საზოგადოებრივი ორგანიზაცია “საქართველო 21-ე საუკუნის” პრეზიდენტ გიორგი კასრაძის თქმით, ჭიათურას თვითმმართველი ქალაქის სტატუსის აღდგენით საკუთარი ბიუჯეტი გაუჩნდება და ის თანხები, რომლებიც ცენტრალურ ბიუჯეტში ირიცხება, სტატუსის მინიჭების შემდეგ ადგილობრივ ბიუჯეტში დარჩება, რაც სასიკეთოდ აისახება თითოეული ჭიათურელის შემოსავალზე.
“ჭიათურელი სტუდენტებით დაკომპლექტებული ჩვენი ორგანიზაციის მიზნები რეგიონებში არსებული პრობლემების კვლევა და პრევენციული ღონისძიებების დაგეგმვაა. ამ შემთხვევაში “საქართველო 21-ე საუკუნე” მხარში უდგება ჭიათურელი ხალხის პროტესტს თვითმმართველი ქალაქის სტატუსის აღდგენასთან დაკავშირებით.
სანამ საქართველოში თვითმმართველი ქალაქის სტატუსს შემოიღებდნენ, არსებობდა რესპუბლიკური დაქვემდებარების ქალაქები და მათი რიცხვი 10-ს შეადგენდა. სწორედ იმ 10 ქალაქის სიაში იყო ჭიათურაც, მაგრამ, როდესაც წინა მთავრობამ თვითმმართველი ქალაქის სტატუსი დაამკვიდრა, ჭიათურა სტატუსის გარეშე დატოვა ზუგდიდთან, გორთან და თელავთან ერთად. რეგიონული განვითარების სამინისტრო მუშაობს თვითმმართველობის რეფორმაზე, რომლის ამოქმედების შემდეგაც თვითმართველ ქალაქთა რიცხვი 5-იდან 18-მდე იზრდება. სამწუხაროდ, სტატუსის გარეშე რჩება ჭიათურა.
სამინისტროს განმარტებით ჭიათურაში 2002 წლის მონაცემებით, 14 600 მაცხოვრებელია დაფიქსირებული და შესაბამისად, ჭიათურა სტატუსს ვერ მიიღებს. მათ მიერ შემუშავებულ კანონპროექტში არ მოიძებნება ჩანაწერი, რომელიც დაადასტურებს, რომ მხოლოდ 2002 წლის მონაცემებით უნდა იხელმძღვანელონ თვითმმართველი ქალაქის სტატუსის მისანიჭებლად. გვაქვს 2012 წლის ცესკოს მონაცემები, რომელიც ადასტურებს, რომ მხოლოდ ქალაქ ჭიათურაში რეგისტრირებულია ხმის უფლების მქონე 15000 ამომრჩეველზე მეტი, ასევე თუ გავითვალისწინებთ არასრულწლოვნებს, ანუ ხმის უფლების არმქონე პირებს, ეს ციფრი საგრძნობლად გაიზრდება. დაზუსტებული მონაცემებით შეგვიძლია, ვთქვათ, რომ ჭიათურაში დღეს 19 550 ადამიანი ცხოვრობს.
ჭიათურა უძლიერესი სამრეწველო ქალაქია ამიერკავკასიაში და კავკასიის 10 ეკონომიკურად ძლიერი ქალაქების სიაშია. საჭიროა, რომ ეს ქალაქი სტატუსის გარეშე არ დარჩეს. იგი ამისთვის ყველა მოთხოვნას აკმაყოფიელებს, დაწყებული ურბანული განვითარებით, დამთავრებული 4 დამეგობრებული ქალაქით. ქალაქს აქვს თეატრი, რომელიც 120 წლისაა და ევროპის თეატრთა კავშირის წევრია (მხოლოდ 3 ქართული თეატრია ამ კავშირის წევრი). ქალაქის სტატუსი მინიჭებული აქვს 1921 წლიდან. საბჭოთა კავშირში პირველი სრულყოფილი სამგზავრო საბაგირო გზაც სწორედ ჭიათურაში აშენდა 1954 წელს, პირველი ჩოგბურთის კორტიც ამ ქალაქში ააშენეს ინგლისელებმა 1901 წელს. გეოგრაფიულად ქალაქის უბნები განთავსებულია მდინარე ყვირილის მარჯვენა და მარცხენა სანაპიროზე, რაც ტიპური ქალაქის იერსახეს სძენს ჭიათურას. შესაბამისად, თუ ჭიათურა ვერ მოხვდება თვითმმართველი ქალაქების სიაში, ეს ძალიან ცუდი იქნება და გამოიწვევს ჭიათურის მოსახლეობის დიდ უკმაყოფილებასა და პროტესტს,” _ აცხადებს გიორგი კასრაძე.
