ბრიუსელში ოფიციალური ვიზიტით მყოფი საქართველოს მოქმედი პრეზიდენტის, მიხეილ სააკაშვილისა და ევროკომისიის პრეზიდენტ ჟოზე მანუელ ბაროზოს შეხვედრას უცხოური მედიასაშუალებები აქტიურად გამოეხმაურნენ. “ევრობზერვერი” და “ფაინენშლ ტაიმსი” მის დაკავებაზე და თანმხლებ მკვეთრად უარყოფით შედეგებზე საუბრობს.
როგორც “ევრობზერვერი” წერს, ევროკავშირი საქართველოს “დაიჟინებით ურჩევს”, სააკაშვილი ციხეში არ ჩასვას.
“პოლიტიკური პრობლემები უნდა გადაწყდეს პოლიტიკური გზით და არა სამართლებრივი მეთოდით. ველოდებით, რომ საქართველო თავის ვალდებულებებს შეასრულებს, ისეთს, როგორიც სასამართლოს პოლიტიკური შემადგენლისაგან გათავისუფლებაა“, _ განაცხადა ბაროზომ სააკაშვილთან შეხვედრის შემდეგ გამართულ ბრიფინგზე.
რაც შეეხება თვითონ მიხეილ სააკაშვილის პოზიციას აღნიშნულ საკიTხზე, მან ჟურნალისტებთან საუბრისას განაცხადა, რომ პრემიერ-მინისტრი არაერთხელ დაემუქრა სასამართლო დევნით.
“ისიც კი თქვა, რა ბრალდებებს წამომიყენებს და ისიც, საბოლოოდ რომელ ციხეში ჩავჯდები.”
გამოცემა “ევრობზერვერის” ცნობით, ევროკავშირი საქართველოს დაჟინებით სთხოვს წარმავალი პრეზიდენტის, მიხეილ სააკაშვილის მიმართ სს დევნა ევროკავშირის სამიტის წინ არ დაიწყოს, რადგან თუ სააკაშვილი გასამართლდა, შესაძლოა, ამან რთული ატმოსფერო შექმნას ევროკავშირის სამიტის წინ, რომელიც ვილნიუსში ნოემბრის ბოლოს არის დაგეგმილი.
გამოცემას მაგალითად უკრაინაში განვითარებული მოვლენები მოჰყავს და აღნიშნავს, რომ “ყოფილი ლიდერების წინააღმდეგ განხორციელებულმა შერჩევითმა მართლმსაჯულებამ” უკვე შეუქმნა პრობლემები უკრაინასა და ევროკავშირს შორის ურთიერთობას, და ამ პრობლემების წინაშე შეიძლება საქართველოც დადგეს.
რაც შეეხება “ფაინენშლ ტაიმს”, გამოცემა წერს, რომ “ვარდების რევოლუციის” ლიდერის შესაძლო დაპატიმრება ევროკავშირთან სასიცოცხლოდ მნიშვნელოვანი შეთანხმების ხელმოწერას შეაჩერებს და ეს საქართველოს რუსული ორბიტისკენ უბიძგებს.
“პრემიერ-მინისტრ ბიძინა ივანიშვილის გზავნილი არაერთგვაროვანია… (ის) გადადგომას აპირებს და ემიჯნება ყოფილი პრეზიდენტის წინააღმდეგ ნებისმიერ შესაძლო სისხლის სამართლებრივ დევნას, მაგრამ იმეორებს, რომ გამოძიება გამორიცხული არ არის.
“ის ან იმაზე მიანიშნებს, რომ სააკაშვილის ბედი – მისი დაკავება, სასამართლო, ციხე – უკვე გადაწყვეტილია, ან სააკაშვილს ემიგრაციისკენ უბიძგებს,” – წერს ბრიტანული გამოცემა.
“ვარდების რევოლუციის” ლიდერის დაპატიმრება აღქმული იქნება უკრაინის ყოფილი პრემიერის, იულია ტიმოშენკოს დაკავების განმეორებად. მას შემდეგ, რაც ტიმოშენკოს გათავისუფლება უკრაინისთვის ევროკავშირთან შეთანხმების პირობად იქცა, საეჭვოა, ევროპელი ლიდერები საქართველოს სხვაგვარად მიუდგნენ, მიუხედავად იმისა, რომ უკრაინის დემოკრატიული რეგრესი მას შემდეგ, რაც იქ 2010 წელს პრეზიდენტი ვიქტორ იანუკოვიჩი გახდა, გაცილებით უარესი იყო.
