საინტერესოა, რამდენად კანონიერია მსგავსი ქმედებები ოზურგეთის მუნიციპალიტეტის გამგეობის მხრიდან.
რამდენიმე დღის წინ, საზოგადოების ყურადღება მიიპყრო ქალაქ ოზურგეთის ცენტრში, უნივერმაღის მიმდებარე ტერიტორიაზე საუკუნოვანი წიწვოვანი ხის მოჭრამ. ამ ფაქტთან დაკავშირებით “გურია ნიუსს” რამდენიმე მოქალაქე დაუკავშირდა _ მათ აინტერესებთ, ვინ და რატომ მოჭრა ხე აღნიშნულ ტერიტორიაზე, ვის უშლიდა ხელს, სად წაიღეს და რა დანიშნულებისთვის?!
ჩვენ ამასთან დაკავშირებით, კომენტარები ვთხოვეთ კომპეტენტურ პირებსა და საზოგადოების წარმომადგენლებს.
მარინა სუნგულია: _ ბოლო პერიოდში, ოზურგეთის მუნიციპალიტეტში წარმოებულმა ჭრებმა, როგორც მოქალაქე, შემაწუხა. მაგრამ, რამდენიმე დღის წინ, მიწაზე დანარცხებული ბუმბერაზი წიწვოვანი ხის ნახვამ შემძრა და გამიჩინა ასეთი განწყობა, რომ ქალაქს ორფეხა “ლაფანჭამიები” შეესივნენ.
ოზურგეთის მუნიციპალიტეტის გამგეობის ზედამხედველობის სამსახურის მთავარი სპეციალისტი გარემოს დაცვისა და ბუნებრივი რესურსებით სარგებლობის საკითხებში გურამ ბერძენიშვილი ამ ფაქტთან დაკავშირებით საქმის კურსში არ აღმოჩნდა:
_ არავის ჩავუყენებივარ საქმის კურსში.
_ ბატონო გურამ, რატომ მოიჭრა მრავალწლოვანი წიწვოვანი ხე ქალაქის ცენტრში?
_ ჰკითხეთ ზედამხედველობის სამსახურის უფროსს. აღნიშნულ სამსახურში შექმნილია კომისია, რომლის გადაწყვეტილებით უნდა მოიჭრას ცეცხლისგან დაზიანებული ან გამხმარი ქარსაფარი ზოლი. მე არ მინახავს ის ხე, აქედან გამომდინარე, კომენტარს ვერ გავაკეთებ _ ეს ხე მოიჭრა ჩემი ნებართვის გარეშე.
გელა ჭანუყვაძე, ოზურგეთის მუნიციპალიტეტის ზედამხედველობის სამსახურის უფროსი: _ პირველ რიგში, ეს ხე იყო გამხმარი, ამის შესაბამისი აქტიც არსებობს, რომელიც ქალაქის მერიამ გააკეთა. ჩვენ შევამოწმეთ და ექვემდებარებოდა მოჭრას. წვიმა რომ იყო, ტოტი მოტყდა, ჩამოვარდა და მანქანას დაეცა, საშიშროებას უქმნიდა მოსახლეობას და საჭიროდ მივიჩნიეთ, მოგვეჭრა.
_ ბატონო გელა, საზოგადოებას აინტერესებს, სად წაიღეთ მოჭრილი ხე?
_ ჩვენ ხელშეკრულება გვაქვს გაფორმებული ერთ-ერთ ინდმეწარმესთან, რომელსაც აქვს სახერხი ქარხანა, იქ ვხერხავთ მასალებს და შემდეგ მოვიხმართ საჭიროებისამებრ _ მასალით ვეხმარებით გაჭირვებულებს, სოციალურად დაუცველებს, ზოგს სახურავისთვის, ზოგს _ ისე, _ გვითხრა გელა ჭანუყვაძემ.
მისი თქმით, მოჭრილი ხეების ნაცვლად, ახალს დარგავენ.
