მესტიაში სათხილამურო საბაგიროების მოწყობის პროექტი შეიცვალა

შესაბამისად, მომზადდა ხელშეკრულების ცვლილების პროექტი, რის საფუძველზეც დაზუსტდა მთელი რიგი ფინანსური, იურიდიული და ტექნიკური საკითხები, რომელიც არ იყო გათვალისწინებული ზემოაღნიშნულ ხელშეკრულებაში. კერძოდ: დაზუსტდა მოსაწოდებელი საბაგიროების ტექნიკური აღწერილობა; გაიზარდა “Pomagalski”-ის მხრიდან სამშენებლო სამუშაოებზე ზედამხედველობის ვადები იმავე ღირებულების ფარგლებში; დაზუსტდა ტვირთის მოწოდების ადგილი; შემუშავდა სამუშაოების გეგმა-გრაფიკი; “Pomagalski”-ის მხრიდან გამოიყო სპეციალური წარმომადგენელი ტვირთების დასაწყობების პროცესის მონიტორინგზე. ამავე კომპანიამ აიღო ვალდებულება დაახლოებით 300 ათასი ევროს ღირებულების სათადარიგო ნაწილებისა და აღჭურვილობის მოწოდებაზე.

ხელშეკრულებაში ცვლილებების შეტანისთანავე, საქართველოს რეგიონული განვითარებისა და ინფრასტრუქტურის სამინისტრომ შპს “გეოგრაფიკთან” გააფორმა ხელშეკრულება აღნიშნული საბაგიროების სამშენებლო-სამონტაჟო სამუშაოების პროექტის მომზადებასთან დაკავშირებით.

პროექტის წარმატებით განსახორციელებლად, მიმდინარეობს შემდეგი სახის ღონისძიებები:

1. ტვირთების შეუფერხებლად გადაადგილების მიზნით, გაფართოვდა 2 საავტომობილო გვირაბი და შევიწროებული გზის მონაკვეთი;

2. ჩატარდა გარემოზე ზემოქმედების კვლევა;

3. შესწავლილ იქნა კულტურული მემკვიდრეობის საკითხები; ჩატარდა არქეოლოგიური კვლევა;

4. მომზადდა ზვავებისა და მეწყერსაშიში ზონების მართვისა და წყალმომარაგების გეგმა;

5. ჩატარდა კომპლექსური საინჟინრო გეოლოგიური კვლევა;

6. მზადდება განსახორციელებელი სამუშაოების საპროექტო-სახარჯთაღრიცხვო დოკუმენტაცია.

7. მომზადებულია ძირითადი წინაპირობები, რათა ეკონომიკის სამინისტრომ, მოქმედი კანონმდებლობის შესაბამისად, გასცეს მშენებლობის ნებართვა, რის შემდეგაც დაიწყება სამუშაოები.

აღნიშნული ღონისძიებები დასრულდება მიმდინარე წლის დეკემბერში, რის შემდეგაც სამინისტრო გამოაცხადებს ტენდერს სამშენებლო-სამუშაოების ჩასატარებლად გამარჯვებული კომპანიის გამოსავლენად. სამუშაოები, სავარაუდოდ, დაიწყება 2014 წლის გაზაფხულიდან, ხელსაყრელი კლიმატური პირობების დადგომისთანავე. სამუშაოების ძირითადი ნაწილის დასრულება განსაზღვრულია 2014 წლის ბოლოსთვის.

საბაგიროების მთლიანი ღირებულება შეადგენს 18 მილიონ ევროს დღგ-ს გარეშე (ამავე თანხაში შედის უკვე დამონტაჟებული 2 საბაგირო), ხოლო დარჩენილი 4 საბაგიროს სამშენებლო-სამონტაჟო ღირებულება სავარაუდოდ შეადგენს 30-32 მილიონ ლარს.

მნიშვნელოვანია ისიც, რომ სახელმწიფომ უარი თქვა მანკიერ პრაქტიკაზე და პროექტი სრულად მოაქცია სამართლებრივ ჩარჩოებში. ამ მხრივ, საქართველოს რეგიონული განვითარებისა და ინფრასტრუქტურის სამინისტრომ განახორციელა შემდეგი ღონისძიებები:

1. შეიქმნა სახელმწიფო კომპანია პროექტის განსახორციელებლად;

2. სასაწყობე მეურნეობის მოსაწყობად მულახში ადგილობრივი მოსახლეობისგან შესყიდულ იქნა 33950 მ2 მიწა.

3. მოეწყო სასაწყობე მეურნეობა, სადაც საწყობდება საბაგიროებისთვის საჭირო ინვენტარი (ამ დროისთვის 115 კონტეინერი უკვე დასაწყობებულია, ხოლო 40-ზე მეტი კონტეინერის მიღება უმოკლეს ვადაში მოხდება);

4. მოეწყო ადმინისტრაციული შენობა, საიდანაც მოხდება სამშენებლო-სამონტაჟო სამუშაოების მართვა;

5. შეიქმნა სპეციალური პორტალი, რომელიც ონლაინ-რეჟიმში აჩვენებს, თუ სად რა ტიპის საბაგიროებია დასაწყობებული.

მნიშვნელოვანია, რომ პროექტი სოციალურ ხასიათსაც ატარებს და მისი განხორციელების შემდეგ მნიშვნელოვნად მოიმატებს მესტიის მუნიციპალიტეტის მაცხოვრებელთა სოციალურ-ეკონომიკური დონე. მესტიის ხუთ თემში შემავალი სოფლების მოსახლეობას გაუჩნდება სამუშაო ადგილები და შემოსავლის წყარო.

განახლებული პროექტის მიხედვით, თეთნულდს ტურისტების მიღება 2015 წლიდან შეეძლება.