მოსახლეობამ ამის შესახებ წერილობით საქართველოში “სოკარის” წარმომადგენლობას მიმართა. ასევე, გარემოს და ბუნებრივი რესურსების სამინისტროსა და ლანჩხუთის მუნიციპალიტეტის გამგებლის მოვალეობის შემსრულებელ ზაზა ურუშაძეს.
“როგორც ჩვენთვისაა ცნობილია, კომპანია ძირითადად ბენზინგასამართი და გაზგასამართი სადგურების მშენებლობითაა დაკავებული. აქედან გამომდინარე ვფიქრობთ, რომ შესაძლოა ამ ადგილზეც მსგავსი მშენებლობა დაიგეგმოს, რასაც მოაგარაკეები და სოფლის მოსახლეობა კატეგორიულად ვეწინააღმდეგებით.
“ამ ტერიტორიაზე ბენზინგასამართი თუ გაზგასამართი სადგურები მისი ფუნქციონირებიდან გამოყოფილი მავნე ნივთიერებებით საბოლოოდ დაარღვევს გრიგოლეთის საკურორტო ზონის ეკოსისტემას და საკურორტო ზონის ფუნქციას დააკარგვინებს. არავითარ შემთხვევაში არ უნდა შეეწიროს საკურორტო ტერიტორია ავტოგასამართ სადგურს. მითუმეტეს, რომ ახლომახლო სხვა მრავალი აუთვისებელი მიწები არსებობს, ცენტრალური ტრასის პირას, დაუსახლებელ ადგილებში.
“ასევე მნიშვნელოვანია, შუაგულ დასახლებულ საცხოვრებელ ზონაში არსებული ავტოგასამართი სადგური (ფეთქებადი და ადვილად აალებადი ნივთიერებებით), საფრთხის წინაშე აყენებს დამსვენებელთა და ადგილობრივთა უსაფრთხოებას. ჰაერში საგრძნობლად მოიმატებს გაზისა და სხვა საწვავის სუნის კონცენტრაცია, რაც ჩვენი ჯანმრთელობისთვის საზიანოა.
“როცა ადამიანები დასასვენებელად სუფთა გარემოში ჩამოდიან, ეს ადგილი არ არის ბენზინგასამართი და გაზგასამართი სადგურებისთვის.
“იმ შემთხვევაში თუ კომპანია მაინც მოახდენს ზემოთ აღნიშნული სადგურების მშენებლობას, გრიგოლეთის მოსახლეობა კანონის ფარგლებში არსებულ ყველა ზომას მიმართავს”, _ წერია განცხადებაში, რომელსაც ხელს 31 ადამიანი აწერს.
“გურია ნიუსი” შეეცადა, რომ ოფიციალური პასუხი “სოკარ ჯორჯია პეტროლეუმის” ხელმძღვანელობისგან მიეღო, მაგრამ ჩვენს ზარებს არავინ უპასუხა. მოგვიანებით ჩვენ დავუკავშირდით კომპანიის ქონების მართვის ჯგუფის ხელმძღვანელ გიორგი ლევიძეს, რომელმაც კომენტარზე უარი განაცხადა.
“მე უკვე მივწერე წერილი მოსახლეობას და საგაზეთო კომენტარის ვერ გავაკეთებ”, _ გვითხრა ლევიძემ.
ლანჩხუთის მუნიციპალიტეტის გამგებლის მოვალეობის შემსრულებლის, ზაზა ურუშაძის თქმით, “სოკარს”, მშენებლობის ნებართვის გაცემისთვის არ მიუმართავს და ეს ინფორმაცია პირველად ჩვენგან გაიგო:
“გრიგოლეთში რამდენიმე დღის წინ ვიყავი და მოსახლეობას შევხვდი, ამ პრობლემის შესახებ არავის არ უთქვამს. ჩვენ აუცილებლად გავითვალისწინებთ მოსახლეობის ნებას და ყველაფერს კანონის ფარგლებში გავაკეთებთ. “სოკარს” არანაირ მშენებლობაზე არ აქვს ჩვენთან განცხადება შემოტანილი”, _ გვითხრა ურუშაძემ.
პასუხი კი, რომელიც სოკარისგან ორი დღის წინ გადაეცა გრიგოლეთის მოსახლეობას ასეთია:
“სოფელ გრიგოლეთის დასახლებაში არსებული ტერიტორია 2010 წლიდან ქართული კომპანია შპს “სოკარ ჯორჯია პეტროლეუმის” კანონიერ საკუთრებაშია.
“ასევე გაცნობებთ, რომ ნებისმიერი სახის ობიექტის მშენებლობას ჩვენი კომპანია ყოველთვის საქართველოში მოქმედი კანონმდებლობის მოთხოვნების სრული დაცვით ახორციელებს.
ამასთანავე, კომპანია „სოკარ ჯორჯია პეტროლეუმი“ ესწრაფვის ქონდეს საუკეთესო, კეთილმეზობლური დამოკიდებულება მოსახლეობასთან”, _ნათქვამია წერილში.
გრიგოლეთის მოსახლეობის ერთმა ნაწილმა გვითხრა, რომ მათ კონკრეტულად აინტერესებს თუ რის აშენებას აპირებს “სოკარი”.
