2012 წლის საპარლამენტო არჩევნების შემდეგ, როცა კოალიცია “ქართულმა ოცნებამ” ქვეყნის მმართველობა გადაიბარა, ოპოზიციური პარტიების მხრიდან ძირითადად შენიშვნები სოციალურ-ეკონომიკურ პროცესებსა და საგარეო პოლიტიკაზე მოდიოდა.
საპარლამენტო უმცირესობა ძირითადად ყურადღებას ბიუჯეტის შეუსრულებლობასა და წამგებიან საყოველთაო ჯანდაცვაზე ამახვილებდა.
როგორც მიხეილ მაჭავარიანი განამრტავდა, 2013 წლის ბიუჯეტი ვერ შესრულდა და მას 600 მილიონი აკლია, რომელიც შემდგომში რომელიმე სფეროს დაფინანსებაზე უარყოფითად აისახება.
ეკონომიკურ პრობლემებს არც მმართველი გუნდი უარყოფდა, თუმცა აღნიშნავდა, რომ წლის ბოლოს მდგომარეობა შესამჩნევლად გამოსწორდა და 2014 წლის ბიუჯეტიც გაზრდილია.
ასევე, აქტუალურობა არ დაუკარგავს ინვესტიციების ქვეყნიდან გადინების თემასაც.
რაც შეეხება საყოველთაო ჯანდაცვას, რომელსაც მთავრობა ერთ-ერთ მთავარ მიღწევად მიიჩნევს, უმცირესობა სერიზულ პრობლემას უწოდებს.
ჯანდაცვის ყოფილ მინისტრ ზურაბ ჭიაბერაშვილს, ამ საკითხზე არაერთხელ გაუმახვილებია ყურადღება და აღუნიშნავს, რომ ამით სადაზღვევო კომპანიები სერიოზული ფინანსური პრობლემების წინაშე დგებიან. ასევე, კერძო სექტორში დაზღვეულები სრულად გადავლენ სახელმწიფო დაზღვევაზე, რაც ქვეყანასა და ბიუჯეტს ტვირთად დააწვება.
კოალიციური მთავრობის საგარეო პოლიტიკა – ეს ის თემა იყო, რომელიც არაერთხელ გამხდარა კრიტიკის საგანი. რუსეთთან დაწყებული მოლაპრაკებები და ქართული პროდუქციისთის გახსნილ ბაზარს, საზღვრების გადმოწევა და ე.წ. მცოცავი ოკუპაცია მოჰყვა.
“ნაციონალური მოძრაობის” ერთ-ერთი ლიდერი სერგო რატიანი აცხადებდა, რომ რუსეთის მხრიდან მცოცავი ოკუპაცია სწორედ ამჟამინდელი ხელისუფლების ბრალი იყო. მისი თქმით, რუსეთის მიერ საოკუპაციო პოლიტიკის გაგრძელებასა და საქართველოს ხელისუფლების დათმობით პოლიტიკას, სულ უფრო მეტი ტერიტორიების დაკარგვამდე მივყავართ.
ზემოთ ჩამოთვლილ პრობლემებს, 2013 წლის ყველაზე აქტუალურ პრობლემებად მიიჩნევენ ექსპერტებიც. მათი აზრით, ახალ პოლიტიკურ რეალობაში, ახალი პრემიერის, პრეზიდენტისა და თითქმის უცვლელი მინისტრთა კაბინეტის პირობებში, სწორედ ამ საკითხებზე უნდა გამახვილდეს ყურადღება და მთავრობის მმართველობის სტილში მიდგომები შეიცვალოს.
პოლიტოლოგი ნიკა ჩიტაძე “გურია ნიუსთან” საუბრისას ყურადღებას ქვეყანაში არსებულ სოციალურ-ეკონომიკურ პრობლემებზე ამახვილებს და უპირატესად მათ მოგვარებას მიიჩნევს.
