კაჭრეთში ჩავიდნენ ფერმერები, საქართველოს სხვადასხვა ქალაქების საკრებულოს წევრი ქალბატონები. ღონისძიებას ესწრებოდნენ მთავრობის, პარლამენტის და საერთაშორისო ორგანიზაციების წარმომადგენლები. გამოფენის შემდეგ გაიმართა დისკუსია, რომელშიც მონაწილეობა მიიღო საქართველოს პარლამენტის აგრარულ საკითხთა თავმჯდომარე გიგლა აგულაშვილმა.
“გურია ნიუსი” გიგლა აგულაშვილს ესაუბრა.
-ბატონო გიგლა, სოფლად მცხოვრები ქალების საერთაშორისო დღე მსოფლიოში 2008 წლიდან აღინიშნება, საქართველოში წელს პირველად ჩატარდა თუ წინა წლებშიც აღინიშნებოდა ეს დღე?
–წინა წლებში აღინიშნებოდა თუ არა ნამდვილად ვერ გეტყვით, მე წელს პირველად ვიყავი. ღონისძიებას ვესწრებოდი არა მხოლოდ როგორც აგრარული კომიტეტის თავმჯდომარე, არამედ როგორც პარლამენტის გენდერული თანასწორობის ცენტრის წარმომადგენელი. ჩამოსულები იყვნენ ფერმერი ქალბატონები სხვადასხვა ქალაქებიდან, ასევე საკრებულოების და გამგეობების თანამშრომლები. ჩვენთან იყო გაეროს ახალი წარმომადგენელი საქართველოში, რომელიც სულ ერთი კვირაა რაც ჩამოვიდა და ეს პირველი გასვლა იყო ქალაქგარეთ. იყვნენ სოფლის მეურნეობის და განათლების სამინისტროების წარმომადგენლები. რაც ყველაზე მეტად დამაიმედებელი იყო ჩემთვის ამ ღონისძიებაზე და სასიხარულო, მე ვნახე დიდი დაინტერესება კოოპერატივების მიმართ. ზოგიერთ ფერმერს უკვე დაურეგისტრირებია და ქმნიან კიდეც საოცარ პროდუქტებს. აქ წარმოდგენილი იყო ისეთი პროდუქტები, რომლებიც სათანადო შეფუთვის პირობებში საკმაოდ დიდ კონკურენციას გაუწევენ ბევრ ადგილობრივ და უცხოურ პროდუქციას, მაგალითად გირჩის მურაბა, ფიჭვის გირჩი-ფილტვების სამკურნალო საშუალება დასხვა…დღევანდელი დღე იყო გენდერული თანასწორობის გამოვლენის ნათელი მაგალითი, ამდენი საქმიანი, ფერმერი და მეწარმე ქალბატონი ერთად შეკრებილი ნამდვილად არსად ყოფილა. გამოფენა-გაყიდვის დროს გვქონდა ურთიერთგაცნობითი საუბრები, გამოფენის შემდეგ კი დახურულ სივრცეში რომ გადავინაცვლეთ გაიმართა დისკუსია საკმაოდ აქტუალურ და პრობლემატურ საკითხებზე და მართლაც ცხარე, მაგრამ ყველა მხარისთვის ბევრის მომცველი და საინტერესო დისკუსია შედგა. რაღაცაზე შევთანხმდით, რაღაცაზე შეიძლება ვერა, მაგრამ მე თვალნათლივ დავინახე ერთი უდიდესი პრობლემა-ინფორმაციის ნაკლებობა ხალხში, რასაც ჩვენ ვაკეთებთ, ამის თაობაზე სათანადო ინფორმაცია არ აქვს მოსახლეობას.
-რა თემები და საკითხები წამოწიეს წინა პლანზე ფერმერმა ქალბატონებმა?
-ჩვენ ამ დისკუსიაზე მრავალი თემა განვიხილეთ, აქ ლაპარაკი იყო დაბალპროცენტიან სესხებზე, კოოპერირების პროცესზე, პროდუქციის ხარისხის ამაღლებაზე, სურსათის უვნებლობაზე და სხვა. ასე რომ თითქმის ჩამოვყალიბდით თუ რა ნაბიჯები უნდა იქნეს ჩვენი მხრიდან გადადგმული მათი ხელშეწყობისთვის. ნამდვილად კმაყოფილები დავრჩით და შეიძლება ითქვას პოზიტიური დღე იყო.
-ტრადიციად იქცევა სოფლად მცხოვრები ქალების დღის აღნიშვნა?
-ვფიქრობ, რომ ეს პროცესი გაგრძელება გაეროსთან ერთად და მთავრობის ხელშეწყობით. მე რაიონებში შეხვედრების დროს დავინახე, რომ ქალბატონები მამაკაცებზე არანაკლებ დაინტერესებულნი არიან წარმოებით, შეიძლება მეტადაც კი და ამიტომ აუცილებლად სჭირდებათ ხელშეწყობა და გვერდით დგომა. კარგია რომ ეს მხარდაჭერა იქნება საერთაშორისო ორგანიზაციების და ფონდების მხრიდანაც, ეს პროცესი უკვე დაწყებულია და დღევანდელმა დღემ თვალნათლად დაგვანახა ამ პროცესის პერსპექტივა. კიდევ ერთი, რაც აუცილებლად მინდა ვთქვა, მათი მოთხოვნა იყო არა მომეცით ფული, არა მომეცით დიდი ოდენობის კრედიტი, არამედ მოგვეცით მეტი განათლება, ცოდნა, ტექნოლოგიები და სხვა. ერთი სიტყვით საკმაოდ ნაყოფიერი და სასიამოვნო ღონისძიება იყო.
