ჩვენ ამ საკითხებზე ინტერვიუ მერიის ეკოლოგიისა და გამწვანების საქალაქო სამსახურის უფროსთან, გიორგი ქორქაშვილთან ჩავწერეთ.
_ბატონო გიორგი, ჭადრის ზოგიერთი სახეობის მიმართ ადამიანები ალერგიულები არიან. განსაკუთრებით მძიმეა მათი ყვავილობის პერიოდი. მერიამ კი ისევ ამ მცენარის ნერგების შემოტანა გადაწყვიტა. რატომ მაინც და მაინც ჭადარი?
_ვინ დაადგინა, რომ ჭადარი ალერგიას იწვევს? ეს არის ძალიან სადაო საკითხი, იმიტომ რომ ზოგადად, ალერგიას შეიძლება ყველა ხე იწვევდეს. რაც შეეხება ჭადარს, იგი არის მტვრის ყველაზე კარგად მშთანთქავი მცენარე და ყველაზე მეტ ჟანგბადსაც გამოჰყოფს. თან ურბანული მცენარეა, რაც მთავარია. შემიძლია ვიდაო ნებისმიერ ადამიანთან ჭადრის ალერგიულობასთან დაკავშირებით.
_მაშინ რატომ მოჭრეს თბილისში წინა წლებში ჭადრის ხეები ალერგიის მიზეზით? (შეგახსენებთ, რომ 2010 წელს ჭადრები მასობრივად გაჩეხეს. მაშინ ალერგიულობასთან ერთად აღმაშენებელზე ჭადრების მოჭრა იმითაც ახსნეს, რომ მიწისქვეშა კომუნიკაციებს და შენობებს აზიანებდა, ხოლო ლაგუნა ვერესთან გზის სავალ ნაწილს აფართოვებდენ და შუქნიშნების ქვეშ ე.წ. კუნძულებს (გადასასვლელებს) აკეთებდნენ).
_ადრე შეიძლება მოიჭრა. თუ ხმობაშია შესული, ან დაავადებულია, შესაძლებელია ჭადარი მოიჭრას, რომ სხვას არ გადაედოს ავადმყოფობა.
_თბილისის რომელ უბნებში დაირგვება ჭადრები? და რა თახაა გამოყოფილი ამისთვის?
_ჭადრები ძირითადად დაირგვება სანაპიროზე. 80% იქ წავა. აუდიტის სამსახურმა რაც დაგვიდგინა, ესაა 130 ლარი ერთ ნერგზე.
_რა რაოდენობის ნერგის შემოტანა და დარგვა იგეგმება სულ თბილისში?
_ჩვენ სხვადასხვა სახის, დაახლოებით, 7 ათასამდე ნერგის დარგვას ვგეგმათ მარტო შემოდგომაზე. ეს იქნება ჭადარი, მუხა და ფიჭვი. ურბანულ მცენარეებზე გვაქვს ძირითადი აქცენტი გაკეთებული, ანუ იმაზე, რაც დიდი ქალაქებისთვის არის მიზანშეწონილი. ჭადარს ჰაერის გაწმენასთან ერთად ხმაურის შთანთქმის ფუნქციაც გააჩნია. სადაც ქარის პრობმლემაა, მაგალითად, დიდ დიღომში და ვარკეთილში, იქაც უნდა დავრგოთ. ყოველ წელს საშუალოდ, ჩვენ 12-15 ათას ნერგს ვრგავთ. როცა ვაცხადეთ ტენდერებს და ვაფორმებთ ხელშეკრულებას, პირობებში მოვლა-პატრონობის ხარჯთაღრიცხვაც გათვანილწინებულია. კომპანია პასუხისმგებელია ასევე ნერგის ხარისხზეც.
_თბილისის მერიის გამწვანების სამსახურს ხშირად აკრიტიკებენ დედაქალაქში არსებული ეკოლოგიური პრობლემების გამო. როგორია დედაქალაქის გამწვანების პოლიტიკა და კიდევ რა ღონისძიებებს ახორციელებთ მდგომარეობის გამოსასწორებლად?
_ამ ეტაპზე ზუსტდება თბილისის შემოგარენში გამწვანებული ტერიტორიების ფართები. მოხდება მათი ელექტრონული აღრიცხვა, რაც დაახლოებით 25 წელია არ გაკეთებულა. ჩვენ დღეს გვყავს 70-მდე კონტრაქტორი ფირმა, რომელიც გამწვანების კუთხით მუშაობს. ფაქტობრივად, ვისაც ამგვარი ბიზნესი აქვს, ყველა არის ჩვენი კონტრაქტორი. ასევე ძალიან მნიშვნელოვანია თბილისში არსებული ბარ-პარკების განახლება და ამ მიმართულებითაც ვმუშაობთ. თუ გვაქვს საშუალება ყოველ წელს ვახორციელებთ რგვებს. დაახლოებით, 100-მდე სკვერს ჩაუტარდა რეკონსტრუქცია ბოლო 3 წლის განმავლობაში. თბილისის შემოგარენში ვახორციელებთ ტყის მასივის აღდგენას. ჩვენი რელიეფიდან გამომდინარე თბილისი განსაკუთრებულად მწვანე ქალაქი ვერასოდეს იქნება და ამას უნდა შევეგუოთ. მთავარი ამოცანაა, რომ თბილისის შემოგარენი დაიფაროს მწვანე ნარგავებით, რომ მოგვეცეს საშუალება სუფთა ჰაერი ვისუნთქოთ.
_ბატონო გიორგი, არ შემიძლია, ბოლოს რომ არ გკითხოთ, რა ხდება თბილისის პრობლემურ ტერიტორიებთან დაკავშირებით? ვგულისხმობ, ასათიანის ქუჩას, კუს ტბის „ციყვების ტერიტორიას“ და დიღმის მე-12 კილომეტრს, სადაც ხეების ჭრის ნებართვები მერიის მიერაა გაცემული და ბოლო დროს ჩატარებული აქციის მონაწილეები სწორედ თქვენი პასუხისმგებლობის საკითხის დაყენებას ითხოვდნენ ამასთან დაკავშირებით.
_ასათიანთან დაკავშირებით სისხლის სამართლის საქმეა აღძრული და მიმდინარეობს მოკვლევითი სამუშაოები. კომპანიამ, რომლის მფლობელობაშია აღნიშნული ტერიტორია, კანონარღვევით მოჭრა ნარგავები და გამოძიება დაადგენს მათ ბრალეულობას. რაც შეეხება კუს ტბის ტერიტორიას, იქ მეპატრონე აბსოლუტრად კანონიერად ახორციელებს მწვანე ნარგავების გადატანას თავის კუთვნილ ტერიტორიაზე. დიღმის მე-12 კილომეტრთან დაკავშირებით „თეგეტა მოტორსმა“ და მოსახლეობამ იდაონ ერთმანეთში. ამას სასამართლო გადაწყვეტს. რაც შეეხება იქ ნარგავების ჭრას, როგორც ვიცი, ნებართვა არ გაგვიცია და ვინმე თუ ახორციელებს ხეების ჩეხვას, ეს ინფორმაცია ჩვენთან არ შემოსულა.
