არჩილ კბილაშვილმა მისი უწყების სამომავლო პრიორიტეტებზე და გამოწვევებზე ისაუბრა. შეხვედრას პრემიერ-მინისტრი, პარლამენტის თავმჯდომარე, დიპლომატიური კორპუსისა და არასამთავრობო ორგანიზაციების წარმომადგენლები დაესწრნენ.
ბიძინა ივანიშილის განცხადებით, პროკურატურაში მიმდინარე საკადრო ცვლილება მნიშვნელოვანია, მაგრამ ” საკადრო ცლილებებზე მეტად საჭიროა, პროკურატურის მიმართ სახელმწიფოს დამოკიდებულება შეიცვალოს. პროკურატურამ უნდა დაიბრუნოს საზოგადოების ნდობა.”
არჩილ კბილაშვილმა 1 წლიანი მუშაობის შედეგები შეაფასა. მისი თმით, საკადრო ცვლილებებთან ერთად პროკურატურა სისხლის სამართლის ლებრალიზაციის მიმართულებითაც აქტიურად მუშაობს.
“333 პროკურორიდან და 43 გამომძიებლიდან 50 პროკურორი და 6 გამომძიებელი გათავისუფლდა. მათ ნაცვლად 148 პროკურორი და 48 გამომძიებელი დაინიშნა. მათგან 70 პროცენტი ყოფილი ადვოკატია.
ამრიგად , პროკურატურის პერსონალი 33 პროცენტით განახლდა და თუ გავითვალისწინებთ იმას, რომ მთავარი პროკურორი, მისი ყველა მოადგილე, ყველა დეპარტამენტის თავმჯდომარე, მათი მოადგილეები, 12 სამმართველოს უფროსი, ყველა საოლქო პროკურორი, ასევე, თბილისის პროკურორი, მათი მოადგილეები, 18 რაიონული პროკურორი და მათი მოადგილეები შეიცვალნენ, მაშინ იოლად დავასკვნით, რომ პროკურატურის პერსონალის 33 პროცენტიანი განახლება ხარისხობრივად მნიშვნელოვნად აღემატება დარჩენილ 67 პროცენტს, რადგან შეიცვალა ყველა ის პირი, რომელიც სისხლის სამართლის პოლიტიკის გენერირებაში მონაწილეობდა,” _ განაცხადა კბილაშვილმა.
მისივე თქმით, 2012 წლის 1 ნოემბრიდან წინა ხელისფლების 7 მინისტრის, თბილისის მერის და 300 სხვა საჯარო მოხელის მიმართ სისხლის სამართლებრივი დევნა დაიწყო. ასევე, ახალი ხელისუფლების მიერ დანიშნული 33 საჯარო მოხელის მიმართაც. მთავარი პროკურორი ამბობს, რომ უწყების ერთ-ერთ მთავარ პრიორიტეტად სისხლის სამართლის პოლიტიკის ლიბერალიზაცია რჩება.
“პროკურატურის მიერ სასამართლოში პატიმრობის მოთხოვნა 44-დან 35 პროცენტამდე შევამცირეთ, სასამართლო გათავისუფლდა პროკურატურის დიქტატისაგან და პროკურატურის ყოველი 100 მოთხოვნიდან სასამართლოს მიერ 76 მოთხოვნა უცვლელად კმაყოფილდება.
2012 წლიდან 89 პირს უსაფუძვლოდ და დაუსაბუთებლად წარდგენილი ბრალდება მოეხსნა, მაშინ, როდესაც წარსულში ანალოგიური ფაქტი არ მომხდარა. ყველა სიკეთესთან ერთად, პროკურორებს მოგებული პროცესისგან მიღებული სიამოვნების განცდა დაუბრუნდათ. სისხლის სამართლის პოლიტიკა გირაოსა და საპროცესო შეთანხმების მიმართ შევცვლეთ და ფისკალური ეფექტი ჩამოვაშორეთ. წინა წელთან შედარებით გირაოს მეშვეობით გადახდილი თანხა 32 პროცენტით შემცირდა, ხოლო საპროცესო შეთანხმებით ამოღებული ჯარიმების ოდენობა – 55 პროცენტით.
ამით ვცდილობთ საზოგადოებას დავუბრუნოთ რწმენა, რომ სამართალი არ არის ბიუჯეტის შევსების საშუალება,” _ აღნიშნა კბილაშვილმა.
მისივე თქმით, “პროკურორები დღეს უკვე აღარ ითავსებენ “პრარაბის” ფუნქციას და ბიზნესმენებს არ აიძულებენ ამათუ იმ ინფრასტრუქტურულ პროექტში “შემოწირულობა” განახორციელონ.
