_ ამის შესახებ ზოტის, სურების, ქედის, ხულოს, შუახევის მუნიციპალიტეტების მცხოვრებლებს სპეციალური ტრენინგები ჩაუტარდათ. როგორც აღმოჩნდა, უმრავლესობამ ახლადარჩეული პრეზიდენტის ფუნქციების შესახებ არაფერი იცის. მათ შორის, საუბნო საარჩევნო კომისიის წევრებმაც, რომლებიც შეხვედრებს ესწრებოდნენ.
პროექტს USAIDის დაფინანსებით, საარჩევნო სისტემების საერთაშორისო ფონდის (IFES) ფინანსური მხარდაჭერით საქართველოს მედია მონიტორინგის ცენტრი ახორციელებს.
პროექტი საპრეზიდენტო არჩევნების შესახებ გურია-აჭარის რეგიონების მაღალმთიანეთში მცხოვრები ამომრჩევლის ინფორმირებას ისახავს მიზნად.
საქართველოს დემოკრატიული განვითარების კავშირის იურისტი ირაკლი პაპავა და ორგანიზაცია “თემი და თვითმმართველობა” წარმომადგენელი დავით ჩხიკვაძე, აუდიტორიას საკანონმდებლო სიახლეებს, საარჩევნო პროცედურებს აცნობდნენ, აუდიტორიის მოთხოვნის შესაბამის განმარტებებს აკეთებდნენ, პასუხობდნენ დასმულ კითხვებს.
შეხვედრებს საარჩევნო სისტემის საერთაშორისო ფონდის (IFES) წარმომადგენელი ლელა ჯავახიშვილი, საქართველოს მედიამონიტორინგის ცენტრის ხელმძღვანელი ია მამალაძე, ცენტრის აღმასრულებელი დირექტორი თეონა აქუბარდია და კოორდინატორი გიორგი სიხარულიძე ესწრებოდნენ.
ჩოხატაურის მუნიციპალიტეტის სოფელ ზოტში გამართულ შეხვედრაზე აღინიშნა, რომ ასეთი ტრენინგები აუცილებლად უნდა ჩატარდეს. განსაკუთრებით მაღალმთიან რეგიონებში, სადაც ინფორმაციის მიწოდების ძალიან მწირი შესაძლებლობებია.
იგივეს ამბობენ ჩოხატაურის მუნიციპალიტეტის სოფელ ზემოსურების მცხოვრებლებიც, რომლებიც მიუხედავად ძალიან ცუდი ამინდისა, ტრენინგს მაინც დაესწრნენ. როგორც ტრენინგის დასრულების შემდეგ გვითხრეს, “ახალი და საინტერესო ინფორმაციის მისაღებად რამდენიმე კილომეტრის ფეხით გავლა ნამდვილად უღირთ.”
_ იმის გასაგებად, რა უფლებები მაქვს, რა უნდა ვიცოდე და როგორ უნდა მოვიქცე არჩევნებზე, ნამდვილად ვერ გავივლი 35 კილომეტრს მუნიციპალიტეტის ცენტრამდე და რომელიმე არასამთავრობო ორგანიზაციამდე – ამის არც ფინანსური რესურსია და არც ფიზიკური შესაძლებლობა. ამიტომ, მისასალმებელია, როდესაც ასეთი ტიპის შეხვედრები ტარდება და შესაძლებლობა გვაქვს ადგილზევე გავიგოთ უფრო მეტი, დავსვათ შეკითხვები და მივიღოთ კომპეტენტური პასუხები, _ აღნიშნა ნანა სანიკიძემ.
ამ მაღალმთიან სოფელში ინფორმაციის, პოლიტიკური განათლების მიმართ დიდი ინტერესი ტრადიციულად და ისტორიულად არსებობს.
საინტერესოდ წარიმართა შეხვედრები აჭარის მთიანეთშიც.
_ ძალიან საინტერესო ტრენინგი იყო, ბევრი რაღაც არ ვიცოდი, ვისწავლეთ და გავიგეთ. რისთვისაც მადლობა მინდა გადავუხადო პროექტის ავტორებს, _ აღნიშნა ჩვენთან საუბრისას ქედის მუნიციპალიტეტის მცხოვრებმა ქიზიმ ბაძენაძემ.
_ ბატონო ქიზიმ, რამდენიმე საათიანი ტრენინგიდან რა დასკვნა გამოიტანეთ, რატომ არის თქვენი მისვლა არჩევნებზე აუცილებელი?
_ აუცილებელია, ჩემი ნება გამოვავლინო და ყველა მოქალაქეს იგივეს მოვუწოდებ, _ ამბობს ბატონი ქიზიმი.
ქედელი ამირან შერვაშიძე მიიჩნევს, რომ მსგავსი სახის ტრენინგები უფრო ხშირად უნდა ჩატარდეს.
_ ძალიან საინტერესო ტრენინგი იყო. გავიგეთ საარჩევნო კანონები, პრეზიდენტის, პრემიერის უფლებები. ასეთი სახის ტრენინგები უფრო ხშირად უნდა ჩატარდეს იმისთვის, რომ საზოგადოება საარჩევნო კანონმდებლობაში კარგად გაერკვეს, _ გვითხრა ამირან შერვაშიძემ. საინტერესოა, რომ მოსახლეობა, გარდა საარჩევნო თემატიკისა, ადგილებზე არსებული მწვავე პრობლემების შესახებ ითხოვს დისკუსიას და ინფორმირებას.
ხულოში გამართულ ტრენინგს, რიგით მოქალაქეებთან ერთად, საარჩევნო ადმინისტრაციის წარმომადგენლები და გამგეობის თანამშრომლებიც დაესწრნენ. როგორც ტრენინგის დასრულების შემდეგ აღინიშნა, მსგავსი ტიპის შეხვედრები და ინფორმაცია დემოკრატიული არჩევნების ჩატარების ერთ-ერთი წინაპირობაა.
იგივეს ფიქრობენ შუახევის მუნიციპალიტეტშიც, სადაც განსაკუთრებით ქალი ამომრჩევლების აქტიურობა შეინიშნებოდა.
_ ცოცხალ აუდიტორიასთან შეხვედრა ყოველთვის მნიშვნელოვანია, მით უმეტეს მთაში. მართალია, არჩევნები ახლოვდება, მოსახლეობამ გარკვეული გამოცდილება დააგროვა დემოკრატიულ საქართველოში, მაგრამ ჯერ კიდევ ბევრი პროცედურაა გაუგებარი. მით უმეტეს, რომ ისეთ ქვეყანაში ვცხოვრობთ, სადაც ყოველ თვეში საკანონმდებლო თუ საკონსტიტუციო ცვლილება მიმდინარეობს. ძალიან საინტერესო ტრენინგი ჩაუტარდათ ამომრჩევლებს. მჯერა, რომ ეს არჩევნები გაცილებით დემოკრატიულად ჩატარდება და ამ ტრენინგზე მოსახლეობის აქტიურობაც ამის დასტურია, _ აღნიშნა ჩვენთან საუბრისას ოთარ ცინარიძემ.
აჭარის მთიანეთში გამართულ შეხვედრებს ადგილობრივი პრესის და ტელეკომპანია “აჭარის” ჟურნალისტებიც ესწრებოდნენ ცოდნის გაღრმავების და ტრენინგების გაშუქების მიზნით.