“უნდა განისაზღვროს რა იყო 1 ოქტომბრის საპარლამენტო არჩევნების შემდგომ პერიოდში ხელისუფლების სუსტი და ძლიერი წერტილები. ძლიერი იყო ჯანდაცვა და სოციალური მიმართულება, მაგრამ სუსტი იყო ეკონომიკა, ქვეყნის ფინანსური პოლიტიკა, პენიტენციალური სისტემა. აქედან გამომდინარე, ამ შემთხვევაში, ზემოთ აღნიშნული ფაქტორები უნდა გაითვალსიწინონ და მის მოგვარებას კონკრეტული ძალისხმევა უნდა მოხმარდეს. შესაბამისად, ყურადღება უნდა მიექცეს ფინანსური და ეკონომიკური მინისტრების შეცვლის საკითხის დასმას. ვფიქრობ, მომდევნო თვეებში ამას უნდა ველოდოთ კიდეც”, _ ამბობს “გური ნიუსთან” საუბრისას ჩიტაძე.
იგივე მოსაზრება აქვს ექსპერტს საერთაშორისო ურთიერთობათა საკითხებში ვანო მაჭავარიანს, რომელიც აღნიშნავს, რომ ეკონომიკა სწრაფი ტემპით უნდა გადავიდეს განვითარების ეტაპზე და ამის უნარი ირაკლი ღარიბაშვილს მისი ბიზნესთან ურთიერთობის განთვალსწინებით აქვს.
“ბიზნესწრეებთან ურთიერთობა ღარიბაშვილისთვის უცხო არაა და პრემიერის თანამდებობიდან მას შეუძლია ის საკითხები დააბალანსოს, რაც ეკონომიკის განვითარებისთვის იქნება საჭირო.”
საგარეო პოლიტიკის უპირატესობაზე საუბრობს პოლიტოლოგი კორნელი კაკაჩია. იგი მიიჩნევს, რომ აუცილებელია შემუშავდეს დოკუმენტი, რომელიც საგარეო პოლიტიკის ვექტორს განსაზღვრავს და როგორც ქვეყნის შიგნით, ასევე ფარგლებს გარეთაც არსებულ დაბნეულობას გაფანტავს.
“ვფიქრობ, საგარეო პოლიტიკა ინერციით მუშაობს. ანუ, რაც იყო წინა ხელისუფლების მიერ დატოვებული, ის არავის არ გაუფუჭებია და ამ ხაზს მიჰყვებიან. ზოგჯერ თუ გადავხედავთ ახალი ხელსუფლების იმ შტოებს, რომლებიც საგარეო პოლიტიკას ეხებიან და უცნაურ განცხადებებს აკეთებენ, ცოტა არ იყოს დამაბნეველი იყო საერთაშორისო თანამეგობრობისთვის და უამრავ სვადასხვა აზრს ბადებდა როგორც ქვეყნის შიგნით, ასევე ფარგლებს გარეთაც. ამიტომ, საგარეო პოლიტიკასთან დაკავშირებით ასეთი გაურკვევლობა რომ არ იყოს, საჭიროა შემუშავდეს ახლი საგარეო პრიორიტეტები. კონფერენცია ჩატარდეს, სადაც დოკუმენტურად იქნება დადასტურებული თუ როგორ ხედავს ახალი ხელისუფლება მომავალი 4 წლის განმავლობაში ქვეყნის საგარეო პრიორიტეტებს. თუ ეს გაკეთდება, შემდგომში ამის მიხედვით ვიმოქმედებთ.
ყველაზე მეტად სწორედ ეს გვაკლია, მაგრამ მაშინ როცა ქვეყანა სხვა უამრავი გამოწვევის წინაშე დგას, რთულია წინასწარ იმის პროგნოზირება, შეიქმნება თუ არა ეს შეჯერებული დოკუმენტი და რამდენად პრიორიტეტულად ჩათვლიან საგარეო ვექტორს. თუმცა, მიმაჩნია, რომ ყველა ვარიანტში ეს გასაკეთებელია, რადგან 1 წელი ცოტა არაა მინიმუმ კონცეფციის ჩონჩხის მოსამზადებლად”, _ ამბობს “გურია ნიუსთან” საუბრისას კაკაჩია.