“ევროკავშირთან შეთანხმების გარეშე კი საქართველოს შეიძლება არ დარჩეს სხვა არჩევანი, გარდა იმისა, რომ იმაზე მეტად წავიდეს რუსეთთან ურთიერთობის აღდგენაზე, ვიდრე დღეს ამას ივანიშვილი აკეთებს. ეს შეიძლება ნიშნავდეს პუტინის საბაჟო კავშირში გაწევრიანებასაც კი,” – აღნიშნულია “ფაინენშლ ტაიმსში”.
“არაა გამორიცხული, რომ სააკაშვილის მიმართ დევნა დაიწყოს და ის დააკაონ, რადგან ამაზე მსჯელობა მიდის. არსებობს საზოგადოების ნაწილი, რომელიც ამას დაჟინებით მოითხოვს და ხშირად ხდება ხოლმე ისე, რომ ხელისუფლებას აქვს საზოგადოებისგან თავისებური ზეწოლა, ძალიან ხშირად იძულებულია დაარქვას დამნაშავე მას, ვისაც საზოგადოება არქმევს”, _ ამბობს “გურია ნიუსთან” საუბრისას საზოგადოებრივი კომუნიკაციების სპეციალისტი არჩილ გამზარდია.
მისივე თქმით, თუკი იქნება რეალური ბრალდებები, რომელიც დამტკიცდება, კანონის წინაშე ყველა თანაბრად უნდა წარსდგეს, მაგრამ ასევე უნდა გავითვალისწინოთ ისიც, რომ ნებისმიერ შემთხვევაში, ქვეყანა ვალდებულია მისი და მისი საზოგადოების იმიჯს გაუფრთხლდეს.
“რაც შეეხება პერსპექტივებს, მიმაჩნია რომ თუკი ცალსახა მოცემულობა იქნება მისი ბრალეულობის დამტკიცცების და დამტკიცდება, მაშინ ბუნებრივია კანონი შეღავათს არ უნდა იძლოდეს. მაგრამ, თუკი ცალსახა მოცემულობა და იდეალურად დამტკიცებული ბრალდებები არ იქნება, მაშინ ნებისმიერ შემთხვევაში ქვეყანა უნდა მოიქცეს ისე, რომ თავის იმიჯს გაუფრთხილდეს. სააკაშვილი არსებულზე უარეს მდგომარეობაში ციხეში არ ჩავარდება, პირიქით, ციხიდან შესაძლოა გარკვეული პერსპექტივებიც მიიღოს. იმ მხრივ, რომ გრძელვადიან გათვლაში შესაძლოა საზოგადოების მხარდაჭერა მოიპოვოს. ამიტომ, რელურად ამ წუთში სააკაშვილს იმაზე მეტად ვერ დააზიანებენ, რა მდგომარეობაშიც არის.
“ეს არცერთ შემთხვევაში კარგად არ აისახება ჩვენს მეგობარ ქვეყნებში. უფრო მეტიც, არსებობს განცხადებები, რომელიც ყოფილი პრემიერს ვანო მერაბიშვილსაც კი იცავს და არსებობს შეხედულებები, რომელიც მას ამართლებს, რადგან დღემდე მის საქმეში რეალური მტკიცებულებები არ ჩანს. ეს პროცესი დააზარალებს ქვეყანას, ჩვენს იმიჯს, რადგან გამოდის რომ საზოგადოება ირჩევს კრიმინალებს, რადგან ესაა არჩეული პრეზიდენტი და არა რაიმე სხვა ფორმით მოყვანილი. ნებისმიერ შემთხვევაში ვფქრობ, რომ სახლემწიფომ სხვაგვარი მიდგომა უნდა გამოხატოს.
“თუ სააკაშვილი დაასწრებს და თავშესაფრს მოითხოვს, დარწმუნებული ვარ მიღებს კიდეც, ეს კიდევ უფრო უარესი იქნება”, _ უთხრა “გურია ნიუსს” გამზარდიამ.
სპეციალისტის თქმით, შესაძლოა არსებობდეს მოსაზრება, რომ თუ სააკაშვილს დააკავებენ ქვეყნის შიგნით ხელისუფლების რეიტინგი მოიმატებს, თუმცა, ესეც არასწორი მიდგომაა, რადგან საქართველოში მათ სტაბილური რეიტინგი აქვთ.
“არაფერში სჭირდებათ ნეგატივზე აგებული დამატებითი რეიტინგი. არაფერს მისცემს მათ. ისინი სამომავლო პერსპექტივებს უნდა გაუფრთიხლდნენ”, _ განმარტავს გამზარდია.
