“ეს კანონპროექტი საქართველოს პარლამენტის ბიუროს სხდომაზე დღეს შემოვიდა და ხვალ ან ზეგ დეპუტატებს გადმოგვეცემა. ძალიან დიდი დოკუმენტია, რომელიც თვითმმართველობის ბევრი სფეროს მოიცავს. ამ კვირაში მისი განხილვა სავარაუდოდ, არ დაიწყება. ამას სჭირდება საკამოდ კარგი შესწავლა. რა თქმა უნდა, რაღაცეებს ვიცნობ კანონპროექტიდან, მაგრამ საბოლოო ვერსია გამოთქმულ მოსაზრებებს ითვალისწინებს, ამიტომ, უმჯობესია ჯერ გავეცნო და კომენტარი შემდეგ გავაკეთო. რაც შეეხება განხილვის ვადებს, დაახლოებით 15 დღის ვადაში უნდა დაიწყოს კომიტეტებზე განხილვა, სამი კვირის შემდეგ კი პირველი მოსმენით ჩვენი კომიტეტი განიხილავს. ეს საკმაოდ გრძელი პროცედურაა. ძალიან სწრაფი მუშაობაა საჭირო იმისთვის, რომ როგორც არის საჭირო ყველაფერი ისე მოესწროს. საკმაოდ რთულია ეს, ამიტომ ჯერჯერობით ვერაფერს გეტყვით. როგორც იცით, 20 დეკემბერს პარლამენტის სხდომები წყდება და საგაზაფხულო სესია თებერვალში განახლდება. 20 დეკემბრამდე უნდა მოესწროს ამ კანონპროექტის დამტკიცება”, _ აცხადებს ჟორჟოლიანი. მისივე თქმით, არის იმის ალბათობაც, რომ დაჩქარებული წესითაც კი, პარლამენტმა კანონი დეკემბრის ბოლომდე ვერ მიიღოს.
“საქმე იმაშია, რომ ეს ორგანული კანონია და ძალიან ბევრ საკითხთა წრეს მოიცავს. სერიოზული კანონია. თვითმმართველობის კანონი კი ჰქვია, მაგრამ თვითმმართველობა ქვეყანაში მმართველობის ნაწილია. ამიტომ, ეს ფაქტობრივად, მმართველობის კანონია. ამ კანონში არის რამდენიმე საკითხი, რაც დეტალურ განხილვას საჭიროებს. სერიოზული ავტონომიური კომპეტენციების გადაცემა ხდება ადგილობრივი თვითმმართველობებისათვის, რაც მათ აქამდე არასდროს ჰქონიათ.
ასე რომ, ეს ძალიან სერიოზული განხილვა იქნება, რასაც დაჩქარებულად და ჰაიჰარად ვერ მივიღებთ; ამიტომ ჩემთვის ძნელია თქმა ეს პროცესი როგორი ტემპით წავა. ყველაფერია მოსალოდნელი, ისიც, რომ 20 დეკემბრამდე ამის დამტკიცება ვერც მოესწროს. ინტენსიური მუშაობაა საჭირო. რაც შეეხება კანონპროექტთან დაკავშირებით ჩვენს შენიშვნებს, ეს გვექნება მაშინ, როცა კანონპროექტი ჩვენს კომიტეტამდე მოვა. ეს კი დაახლოებით 20 დღეში იქნება საუკეთესო ვარიანტში. თუმცა ეს არის პირველი მოსმენა. მეორე მოსმენაზე, დეკემბერში კი უფრო სერიოზული შენიშვნები გვექნება. ის იქნება დეტალური მსჯელობა”, _ უთხრა “გურია ნიუსს” ჟორჟოლიანმა.
რეგიონული განვითარებისა და ინფრასტრუქტურის სამინისტროს საზოგადოებასთან ურთიერთობის სამსახურის უფროსის მაგდა პოპიაშვილის განცხადებით, პარლამენტს ბიუროს სხდომაზე თვითმმართველობის კოდექსი დღეს შევიდა და დარეგისტრირდა, თუმცა მისი განხილვა პარლამენტის პლენარულ სხდომაზე საშემოდგომო სესიაზე უნდა მოხდეს.
“მთავრობამ ეს კანონპროექტი 30 ოქტომბერს დაამტკიცა; ამის შემდეგ გააგზავნა საქართველოს პარლამენტში განსახილველად. პარლამენტის ბიუროზე დღეს მოხდა კანონპროექტის განხილვა და დაარეგისტრირა. ამის შემდეგ, პროცედურულად, საკომიტეტო განხილვები უნდა დაიწყოს პარლამენტში, განხილვების შემდეგ კი, დღის წესრიგში დადგება პლენარულ სხდომაზე. რაც შეეხება ვადებს, სადამდე შეიძლება გაიწელოს პროცესი, ეს მთლიანად პარლამენტზეა დამოკიდებული რამდენად დაჩქარებულად მოხდება განხილვა თუ არა. ნებისმიერ შემთხვევაში, კანონპროექტის განხილვა საშემოდგომო სესიაზე უნდა მოხდეს. ანუ 20 დეკემბრამდე”, _ ამბობს პოპიაშვილი “გურია ნიუსთან” საუბარში.
შეგახსენებთ, რომ ახალი კანონმდებლობის და რეფორმის შედეგად გაიზრდება თვითმმართველი ქალაქების რაოდენობა და დღეს არსებულ ხუთ თვითმმართველ ქალაქთან ერთად, ეს სტატუსი დამატებით ცამეტ ქალაქს მიენიჭება. არსებული დარაიონება შეიცვლება და თვითმმართველი ქალაქების მიმდებარედ ჩამოყალიბდება თემები, რომლის ბაზაზეც რამდენიმე მუნიციპალიტეტი ფორმირდება.
თვითმმართველი ერთეულების _ ქალაქებისა და მუნიციპალიტეტების მმართველი რგოლები არჩევითი იქნება. გუბერნატორის ინსტიტუტის პარალელურად შეიქმნება კოლეგიალური ორგანო, რომელშიც წარმოდგენილი იქნებიან საკრებულოს წევრები, ეს ორგანო კი ჩართული იქნება გადაწყვეტილებების მიღების პროცესში.
როგორც რეფორმის ინიციატორები აცხადებენ, კოდექსით ასევე განსაზღვრულია სოფლებში საზოგადოებრივი საბჭოების შექმნა, რაც სოფლის მაცხოვრებელთა საჭიროებების გამოვლენას და მათ გადაწყვეტას ხელს შეუწყობს. რეფორმის ინიციატორები თვლიან, რომ ამის შედეგად მოხდება ქვეყნის მასშტაბით ქალაქებისა და სოფლების სოციალურ-ეკონომიკური განვითარება. ადგილობრივი ხელისუფლება უფრო მეტად დაუახლოვდება საკუთარ მოსახლეობას, რაც გაზრდის მოქალაქეთა ჩართულობის დონეს ადგილობრივი მნიშვნელობის საკითხების გადაწყვეტის პროცესში, გაუმჯობესდება საზოგადოებრივი მომსახურების მიწოდების ხარისხი.
