ორგანიზებას სისხლის სამართლის რეფორმის საკოორდინაციო საბჭოს შემადგენლობაში არსებული სპეციალური ჯგუფი − “არასრულწლოვანთა მართლმსაჯულებისთვის” − გაუწევს. ამ საკოორდინაციო საბჭოს იუსტიციის მინისტრი ხელმძღვანელობს, ხოლო სამდივნოს იუსტიციის სამინისტროს ანალიტიკური დეპარტამენტი წარმოადგენს,” _ აღნიშნა ბარამიძემ.
მისივე თქმით, იუსტიციის სამინისტრო მზად არის, საკოორდინაციო საბჭოს ფარგლებში, რომელიც წამყვანი რგოლი იქნება პროგრამის − “მართლმსაჯულება ბავშვებისთვის” − განხორციელების გზაზე, გამოყოს სხვადასხვა მატერიალურ-ტექნიკური რესურსი, მაგალითისთვის, ყვარლის სასწავლო ცენტრი შეხვედრებისთვის, ტრენინგებისთვის და ა.შ.
“იუნისეფი ხელს უწყობს ბავშვთა დაცვის სისტემის ყველა რგოლის, მათ შორის, სამართლებრივი მექანიზმების, გაძლიერებას, რათა დაცული იყოს ბავშვის საუკეთესო ინტერესები”, − აღნიშნავს საშა გრაუმანი, იუნისეფის წარმომადგენელი საქართველოში.
“არასრულწლოვანთა მართლმსაჯულებასთან დაკავშირებით, მოვუწოდებთ, რომ თავისუფლების აღკვეთა გამოიყენებოდეს მხოლოდ უკიდურეს შემთხვევაში და ბავშვები დაცულნი იყვნენ ძალადობის, შეურაცხყოფისა და ექსპლუატაციისგან. ჩვენ ვთანამშრომლობთ საქართველოს მთავრობასთან სამართლის სისტემის რეფორმის ფარგლებში, რათა იგი ორიენტირებული იყოს კანონთან კონფლიქტში მყოფი ბავშვების რეაბილიტაციასა და რეინტეგრაციაზე. ამ მხრივ ბევრს მივაღწიეთ. მართლმსაჯულების სისტემაში მოხვედრილ არასრულწლოვანს ახლა ბევრად მეტი შესაძლებლობა აქვს, მიიღოს სათანადო მხარდაჭერა და რეაბილიტაცია, ვიდრე წლების წინ. მაგრამ ახლა ახალ ეტაპზე უნდა გადავიდეთ და დახმარება გავუწიოთ ყველა ბავშვს, ვინც შეხებაშია მართლმსაჯულებასთან, იქნება ეს სავარაუდო კანონდამრღვევი, მსხვერპლი, თუ მოწმე, და რომ, როგორც არა სისხლის სამართლის სამართალწარმოების მხარეს, ბავშვს ხელი მიუწვდებოდეს ისეთი მართლმსაჯულების სისტემაზე, რომელიც უკეთ მოემსახურება და დაიცავს მას შესაბამისი საერთაშორისო ნორმებისა და სტანდარტების გამოყენებით”, _ ამბობს გრაუმანი.
პოლიტიკის შესამუშავებელი საკონსულტაციო შეხვედრის მიზანია მომდევნო ნაბიჯების განსაზღვრა ახალი კონცეფციის შემდგომი ინტეგრაციისათვის საქართველოს მართლმსაჯულების სისტემაში.
ბოლო წლებში საქართველოს მთავრობამ მნიშვნელოვანი ნაბიჯები გადადგა ბავშვის უფლებების სფეროში რეფორმების ინიცირების მიზნით. არასრულწლოვანთა მართლმსაჯულების სისტემის რეფორმა, სისხლის სამართლის მართლმსაჯულების სექტორის უფრო ფართო რეფორმის ფარგლებში, წარმოაჩენს მთავრობის მისწრაფებას, არასრულწლოვანთა მართლმსაჯულების სისტემა მიუსადაგოს ბავშვის უფლებათა დაცვის საერთაშორისო და ევროპულ სტანდარტებს. შედეგად, ქვეყანაში ფუნქციონირებს განრიდების პროგრამა არასრულწლოვანთათვის, რომლებმაც პირველად ჩაიდინეს დანაშაული. აღნიშნული პროგრამა მოქმედებს 2010 წლიდან, რომლის ფარგლებში 200-ზე მეტი არასრულწლოვანია განრიდებული ფორმალური მართლმსაჯულების სისტემიდან. 50 პროცენტზე მეტით – 180-დან 70-მდე − შემცირდა იმ არასრულწლოვან მსჯავრდებულთა რაოდენობა, რომლებიც საპატიმრო სასჯელს იხდიან. ამასთან, სოციალური მუშაკებისა და ფსიქოლოგების პარალელურად, როგორც პრობაციის, ისე სასჯელაღსრულების სისტემაში, დაინერგა სასჯელის ინდივიდუალური დაგეგმვის მიდგომაც; არასრულწლოვანთა მართლმსაჯულების ახალი კანონმდებლობა ინიცირებულია.
