სპეციალური კითხვარით 600 ყოფილი მსჯავრდებული და ამდენივე პატიმარი გამოიკითხება. გამოკითხულთა ანონიმურობა მკაცრად იქნება დაცული,რაც იმას ნიშნავს, რომ კვლევაში არ აისახება არც ერთი ფაქტორი, რომელიც რესპოდენტის იდენტიფიცირებას შესაძლებელს გახდის.
რატომ დადგა მსგავსი კვლევის ჩატარების აუცილებლობა, ამ კითხვაზე არასამთავრობოებს ერთი პასუხი აქვთ – კადრების გავრცელებიდან 1 წლის თავზე ხელისფლებამ, პროკურატურამ ვერ შეძლო პასუხი გაეცა კითხვებისთვის: იყო თუ არა ეს სისტემური დანაშაული, თუ იყო ვინ გასცემდა ბრძანებას, დაისაჯნენ თუ არა ბრძანების გამცემნი, როგორი იყო წამების მაშტაბები და აშ.
საერთაშორისო გამჭვირვალობა -საქართველოს ხელმძღვანელი ეკა გიგაური “გურია ნიუსთან“ ამბობს, რომ ამ მიმართულებით პროკურატურის და ზოგადად მთავრობის მუშაობა არადამაკმაყოფილებელია.
“ერთის მხრივ ჩვენ ვხედავთ რომ ამ შეხვედრას მთავრობის წარმომადგენლები ესწრებიან და ჩართულობის სურვილს გამოხატავენ, თუმცა მეორეს მხრივ ძალიან მნიშვნელოვანია რომ მათ კონკრეტული ნაბიჯები გადადგან, რათა მომავალში მსგავსი ფაქტები არ განმეორდეს. ჩვენი ორგანიზაცია ძალიან უარყოფითად აფასებს იმ ფაქტს, რომ ლადო ბედუკაძესთან გაფორმდა საპროცესო შეთანხმება და მისი პასუხისმგებლობა არ დადგა. იმ შემთხვევაში თუკი ის ადამიანები , რომლებიც ვიცით რომ ჩართულები იყვნენ წამებაში, დაისჯებოდნენ, ჩვენ ვნახავდით რომ მთავრობა ფიქრობს გარკვეულ პრევენციულ ღონისძიებებზე და წამებაში ჩართული ადამიანების დასჯაზე. რაც შეეხება ამ მიმართულებით პროკურატურის მუშაობას, ჩვენმა ორგანიზაციამ ორი კვირის წინ გამოაქვეყნა განცხადება სადაც ვთქვით რომ კადრების გავრცელებიდან ერთი წლის თავზე ეფექტური გამოძიება არ ჩანს, ყოველშემთხვევაში საზოგადოებას არა აქვს ინფორმაცია სად არის დღეს გამოძიება. ჩვენ ვიცით რომ რამდენიმე პირის პასუხისმგებლობა დადგა, თუმცა არც დამდგარა, რადგან რამდენიმე მათგანთან საპროცესო შეთანხმება გაფორმდა, რაც ყოველგვარი კანონმდებლობის დარღვევაა“.
სასჯელაღრსრულების მინისტრის სოზარ სუბარის განცხადებით “torture მორჩა”, რაც იმას ნიშნავს , რომ ციხეებში წამება აღარ ხდება , თუმცა კვლავაც უამრავი პრობლემაა მოუგვარებელი. სამინისტრო ამჟამად ინფრასტრუქტურისა და ჯანდაცვის გაუმჯობესებაზე მუშაობს, რაც მინისტრის თქმით ციხეებში ცხოვრების ხარისხს გააუმჯობესებს.
ციხის კვლევების საერთაშორისო სამეთვალყურეო საბჭოს წევრმა ბარონესა ვივიენ სტერნმა წლების განმავლობაში საქართველოს ციხეებში არსებული მდგომარეობა მკაცრად გააკრიტიკა. მისი თქმით, ამ პერიოდში ციხეს მორალური და ეთიკური სახე ჰქონდა დაკარგული.
“საქართველო მთელს მსოფლიოში ცნობილი იყო პატიმართა რაოდენობით. აქვე მინდა ავღნიშნო, რომ კეთილმოწყობილი შენობა კარგ ციხეს არ ნიშნავს, რადგან წამება თანამედროვე ციხეებშიც ხდებოდა. ასევე შენობების მოწყობაზე გაზრდილი დაფინანსება არ ნიშნავს ციხეზე ზრუნვას”.
ბარონესა ვივიენ სტერნი დადებითად აფასებს ახალი ხელისუფლების გადაწყვეტილებას პატიმართა შემცირებისა და სასჯელაღრსრულების სისტემაში ჯანდაცვის დაფინანსების გაზრდის შესახებ, თუმცა მიაჩნია რომ ეს მხოლოდ დასაწყისია, რადგან პროფესიონალი თანამშრომლების გარეშე ციხე ვერასოდეს გახდება უსაფრთხო ადგილი.
“პროფესიონალი ციხის თანამშორმელი, რომელიც პატიმრებთან საერთო ენას გამონახავს, აუცილებელია იმისათვის რომ მომავალში მსგავსი ინცინდენტების პრევენცია მოხდეს, ციხის თანამშრომლის მოლარული სახე, სტანდარტი, ესაა ძალიან მნიშვნელოვანი. რა თქმა უნდა, ადექვატური ხელფასი მნიშვნელოვანი ფაქტორია.”
პატიმართა წამების ფართომაშტაბიანი კვლევა რამდენიმე თვის განმავლობაში გაგრძელდება. კვლევის შედეგები 2014 წლის დასაწყისში გახდება ცნობილი.
