აქციას სოფელ ბაილეთის რწმუნებული სპარტაკ მამულაიშვილი, მაჟორიტარი დეპუტატი პაატა კიღურაძე და სოფლის მოსახლეობა ესწრებოდა.
“ასე გავიგეთ, მიწები გაყიდული რომ იყო, _ აქ ბოძებს არჭობდნენ და როცა ვკითხეთ, ვინ ხართ-თქო, გვიპასუხეს, ეს ტერიტორია გაყიდულიაო. 40 ჰექტარი მიწა გაუყიდია ეკონომიკის სამინისტროს, ადრე ჩვენი სოფლის მცხოვრებლებმა წაგვართვესარ დავთმობთ არავითარ შემთხვევაში”, _ აცხადებდა მოსახლეობა “გურია ნიუსთან”.
სიტუაცია მას შემდეგ დაიძაბა, როცა ადგილზე სოფელ ბაილეთის მკვიდრი ომარ დარჩია გამოჩნდა, რადგან სწორედ მას ადანაშაულებენ 15 ჰექტარი მიწის უკანონოდ მითვისებაში. მოსახლეობასა და დარჩიას შორის, სიტყვიერი შეურაცხყოფა მალე ფიზიკურ შეურაცხყოფაში გადაიზარდა, რაც რამდენი წუთში მაჟორიტარი დეოპუტატის უშუალო ჩარევით განიმუხტა.
ამ სიტუაციაში მთავარი მოქმედი პირი არის ბაილეთელი თამაზ ცერცვაძე, რომელიც წლების მანძილზე მუშაობს ოზურგეთის მუნიციპალიტეტის გამგეობაში, ქონების და მიწის მართვის სამსახურში და 25 წელი სულს ხდიდა ბაილეთის მოსახლეობას, ამბობდნენ შეკრებილები.
თამაზ ცერცვაძე “გურია ნიუსთან” ორი სიტყვით შემოიფარგლა და ამბობს, რომ ის აღნიშნულ მიწებთან დაკავშირებით არაფერ შუაში არაა.
“მაგ ხალხს ვერაფერი ვერ შევაგნებინე, კაი წლების წინ გაყიდულ მიწებს მე მაბრალებენ, მაგრამ ახლა ისიც დამაბრალონ 40 ჰექტარი მიწა რომ გაიყიდა, ჩვენ არავინ არაფერს არ გვეკითხება, არაფერ შუაში არ ვართ”, _ გვითხრა ცერცვაძემ.
ომარი დარჩია “გურია ნიუსთან” აცხადებს, რომ ის არაფერ შუაშია და პასუხს აგებს ყველაფერზე, თუ ის დამნაშავე აღმოჩნდება. კითხვაზე, ვინ უნდა აგოს პასუხი ყოველივე ამაზე, დარჩია აცხადებს, რომ მან ეს მიწა მთავრობისგან იყიდა და ყოველწლიურად 530 ლარს იხდის. მიწის გაფორმებაშიც ფული გადაიხადა. “მე ვიფიქრე, რატომ უნდა ეყიდა ჩინელებს და თურქებს, ვამჯობინე, რომ მე მეყიდა…”
რწმუნებული სპარტაკ მამულაიშვილი კი “გურია ნიუსთან” ამბობს, რომ ხალხს აქვს კონსტიტუციური და იურიდიული უფლება, დაიცვას თავისი უფლებები, თუ მიაჩნია, რომ ეს უფლებები დაირღვა. შეუძლია, მიმართოს სამართალდამცავ ორგანოებს, სასამართლოს, პროკურატურას.
“ცოდვები არიან ნამდვილად, არ ეკითხებიან, ისე იყიდება მიწები. საქმის კურსში არც ჩვენ ვართ. ზემოდან ხდება ეს ყველაფერი, ვინ ყიდულობს, ხალხმა არ იცის”, _ აცხადებს რწმუნებული.
