“დღეს ჩვენთან ტესტირება უფრო პოპულარულია, ვიდრე სხვა საგანმანათლებლო აქტივობები”

_ როგორ შეაფასებდით სოციალურ ქსელში ოლიმპიადის ტესტების გამოქვეყნებას? რასთან გვაქვს საქმე?

_ტესტების გამოქვეყნებამ კიდევ ერთხელ დაგვანახა, რომ ცენტრალიზაცია არაეფექტურია. ოლიმპიადების როლის არც დაკნინება და არც გაზვიადება არ ღირს. მისი მიზანია, ნიჭიერი ბავშვების აღმოჩენა. კარგია, როდესაც ნიჭიერი ბავშვების აღმოჩენის პროცესი სკოლაში იწყება. ჩვენ ყოველწლიურად ვიგებთ ხოლმე ამბებს იმ ბავშვების შესახებ, რომლებმაც მონაწილეობა მიიღეს საერთაშორისო ოლიმპიადებში და მოიპოვეს გამარჯვება. მათი რაოდენობა არც თუ ისე დიდია, თუმცა, განსაკუთრებული ნიჭით დაჯილდოებულ ბავშვებს საშუალება რომ აქვთ მონაწილეობა მიიღონ საერთაშორისო ოლიპიადებში, უდავოდ დადებითი მოვლენაა. ოლიმპიადა არ შეიძლება იყოს წარმატებული მოსწავლეების აღმოჩენის ერთადერთი საშუალება. დღეს ტესტები იმდენად “პოპულარულია” ჩვენს საზოგადოებაში, რომ ალტერნატივების განხილვა პრაქტიკულად არ ხდება. ეს ოლიმპიადაც ხომ ერთგვარი ტესტირებაა, რომელიც ჩვენთან სკოლაში იწყება. აი, აქ არის სუსტი რგოლი: სკოლებს ტესტებს უგზავნიან. თუ სასკოლო ოლიმპიადების მასალების მომზადება და მისი ადმინისტრირება სკოლის დონეზე უნდა განხორციელდეს და სკოლა იქნება პასუხისმგებელი, მსგავს პრობლემებს თავიდან ავიცილებთ. როდესაც ოლიმპიადის მნიშვნელობაზე ვსაუბრობთ, არ უნდა დაგვავიწყდეს, რომ საერთაშორისო ოლიმპიადებში ძირითადად იმ სკოლის მოსწავლეები მონაწილეობენ, სადაც გაძლიერებულია მათემატიკის სწავლება. შესაძლოა, ოლიმპიადის ფორმატის გადახედვაზეც გვეფიქრა. დღეს მოსწავლეებისთვის ის დამატებით ტესტირებას წარმოადგენს. უფრო მისაღებად მიმაჩნია სასკოლო კონფერენციების და არა სასკოლო ოლიმპიადების ჩატარება, მაგრამ დღეს ჩვენთან ტესტირება უფრო პოპულარულია, ვიდრე სხვა საგანმანათლებლო აქტივობები.

_ ვინ უნდა აგოს პასუხი მსგავს ფაქტზე?

_ ნამდვილად უსიამოვნო ფაქტი მოხდა. პროცედურების შეცვლა უფრო მნიშვნელოვანი მგონია, ვიდრე ვინმეს პასუხისმგებლობის დაყენება. პრაქტიკულად, სკოლებმა ელექტრონული ფოსტით მიიღეს ტესტები, ამობეჭდეს და ერთმა ადამიანმა ის საჯარო გახადა dropbox-ის საშუალებით. თუ პროცედურა არ შეიცვალა, დაზღვეულები ვართ, რომ მსგავსი რამ არ განმეორდება? საქართველოში 2100 სკოლაა, ვიფიქროთ, რა ფინანსური რესურსები დასჭირდება ტესტების თითოეულ სკოლაში ტრანსპორტირებას, მათ ამობეჭდვას. საჭიროა ამდენი დანახარჯი სასკოლო ოლიმპიადისთვის? ხომ არ ჯობს სკოლებზე დელეგირება? ან მისი ჩანაცვლება სხვა საგანმანათლებლო საქმიანობით?

_ როგორ ფიქრობთ , უნდა ჩაითვალოს თუ არა ჩატარებულად ეს ოლიმპიადა?

_ დღეს ბავშვებს სასკოლო ოლიმპიადა ინგლისურში აქვთ. ტესტები გამოქვეყნდა და სოციალურ ქსელებში გავრცელდა. თუ იგივე ტესტები უნდა გააკეთონ მოსწავლეებმა, შეიძლება, ამას ოლიმპიადა ვუწოდოთ? მე არ ვთვლი, რომ ეს სასკოლო ოლიმპიადა უნდა იყოს.

_ სოციალურ ქსელში ასევე გავრცელდა ინფორმაცია, რომ ქუთაისის #41 საჯარო სკოლის მოსწავლეებმა პროტესტის ნიშნად დატოვეს ოლიმპიადა, როგორ შეაფასებდით ამ ფაქტს?

_ მე რომ სკოლის მოსწავლე ვიყო, შეიძლება, მეც არ წავსულიყავი ასეთ ოლიმპიადაზე. გააჩნია, ვინ როგორ უყურებს ამ საკითხს. როდესაც ტესტები ცნობილია, ეს შეჯიბრებითობაც კი აღარ არის. ამიტომ ამ ბავშვების საქციელს შევაფასებდი, როგორც გუშინდელი ფაქტის მიუღებლობას.