(გურია ნიუსი, ლანჩხუთი) _ ლანჩხუთის მუნიციპალიტეტის თავმჯდომარემ რევაზ ჩიტიძემ და გამგებელმა გიორგი გოგუაძემ ერთობლივი ბრიფინგი გამართეს. ძირითადი თემა სოფლის მხარდაჭერის პროგრამების გახორციელება გახლდათ.
ჩიტიძემ ვრცლად ისაუბრა იმ სიახლეებზე, რომელიც სოფლის მხარდაჭერის პროგრამით ხორციელდება: _ გასული წლის ბოლოს, დაიწყო სოფლის პროგრამებისთვის მზადება. შეხვედრები მოსახლეობასთან, მუნიციპალიტეტის 55-ვე სოფელში გასულ წელსვე დაიწყო და დაახლოებით თვენახევრის მანძილზე გრძელდებოდა. მიმდინარე წელს კიდევ ერთხელ მოხდა მოსახლეობის არჩევნის შეჯერება. საბოლოოდ, ხალხის ხელმოწერით იქნა დადასტურებული ის პრიორიტეტები, რომელთა გადაწყვეტასაც სოფლის მკვიდრნი მოითხოვდნენ. ეს წინასწარი სამუშაოები გაკეთდა იმისთვის, რომ შემდეგ ვინმეს არ ეთქვა, რომ სოფელში არავის ეუბნებიან, რას აკეთებენო, _ თქვა ჩიტიძემ, _ სოფლის პროგრამებისთვის გამოყოფილია 685 ათასი ლარი. შემდგომ ეტაპზე უნდა შევარჩიოთ, ვინ შეასრულებს ამ სამუშაოებს. აქაც არის დაცული სოფლის მოსახლეობის ინტერესი _ არსებობს მთავრობის განკარგულება, სადაც წერია, რომ მაქსიმალურად უნდა დასაქმდეს სოფლის მოსახლეობა. ორშაბათიდან აქტიურად დაიწყება სოფლის პროგრამების შესრულების სამუშაოები და სექტემბრის ბოლოს დასრულების პირას იქნება. ჩვენი სურვილია, რომ ამ პროცესში მოსახლეობა აქტიურად ჩაერთოს.
რევაზ ჩიტიძემ ქალაქის ინფრასტრუქტურის განვითარებისთვის გამოყოფილ თანხაზეც ისაუბრა. მისი თქმით, ამ კუთხით, 500 ათასი ლარია გამოყოფილი და ის რამდენიმე ხიდის და ქუჩის რეაბილიტაციას მოხმარდება: “ხიდების მოწესრიგებაზე დაიხარჯება 40 ათასი ლარი, 442 ათასი _ ქუჩების რეაბილიტაციაზე, 19 ათასი ლარი კი მრავალსართულიანი საცხოვრებელი სახლის სახურავის რეაბილიტაციას მოხმარდება. ეს პროექტები წლის ბოლომდე დასრულდება.
კითხვაზე, თუ რამდენი ადამიანისთვის შეიქმნება დროებითი სამუშაო ადგილი, საკრებულოს თავმჯდომარემ უპასუხა: _ მინიმუმ, ალბათ, 2 000 ადამიანი დასაქმდება.
ბრიფინგზე ისაუბრეს ენერგეტიკის მინისტრთან ორი დღის წინ ჩატარებულ შეხვედრაზეც. ითქვა, რომ საშეშე მერქნის მოპოვებასთან დაკავშირებით, მიმდინარე წელს გარკვეული სიახლეები იგეგმება. კერძოდ, მოქალაქე ბილეთს აიღებს ბანკში, სადაც მითითებული იქნება მისთვის სასურველი მერქნის სახეობა და თუ რისთვის იყენებს მას. აქ საუბარია როგორც შეშაზე, ასევე სამასალე მორებზე. სპეციალურ ქვითარზე მითითებული იქნება, თუ სად მოჭრის მოქალაქე ხეს და იმ რეინჯერის ტელეფონის ნომერი, რომელიც მას დაეხმარება. ასევე, მოხდება ხის გადამამუშავებელი სახერხების ლიცენზირება. ტყეკაფების გამოყოფაზე პრობლემა არ იქნება და ადამიანს იმდენის ხე-ტყის მოპოვების საშუალება იქნება, რამდენსაც მოისურვებს. მართალია, ხშირ შემთხვევები ტყესთან მისასვლელი გზები ცუდ დღეშია, მაგრამ როგორც მუნიციპალიტეტის ხელმძღვანელობა ამბობს, მომავალი წლიდან, ალბათ, ამ გზების მოწესრიგებაც დაიწყება, ტყის გაცემა კი იჯარით მოხდება, მაგრამ იქ შესვლა და ხის მოჭრა ნებისმიერ ადამიანს შეეძლება, რა თქმა უნდა, შესაბამისი ნებართვის შემდეგ.
გია გოგუაძემ ავტობანის მშენებლობაზე ისაუბრა. გამგებლის თქმით, სპეციალისტები გასულ წელს იმყოფებოდნენ ლანჩხუთში და ტერიტორიების შესწავლა დაიწყეს: _ 8 ტერიტორიულ ერთეულში გადის ეს მაგისტრალი. 42 კილომეტრი გზა გაკეთდება ლანჩხუთში. მოსახლეობას, რომელთა კუთვნილ ფართობებზე გაივლის ავტობანი, მიეცემათ გარკვეული კომპენსაცია. სუფსაში მოხდება მინი-ქალაქის მშენებლობა _ ისეთის, როგორსაც გზებზე “ვისოლი” აშენებს.
