რამდენიმე დაინტერესებულმა პირმა თბილისის მერიის მიერ გამოქვეყნებულ სატენდერო დოკუმენტაციაში ავტობუსების ტექნიკურ დეტალებთან დაკავშირებით გარკვეული ინფორმაციის დაზუსტება მოითხოვა, რისთვისაც ელექტრონული შესყიდვების პლატფორმაზე არსებული ფორუმით ისარგებლა, რომლის მეშვეობითაც მომწოდებლებს შეუძლიათ, საჯაროდ დასვან კითხვები და მიიღონ პასუხები სახელმწიფო შესყიდვების ტენდერის მართვაზე პასუხისმგებელი თანამშრომლისაგან. განმარტების ეს მოთხოვნები განახლებულ დოკუმენტშიც აისახა, სადაც დაკონკრეტდა ავტობუსების სპეციფიკაციები და ის ვალდებულებები, რომელთა შესრულებაც მოეთხოვებათ ტენდერში მონაწილეებს. არაფერი მეტყველებს იმაზე, რომ დოკუმენტები მეტისმეტად სპეციფიკურია ან რომელიმე კონკრეტული მიმწოდებლის სასარგებლოდაა შემუშავებული. “საერთაშორისო გამჭვირვალობა – საქართველომ“ სხვადასხვა საწარმოში გამოშვებული ავტობუსის მოდელებზე ინფორმაცია მოიძია და დაასკვნა, რომ ისინი, ძირითადად, ტენდერში მოთხოვნილ სპეციფიკაციებს შეესაბამება.
თბილისელებისათვის სასიხარულო სიახლე: ახლად შეძენილი ავტობუსები შეკუმშულ ბუნებრივ აირზე იმუშავებს და როგორც მინიმუმ გამონაბოლქვზე დადგენილ ნორმას Euro 5 emission standard უნდა აკმაყოფილებდნენ. ეს კი იმას ნიშნავს, რომ ამჟამად გამოყენებულ დიზელის ძრავებთან შედარებით ახალი ავტობუსები მნიშვნელოვნად მცირე დამაბინძურებელ აირებს გამოყოფს.
გარდა ამისა, სატენდერო მოთხოვნებში აღნიშნულია, რომ ყველა ავტობუსში დამონტაჟებული იქნება კონდიციონერი (და რამდენიმე ფანჯარა, რომელიც შეიძლება გაიხსნას). ავტობუსებს არ ექნებათ ასასვლელი საფუხურები და აღჭურვილნი იქნებიან გაჩერებაზე ძირს დაშვების მექანიზმით, რათა მოხუცებს, შეზღუდული შესაძლებლობის მქონე პირებსა და ჩვილ ბავშვიან მგზავრებს შესაძლებლობა ჰქონდეთ, უფრო ადვილად მოხვდნენ ავტობუსში. ერთ-ერთ კარს ასევე ექნება ინვალიდთა ეტლების ასაყვანი კიბე, რითაც შესაბამისი მგზავრები ისარგებლებენ და დახმარებისათვის სხვების შეწუხება არ დასჭირდებათ.
ავტობუსის ტევადობა მინიმუმ 85 მგზავრს უნდა მოიცავდეს და მასში უნდა იყოს 25 – 35 დასაჯდომი ადგილი და სივრცე სულ მცირე ერთი ინვალიდის ეტლის დასაყენებლად.
თითოეულ ავტობუსში რამდენიმე ვიდეოთვალი იქნება დამონტაჟებული; გადაღებული კადრების შენახვა მანქანის სისტემაში მინიმუმ 96 საათის განმავლობაში იქნება შესაძლებელი.
ავტობუსის მიმწოდებელი ვალდებულია, ახალი მანქანების ექსპლუატაციის კუთხით ტრეინინგები ჩაუტაროს 200 მძღოლს. მან ასევე უნდა უზრუნველყოს 30 თვის ან 150 000 კმ-ის გავლის (რიგითობის მიხედვით) საგარანტიო პერიოდი, რომლის დროსაც კომპანია ვალდებული იქნება, უფასოდ შეასრულოს ყველა სახის ტექნიკური და მომსახურების სამუშაო.
ავტობუსების შეძენა 2013 – 2014 წლების ბიუჯეტიდან დაფინანსდება, პირველი 20 ავტობუსის შემოყვანა 2014 წლის 15 მაისამდეა გათვალისწინებული, ანუ, დაახლოებით იმ პერიოდისათვის, როდესაც ადგილობრივი თვითმმართველობის არჩევნები უნდა ჩატარდეს, დანარჩენი 80 ავტობუსის შემოყვანა კი მომავალი წლის აგვისტოს ბოლომდე უნდა მოხდეს.
