კვლევაში მიმოხილულია ქართული მხარის მიერ სამოქმედო გეგმის პირველი ორი ბლოკის შესრულების მონიტორინგის შედეგები 2013 წლის აგვისტო-სექტემბრის მდგომარეობით. ამასთანავე, კვლევა სამოქმედო გეგმის მხოლოდ პირველ ფაზას, ანუ საკანონმდებლო ცვლილებებს ეხება, ვინაიდან საქართველო იმპლემენტაციის ფაზაზე აქტიურად ჯერ არ გადასულა.
“საქართველოსა და ევროკავშირს შორის სავიზო რეჟიმის ლიბერალიზაციის სამოქმედო გეგმის შესრულების მონიტორინგისას გამოჩნდა, რომ ევროკავშირის მოთხოვნათა დიდი ნაწილი საქართველოს შესრულებული აქვს, თუმცა კვლავ რჩება ბევრი საკითხი, რაც რეფორმირებას საჭიროებს. ამ ეტაპისთვის, ევროკავშირის 11 მოთხოვნიდან საქართველომ ოთხი შეასრულა, ერთი – მეტწილად შეასრულა, ხუთი – სანახევროდ შეასრულა. ერთი საერთოდ არ შესრულდა. ვფიქრობთ, რომ საკმაოდ კარგი ტემპებით მიდის ეს პროცესი და დანარჩენი საკითხებიც, რომლებიც შემუშავების პროცესშია, წარმატებით დასრულდება. რაც შეეხება სამთავრობო უწყებებს, ამ კუთხით საკმაოდ კარგად თანამშრომლობენ და ჩვენ მიერ მოთხოვნილ ინფორმაციას გვაწოდებენ,” _ აცხადებს “საერთაშორისო გამჭვირვალობა – საქართველოს” პროექტების ხელმძღვანელი ლევან ნატროშვილი.
როგორც ანგარიშშია ნათქვამი, ბლოკი ერთში, რომელიც დოკუმენტების უსაფრთხოებას ეხება, ბიომეტრული პასპორტების ჩათვლით, ერთი მოთხოვნა არ შესრულდა. ესაა, ეთიკის კოდექსისა და ტრენინგის პროგრამების შემუშავება კორუფციასთან ბრძოლის, პირადი დოკუმენტების უსაფრთხო მართვისა და პერსონალურ მონაცემთა დაცვის საკითხებზე საჯარო უწყებების წარმომადგენელთათვის, რომელთა საქმიანობა უკავშირდება პასპორტებს, პირადობის დამადასტურებელ მოწმობებსა და სხვა სამოქალაქო სტატუსის დოკუმენტებს.
უწებების ეთიკის კოდექსთან დაკავშირებით სახელმწიფო სერვისების განვითარების სააგენტოს თავმჯდომარე ლევან სამადაშვილი ამბობს, რომ მნიშვნელოვანია, მკაფიოდ იყოს ჩამოყალიბებული ამგვარი ტიპის მოთხოვნები ევროკავშირის მხრიდან და მისი უწყება რჩევებს აუცილებლად გაითვალისწინებს.
“რაც შეეხება სხვა ინფორმაციას, რომელიც დღეს ფონდისგან გაჟღერდა, შეესაბამება რეალობას. მნიშვნელოვანია, რომ სწორხაზოვნად არ მოხდეს შეფასება, იქიდან გამომდინარე, რომ თვითონ ევროკავშირიც არ აფასებს ამას სწორხაზოვნად. მაგალითად, საუბარი იყო იმაზე, რომ მკაცრი ვადა უნდა განისაზღვროს ბიომეტრულ პასპორტებთან დაკავშირებით. ვერცერთი სახელმწიფო ვერ იტყვის, რომ ძალიან მოკლე ვადაში გაუუქმებს თავის მოქალაქეს ასეთი ტიპის პასპორტს. ამაზე დარწმუნებული ვარ, ევროკავშირს არ ექნება უარყოფითი რეაქცია,” _ ამბობს სამადაშვილი.
როგორც “საერთაშორისო გამჭვრივალობა – საქართველოს” ანგარიშშია ნათქვამი, მეორე ბლოკში არსებული მოთხოვნები, საზღვრის ინტეგრირებული მართვის, მიგრაციის მართვის და თავშესაფრის პოლიტიკის შესახებ, სრულად, ან ნაწილობრივ შესრულებულია.
ევროინტეგრაციის სამინისტროს წარმომადგენელმა ანგარიშის პრეზენტაციისას აღნიშნა, რომ სამოქმედო გეგმის შესრულება არ ნიშნავს, რომ ევროკავშირი აუცილებლად მიიღებს საქართველოსთან უვიზო რეჟიმს.
“ბოლო ეტაპზე მაინც დამოკიდებულები ვართ კონკრეტულ წევრ-სახელწიფოების ნებაზე. არ არის გამორიცხული გარკვეული საკითხების, ან შიდა პრობლემების გამო კიდევ გაჭიანურდეს პოლიტიკური გადაწყვეტილების მიღების პროცესი ევროპელების მხრიდან. თუმცა , არსებობს დაპირება, რომ საქართველო მიიღებს უვიზო მიმოსვლას. ალბათ, ეს არ მოხდება ერთ, ან ორ წელიწადში,” _ აღნიშნა მან.
რაც შეეხება, დანარჩენი მოთხოვნების შესრულებას, რომლებიც ევროკავშირმა საქართველოს სამოქმედო გეგმის სახით წარუდგინა, “საერთაშორისო გამჭვრივალობა-საქართველო” ამ შედეგების პრეზენტაციას ნოემბერში გეგმავს.
