ვინ აგებს პასუხს მიტოვებული მშენებლობის გამო

მიატოვეს რემონტი, დაგვტოვეს უპატრონოდ, განადგურებული, დაზიანებული ბინების შემყურე, რომელშიც ისე წვიმს, როგორც გარეთ. იქნებ თქვენ, ჟურნალისტებმა შეძლოთ ჩვენი დახმარება?!” _ ამ თხოვნით ჯერ კიდევ 2012 წლის აგვისტოში მიმართეს “გურია ნიუსს” რუსთაველის ქუჩის მცხოვრებლებმა, რომლებიც საქმის გამოძიებას და პასუხისმგებელი პირებისგან დახმარებას ითხოვენ, თან ადგილობრივ ხელისუფლებას უყურადღებობაში და უპატივცემულობაში დებენ ბრალს.

“გურია ნიუსი” ოზურგეთში ამ ბინის სარემონტო სამუშაოებთან დაკავშირებით არაერთხელ წერდა.

მას შემდეგ ერთი წელზე მეტი გავიდა და აღნიშნულ ბინებში კვლავ ისეთივე მდგომარეობაა მიუხედავად ხელისუფლების შეცვლისა _ ოთახებში ისევ ჩამოდის წვიმა. მოსახლეობა დახმარებას ითხოვს, თუმცა ამაოდ. ოზურგეთის მუნიციპალიტეტის გამგეობაში აცხადებენ, რომ ამ მშენებლობის შესახებ დოკუმენტაცია ვერ ნახეს, შესაბამისად, არავინ იცის, ვინ აგებს პასუხს მიტოვებული მშენებლობის გამო.

საჯარო ინფორმაციას ამ გასაიდუმლოებული მშენებლობის შესახებ, “გურია ნიუსი” შარშან, მთელი წლის განმავლობაში ელოდებოდა, დღეს კი ოზურგეთის მუნიციპალიტეტის გამგებლის მოადგილემ გიორგი ღურჯუმელიძემ ღიად გვითხრა, რომ გამგეობაში ამის შესახებ ინფორმაცია არ მოეპოვებათ.

ოზურგეთის მუნიციპალიტეტის გამგეობის ინფრასტრუქტურის სამსახურის უფროსი თემურ გიორგაძე აღნიშნულ თემასთან დაკავშირებით წერილობით გვთხოვს კითხვების დასმას:

_ მოგვწერეთ წერილი და გაგცემთ პასუხს,

_ ბატონო თემურ, მოსახლეობას აინტერესებს, გამგეობა მიიღებს თუ არა ზომებს, რომ ამ ოჯახებს ზამთარში ეს პრობლემა აღმოფხვრილი ჰქონდეთ…

_ ჩვენ, მგონი, შევთანხმდით, რომ კითხვები უნდა მოგვწეროთ და გიპასუხებთ წერილობით. პირდაპირ რომ ჩამწერს ჩართავთ, შეიძლება? მოვიდნენ ის მოქალაქეები და გავცემთ პასუხს.

_ ისინი იყვნენ მოსულები არაერთხელ და უთხარით, რომ არ არიან გადახურვის სიაში და შესაბამისად ვერ დაეხმარებოდით.

_ მოგვწერეთ წერილობით კითხვები და გიპასუხებთ.

გიორგი ღურჯუმელიძე, ოზურგეთის მუნიციპალიტეტის გამგებლის მოადგილე:

_ ეს ბინები არის უხარისხოდ გადახურული, ასე ვთქვათ აგდებულად, ნაჩქარევად გაკეთებული. ეს ხდებოდა წინასაარჩევნოდ. არ ვიცი რა რატომ, მაგრამ გამგეობაში მაგის დოკუმენტაცია არ მოიძებნება, ვერ ვნახეთ. არ ვიცით, ვინ გადახურა, რომელი ფირმა ასრულებდა ამ სამუშაოებს, ვის მოეთხოვება პასუხი, არ არსებობს ხელშეკრულება. ალბათ რაიმე შემოწირულობა იყო. ვერ გეტყვით, ვერანაირი დოკუმენტაცია ვერ მოვიპოვეთ.

_ ბატონო გიორგი, მოსახლეობამ რა დააშავა? ისინი დახმარებას ითხოვენ.

_ მე, პირადად ვიყავი მაგ სახლის სახურავზე ორჯერ და მყავდა სპეციალისტები წაყვანილი. ეს არის სპეციფიური თემა, მოითხოვს დიდ სამუშაოს. ხარვეზები რომ გამოასწორო, დრო და დიდი შრომა სჭირდება. ჯერ უნდა დავადგინოთ, რა თანხები იქნება საჭირო. ჩვენც მზად უნდა ვიყოთ, რომ დავიწყოთ შესაბამისი სამუშაოები. მუშაობას ვერ დავიწყებთ, თუ ხელშეკრულება და შესაბამისი თანხა არ გვექნება. ვმუშაობთ ამ თემაზე და ამ დღეებში აუცილებლად გვეცოდინება პასუხი. ეს სახლი არ შედის არც სტიქიით დაზარალებულთა ბაზაში, ამიტომ სხვა თანხებია მოსაძიებელი.

_ ანუ, მუნიციპალიტეტის გამგეობა რა პასუხს აძლევს მოსახლეობას?

_ მე ვიცი, რა მდგომარეობაა იმ ოჯახებში. თუ ადგილობრივ ბიუჯეტში დაგვრჩება შესაბამისი თანხები, გავაკეთებთ ხარჯთაღრიცხვებს, დავგეგმავთ სამუშაოებს, გამოვაცხადებთ ტენდერს და გამარტივებული შესყიდვით გავაკეთებინებთ კომპეტენტურ სპეციალისტებს.