სპარტაკ მამულაიშვილი, ოზურგეთის მუნიციპალიტეტის სოფელ ბაილეთის რწმუნებული: ვისაც მიწა აქვს მიღებული 2000 წელს, არის მეპატრონე და არ აქვს ჩამოწერილი მისივე განცხადების საფუძველზე, შეუძლია, მიმართოს სასამართლოს. მიწებს ჩვენ არ ვყიდით, მიწა არის სახელმწიფო რესურსი და ყიდის ეკონომიკის სამინისტრო.
_ ბატონო სპარტაკ, იყავით თუ არა საქმის კურსში, როცა მიწები გაიყიდა და დაახლოებით, რამდენ ჰექტარზეა საუბარი?
_არ ვიყავი საქმის კურსში, ამ ადგილზე სამი ჰექტარი მიწაა გაყიდული.
_ თქვენ როგორ მიგაჩნიათ, სამართლიანია თუ არა იმ ადამიანების პროტესტი, ვინც დღს აქციას მართავს?
_ ზოგის სამართლიანია ნამდვილად, თუმცა, არიან ადამიანები, ვისაც ჩამოწერილი აქვთ ეს მიწები საკუთარი განცხადების საფუძველზე. ეს განცხადებები ჩემთან ინახება.
_იმაზე რას გვეტყვით, რომ ეს ადამიანები ბატონ ომარ დარჩიას და ბატონ თამაზ ცერცვაძეს მიწის უკანონო მითვისებაში ადანაშაულებენ?
_ არაფერი უკანონობა არ არის, შეცდომით არის ამ ადამიანების მიწები მოყოლილი შიგნით. მიწის კანონიერ მფლობელებს შეუძლიათ, მიმართონ ახლანდელ მიწის მეპატრონეებს. ისინი ვალდებული არიან, მათ ეს თანხა აუნაზღაურონ. თუ არ გადაუხდიან, მიმართონ სასამართლოს.
_ბატონო სპარტაკ, ომარ დარჩია მიწის გაყიდვაში გადანაშაულებთ თქვენ. ის აცხადებს, რომ უშუალოდ თქვენ გაყიდეთ მიწები და იყიდა მან.
_ჩვენგან არ უყიდია, აიღო იჯარით, 12 კაცი აწერდა ხელს იჯარის გაფორმებაზე, მათ შორის, ერთი _ მეც. ეს იყო რამდენიმე წლის წინ.
რაც შეეხება ომარ დარჩია, ჩვენთან საუბარში ამბობს, რომ 15 ჰექტარი მიწის ნაკვეთი, რომლის მითვისებაშიც მას ადანაშაულებენ, სახელმწიფოსგან იყიდა.
_ბატონო ომარ, თქვენ გადანაშაულებეს 15 ჰექტარი მიწის ნაკვეთის უკანონოდ მითვისებაში, რას გვეტყვით ამასთან დაკავშირებით?
_ ეს მიწა მე უკანონოდ არ მიმითვისებია. ვიყიდე სახელმწიფოსგან.
_ კონკრეტულად, ვისგან?
_აგერ, ერთი წარმომადგენელია რწმუნებული და მეორე _ დეპუტატი.
_რწმუნებულმა გადმოგცათ 15 ჰექტარი მიწა? მან გაყიდა?
_კი, ბატონო. დიახ, მან გაყიდა.
_თქვენ გადაიხდეთ თანხა, შეიძინეთ ეს მიწა და არ იკითხეთ , იყო თუ არა საკუთრებაში მიუზომავი?
_თუ ვინმეს აქვს პრეტენზია, ჰკითხოს მთავრობას. მე რა ვიცოდი, ვისი იყო მიწა. მე განვაცხადე, მაქვს სურვილი შევიძინო მიწა-მეთქი, მთავრობამ კი მომყიდა. მაქვს დარეგისტრირებული და ყოველწლიურად ვიხდი გადასახადს.
